Kɔrɛnti 2, 12 - Bibeli do fee

Kuyɛ do kukɔsi iyi Ilaaɔ̃ í nyisi Pɔlu

¹ Debɛi í gbe n tɔɔ fufu, baa bii í jɛ kù nɛ aranfãani gɔ. Amma nsɛi an fɔ idei kuyɛ do kukɔsi iyi Lafɛ̃ɛ í nyisim.

² Ǹ mà inɛi Kirisi gɔ iyi à soo hee lelei Aɔ̃ í to adɔ̃ maatɛ̃ɛ nnyi. Do araɛi à soo do ntɔ? Mà í ce kuyɛi? N kù mà. Ilaaɔ̃ nŋu akã dei í mà.

^3-4 Ǹ mà iyi à so mɔkɔu hee bi Ilaaɔ̃. Nɔ ǹ sisi ǹ wa n fɔ má, do araɛi à soo do ntɔ? Mà í ce kuyɛi? Ilaaɔ̃ nŋu akãi í mà. Tengi bɛi í gbɔ ide iyi kù jɔ amanɛ ku fɔ, nɔ kaa yɔkɔ ku fɔɔ mɔm.

⁵ An tɔɔ fufu si inɛɛu bɛ. Amma n kaa n tɔɔ fufu si aram, bii kù jɛ si gbugbã hai nɛm.

⁶ Bii í jɛ ǹ bi n tɔɔ fufui n kaa n jɛ sũmu, domi an fɔ ntɔ. Amma n kù wa n tɔɔ fufu ku ba inɛ gɔ ku maà cɔm ku re bɛi wa yɛm, walakɔ bɛi wa gbɔ hai si gɛlɛm.

⁷ Amma ku ba n maà n ce faau na kukɔsi nlau, bɔ̃ɔ gɔ í na í sɔkɛ sim bɛi agũ. Í naai bɛi woo bɛi Seetam ku na ku cãm nɔ ku ganjim faau ku ce.

⁸ Isɛ gbɛɛtai ǹ tɔɔ Lafɛ̃ɛ ku ba ku faabam hai si wahalau bɛ.

⁹ Amma í jɛɛm í ni, didɔ̃m í toɛ domi si gbugbã hai nɛɛi inɛ ŋa aa yɛ gbugbãm. Na nŋu, ǹ bi n tɔɔ fufu si gbugbã hai nɛm ku ba gbugbãi Kirisi ku wa sim.

¹⁰ Na ŋɔi í jɔ̀ ǹ nɛ inɔ didɔ̃ si gbugbã hai nɛm, do arabu ŋa, do inɔ kufɔ ŋa, do ijuukpã ŋa do wahala ŋa iyi í ya bam na irii Kirisi. Ǹ ya n nɛ inɔ didɔ̃ domi waati iyi amu takam n kù nɛ gbugbã, waati bɛɛbɛi Ilaaɔ̃ í ya muum gbugbã.

Zigiida iyi Pɔlu í nɛ na inɛi Kɔrɛnti ŋa

¹¹ Ǹ wa n fɔ ide bɛi sũmu, amma ì tilasim ŋai. Iŋɛi í sĩa i fɔ jiidam ŋa wo, domi baa bii n kù jɛ ngɔgɔ, inɛ ŋau ihɛ̃ iyi à waa cɔ ara nŋa woo bɛ nla ŋau, a kù rem.

¹² Ǹ nyisi ŋɛ ntɔ ntɔ iyi ǹ jɛ woo bɛ si kucem ŋa do temua nla nla iyi ǹ ce. Kuce ŋau nŋui í jɛ maamaake dimi ikã ikã ŋa do icɛ gbugbã ŋau fei.

¹³ Mii ǹ cea igbɛi inɛi Jesu gɔ ŋa iyi n kù ce nŋɛ, bii kù jɛ iyi ǹ ni n kù bi n jɛ aso nŋɛ. Nɔ bii na nŋui, i ceem suurui kuraram.

¹⁴ Wee ǹ tã sɔɔlu n naa bi tu ŋɛ isɛ gbɛɛtasia. Nɔ n kaa n jɛ aso nŋɛ má. Iŋɛ taka nŋɛi ǹ bi, kù jɛ fia nŋɛ. Kù jɛ amu ŋai aa ba fia a woò baa nŋa ŋa, amma baa ŋai aa ba fia a woò ama nŋa ŋa, mà irei.

¹⁵ Inɔ didɔ̃m nii n jɛ mii iyi ǹ nɛ fei, nɔ n loò aram na hunde nŋɛ. Bii kubi nŋɛ iyi ǹ nɛ wa kɔ̃ɔsi, kubi iyi ì bim ŋa á kaye?

¹⁶ Ì mà do ntɔ ŋa iyi n kù jɛ aso nŋɛ amma inɛ gɔ ŋa à ni ǹ ya n ce nŋɛ bisii n maa n gba fia nŋɛ si asii.

¹⁷ Mà inɛ ŋa iyi ǹ ya n bɛ si ŋɛ wa ŋau, baa inɛ akã nŋa, í takii ŋɛi?

¹⁸ Ǹ tɔɔ Titee ku naa bi tu ŋɛ, ǹ bɔɔ wai nŋu do kpaasi gɔ. Aa ni Titee í takii ŋɛ má ŋai? Lasabui awaò fei kù jɛ akãi? Kuce nwa kù jɛ akãi?

¹⁹ Ì tamaa bɛi hai ku kpɛ à waa dɛ ka kɔ̀ò ara nwa si waju nŋɛi? Aawo, kù jɛ bɛɛbɛ baakɔɔ nwa ŋa. À waa fɔ idei bɛi Kirisi í bi si wajui Ilaaɔ̃ ku ba naanɛ ku dasi nŋɛ ku bɔ waju.

²⁰ Ǹ wa n ce njo bii ǹ na ǹ to wa bi tu ŋɛ n maa n na n ba ŋɛ bɛi n kù bi, iŋɛ mɔ, i maa ti i na i bam bɛi i kù bi ŋa. Ǹ wa n ce njo ija do igu ku maà wa si ŋɛ, do idɔɔkɔ̃, do njɛ ku wã, do arabu ŋa, do irii inɛ ku sɔ, do faau, do mii hai nɛ yaase.

²¹ Ǹ wa n ce njo Ilaaɔ̃ ku maa na ku kayem si waju nŋɛ waati iyi an na ǹ nyi wa bi tu ŋɛ má. Nɔ ǹ wa n ce njo má n maa n na n kpata na irii inɛ nkpɔ ŋa iyi à tako à ce dulum wo nɔ a kù kpaasi idɔ hai si abo kaafe ŋa ku sũò do si daa sãmi nkpɔ do daa bɛɛtɛkɛ iyi à ya ce.