Kɔrɛnti 2, 13 - Bibeli do fee

Ide ankãanyi do fɔɔɛ

¹ Kukɔi idei Ilaaɔ̃ wa fɔ í ni, i bɛi i yɛ taalei inɛ baa yooma fei í sĩa ku jɛ do sɛɛdai amanɛ minji walakɔ mɛɛta. Wee isɛ gbɛɛtasiam nii ǹ wa n naa bi tu ŋɛ bɛbɛi.

² Nɔ ǹ nɛ ide iyi an sɔ̃ inɛ ŋa iyi à ce dulum wo, do inɛ ŋa iyi à gbe fei. Ǹ fɔɔ tã waati iyi ǹ wa bi tu ŋɛ isɛ gbeejisiau. Amma nsɛi iyi n kù wa bɛ, ǹ sisi ǹ wa n fɔ má. Waati iyi an na n to wa bi tu ŋɛ bɛ má, bii inɛ gɔ nŋɛ í ce ide gɔ an fɔ siɛ ide do kugaabu.

³ An gaabu si na iyi í jɔ̀ ì bi n nyisi ŋɛ iyi Kirisii wa fɔ ide hai bi tom ŋa. Debɛi, aa yɔɔ ŋa. Kirisi kù kua gbugbã bi tu ŋɛ, amma wa nyisi gbugbãɛ si anini nŋɛ.

⁴ Ntɔi, à kpakpaɛ si jĩi ku gaau si gbugbã hai nɛɛ, amma nsɛi í wɛɛ do saabui gbugbãi Ilaaɔ̃. Awa mɔ à jɛ hai nɛ gbugbã si anu akã nwa do nŋu, amma aa ka maa wɛɛ do nŋu si anini nŋɛ na saabui gbugbãi Ilaaɔ̃.

⁵ I wusɛ ara nŋɛ i cɔ yaasei kuwɛɛ nŋɛ bii í jɛ isɛɛnɛ nŋɛ wa too naanɛ iyi ì dasi ŋa do ntɔ. I kù mà ŋa iyi Jesu Kirisi í wa si ŋɛi? Í gbe bii iŋɛi ì mɔngɔ ku nyisi iyi ì dasi naanɛ ntɔ ntɔ ŋa.

⁶ Amma do nŋu fei ǹ tamaa aa yɔɔ ŋa iyi kù nɛ sika awa à dasi naanɛ ntɔ ntɔ.

⁷ Mii iyi à waa tɔɔ Ilaaɔ̃ nŋui í jɛ i maà na i ce laalɔ kãma ŋa. Kù jɛ à waa dɛ inɛ ŋa a saabu icɛ jiida nwa, amma iyi à waa lele, nŋui í jɛ i ce mii jiida ŋa, baa bii inɛ ŋa à waa ni awa a kù ce nkãma.

⁸ A kù nɛ gbugbã ka kpaasiò ide ntɔ do ibo, bii kù jɛ ka jɔ̀ ntɔu ku bɔ waju.

⁹ À wɛɛò inɔ didɔ̃ ka jɛ hai nɛ gbugbã ŋa bii ntɔ ntɔ iŋɛ ì nɛ gbugbã ŋa. Nɔ nŋu mɔm nii à waa tɔɔ Ilaaɔ̃ ku ba i kɔ̃ ŋa.

¹⁰ Na ŋɔi í ce ǹ kɔ nŋɛ mii ŋau ihɛ̃ hai waati iyi ǹ wa n jĩò ŋɛ ku ba bii ǹ to wa, n maà n gaabu si ŋɛ do gbugbã iyi Lafɛ̃ɛ í muum. Í muum gbugbãm nii, kù jɛ n kɛkɛò ŋɛ, amma ku ba n jɔ̀ naanɛ ku dasi nŋɛ ku bɔ wajui.

¹¹ Iyi í gbe nsɛi, iŋɛ inɛm ŋa, i jɔ̀ i nɛ inɔ didɔ̃ ŋa, i ce kookaai i jɛò inɛ ŋa iyi à kɔ̃, i ya maa mua njɛ gbugbã ŋa. I ce anu akã ŋa, i wɛɛò laakai ku sũ ŋa. Ilaaɔ̃ ku wɛɛ do iŋɛ, nŋu iyi í bi wa nɔ wa mu nwa laakai ku sũ.

¹² I ce njɛ fɔɔ do kubi jiida ŋa. Woo dasi naanɛ ŋau fei à waa ce ŋɛ fɔɔ.

¹³ Didɔ̃i Lafɛ̃ɛ Jesu Kirisi, do kubii Ilaaɔ̃, do anu akãi Hundei Ilaaɔ̃ ku wɛɛ do iŋɛ fei.