Kɔrɛnti 2, 2 - Bibeli do fee

¹ Nŋui í jɔ̀ ǹ lasabu n maà n ti n naa bi tu ŋɛ n naa n fɔ inɔ nŋɛ má.

² N kù bi n fɔ inɔ nŋɛ domi bii ǹ fɔ inɔ nŋɛ, yooi á tũ inɔm má bii kù jɛ iŋɛ iyi ǹ fɔ inɔ nŋɛu.

³ Na ŋɔi í jɔ̀ ǹ tako ǹ kɔ nŋɛ tiau bɛ wa do yaase bɛɛbɛ. N kù bi n naa bi tu ŋɛ, iŋɛ iyi hai bi tu ŋɛi an ba inɔ didɔ̃ i fɔ inɔm ŋa. Ǹ wa n naanɛ iŋɛ fei iyi bii inɔm í dɔ̃, inɔ didɔ̃i iŋɛ feii.

⁴ Bɛɛbɛi ǹ kɔ nŋɛ tiau wa do inɔ kufɔ do cikãaju nkpɔ nkpɔ, kù jɛ ti n fɔ inɔ nŋɛ, ǹ bi i mà ŋa zaka bɛi ǹ bi ŋɛ í toi.

Idei kurara ku kpa

⁵ Si bɛi inɛ gɔ nŋɛ í fɔ inɔm, kù jɛ inɔi amu akãi í fɔ, ti iŋɛ feii. Walakɔ ǹ tamaa í sĩa n ni inɔi inɛ gɔ nŋɛ ŋai í fɔ, domi n kù bi n fɔ n lɔ si.

⁶ Amma í to bɛɛbɛ, si bɛi inɛ nkpɔ nŋɛ í kpãa iju.

⁷ Í sĩa i kpa idei kuraraɛ i mua gbugbã ŋa ku ba inɔ kufɔ nlau ku maà caa siɛ.

⁸ Na nŋu, ǹ wa n tɔɔ ŋɛ, i ceaa bɛi á mà iyi ì bi nŋu ŋa.

⁹ Na ŋɔi í jɔ̀ ǹ tako ǹ kɔ nŋɛ tia wa wo n cɔ laakai nŋɛ ku ba n mà bii í jɛ ì waa jirima fei ndɛɛ ŋa.

¹⁰ Inɛ iyi ì kpa idei kuraraɛ ŋa, amu mɔ ǹ kpaa mbɛ baa do iyi kù jɛ amui í raraa. Nɔ ideu iyi ǹ kpa, ǹ kpaai na iri nŋɛ si wajui Kirisi,

¹¹ ku ba Seetam ku maà zamba wa. Ntɔi, à mà sãa sãa iyi wa bi ku ce.

Zigiidai Pɔlu si ilui Torasi

¹² Iyi ǹ to Torasi laabaau jiidai Kirisi ku sisi, ǹ yɔɔ iyi didɔ̃i Lafɛ̃ɛi í cĩim kpãa n ceò icɛ bɛ.

¹³ Amma laakaim kù sũ sɛ̃ɛ si bɛi n kù yɛ kpaasim Titee. Na ŋɔi í jɔ̀ ǹ tɔɔ inɛi Torasi ŋa sukudɔ̃ ǹ nɛ ilɛi Masedɔni.

À jɛ igũ si kpãai Jesu Kirisi

¹⁴ Ka saabu Ilaaɔ̃, domi í mu nwa gbugbã ka jɛò igũ waati kãma fei si kpãai Kirisi. Wa ceò wa icɛ ku ba ku jɔ̀ inɛ ŋa a mà Kirisi, nɔ kumài Kirisiu ku fangaa bii fei bɛi inúnùi tuae í ya fangaa.

¹⁵ Ntɔi, si wajui Ilaaɔ̃ à yɛi bɛi inúnù didɔ̃i Kirisi, bi inɛ ŋa iyi à ba faaba, do bi woo bɔ nfe ku ce ŋa.

¹⁶ Bi inɛ ŋa iyi à waa bɔ bi ku ce nfe, inúnùi ikui iyi wa bí iku. Bi inɛ ŋa mɔ iyi à waa ba faaba, inúnùi kuwɛɛi iyi wa na kuwɛɛ. Yooi í to ku ce dimii icɛu bɛ.

¹⁷ A kù jɛ bɛi inɛ gɔ ŋa iyi à waa sisi idei Ilaaɔ̃ na fia. Amma si na iyi í jɔ̀ Ilaaɔ̃i í bɛ wa wa, nŋui í jɔ̀ à waa fɔ ide dee dee na anu akã iyi à ce do Kirisi, kù jɛ do muafiti.