Kɔrɛnti 2, 11 - Bibeli do fee

Pɔlu í ni a ce laakai do woo bɛ ilu ibo ŋa

¹ Ǹ bi i temua do amu ŋa bii ǹ fɔ ide keeke iyi kù nɛ yaase. Ntɔ ntɔ, i temua do amu ŋa.

² Ǹ wa n ce igu iyi wa naa hai bi Ilaaɔ̃ na iri nŋɛ, domi ì yɛ ŋai bɛi mudɛ̃ɛ iyi ǹ mua mɔkɔ akã. Mɔkɔui í jɛ Kirisi nɔ ǹ bi n kooò ŋɛ bi tɛɛi bɛi mudɛ̃ɛ iyi kù mà mɔkɔ.

³ Amma si bɛi Seetam njou í dĩ ijui Ɛfa wo do bisi laalɔɛ, ǹ wa n ce njo lasabu nŋɛ mɔ ku maa na ku sinda hai si kpãai Kirisi iyi ì waa too nsɛi ŋa do naanɛ hai nɛ muafiti.

⁴ Njo í nyi wa mum má si na iyi í jɔ̀ bii inɛ gɔ í naa wa sisi nŋɛ idei Jesu mmu gɔ i ci ya kɔ̀ ŋa. Ì ba Hundei Ilaaɔ̃ tã ŋa, amma ì nyi ì tã sɔɔlu i gba hunde mmu gɔ má ŋa. Ì gba laabaau jiidau tã ŋa, amma ì nyi ì tã sɔɔlu i gba laabaau ikã má ŋa.

⁵ Ǹ wa n tamaa inɛ ŋau ihɛ̃ iyi à waa cɔ ara nŋa woo bɛ nla ŋau, kãma nŋa gɔ kù rem do ngɔgɔ.

⁶ Baa bii n kù dɔ̃ gɛlɛ bɛi inɛ ŋau ihɛ̃, kù jɛ ǹ kua kumà, ǹ nɔ ǹ nyisi ŋɛ si fei ndɛɛ fei mam mam.

⁷ Waati iyi ǹ sisi nŋɛ laabaau jiidai Ilaaɔ̃, ǹ cooi ngbɛ ngbɛ. Ǹ kaye aram ku ba n so ŋɛ lele. Iyi ǹ ce bɛɛbɛ ǹ rarai?

⁸ Ǹ gba fiai igbɛi inɛi Jesu gɔ ŋa wai ǹ na ǹ sobi ŋɛò.

⁹ Waati iyi ǹ wa bi tu ŋɛ n kù jɛ asoi inɛ gɔ nŋɛ. Bii ǹ nɛ bukaatai ngɔgɔ, inɛ nwa ŋa iyi à ya naa hai ilɛi Masedɔni ŋai à ya naam mii iyi ǹ nɛ bukaataɛ fei wa. Ǹ mu aram si fei ndɛɛ ku ba n maà n jɛ aso nŋɛ. Bɛɛbɛ mɔi an nɔ n maa n mu aram.

¹⁰ Do ide ntɔi Kirisi iyi í wa sim, ǹ wa n sɔ̃ ŋɛ iyi inɛ gɔ kù wɛɛ si ilɛi Gɛrɛsi fei iyi á ganjim n tɔɔ fufu si ideu ihɛ̃.

¹¹ Na mii í jɔ̀ ǹ ce bɛɛbɛ. Ì waa tamaa n kù bi ŋɛi? Ilaaɔ̃ í mà sãa sãa iyi ǹ bi ŋɛ.

¹² Amma bɛi ǹ wa n ce nsɛi, bɛɛbɛi an maa n ce má ku ba n dĩ nŋa kpãa, aŋa iyi à waa dɛ a tɔɔ fufu a ni awaò ŋa ŋa akãi.

¹³ Inɛ ŋau, woo bɛ ilu ibo ŋai iyi à ya dĩ ijui inɛ gɔ ŋa, nɔ à waa kpe ara nŋa woo bɛi Kirisi ŋa.

¹⁴ Nkãma kù wa bɛ iyi á biti inɛ, domi Seetam takaɛ á yɔkɔ ku kpaasi araɛ bɛi amalekai Ilaaɔ̃.

¹⁵ Na nŋu, biti gɔ kù wɛɛ bii woo ce icɛɛ ŋa à kpaasi ara nŋa bɛi woo ce icɛi Ilaaɔ̃ ŋa. Amma aa ba riba nŋa si bɛi icɛ nŋa í yɛ.

Ijuukpã iyi Pɔlu í yɛ si kubɛ

¹⁶ Ǹ wa n fɔ má, inɛ gɔ ku maà cɔm bɛi sũmu. Amma baa bii ì waa cɔm sũmu ŋa, i gbam do bɛɛbɛ, ku ba amu mɔ n tɔɔ fufu keeke.

¹⁷ Iyi ǹ wa n fɔ nsɛi kù jɛ bɛi Lafɛ̃ɛ í bi inɛ ŋa a ya fɔ. Amma si ideu ihɛ̃ ǹ wa n tɔɔ fufu nɔ ǹ fɔ ide bɛi sũmu. Nɔ bii ǹ wa n tɔɔ fufu ǹ nɛ mii iyi ǹ wa n tɔɔò fufui.

¹⁸ Amu takam mɔ an tɔɔ fufu si na iyi í jɔ̀ inɛ nkpɔ wa tɔɔ fufu na ara.

¹⁹ Ì waa temuaò inɛ hai nɛ yaase ŋa, iŋɛ iyi ì waa tamaa ì nɛ yaase jiida ŋa.

²⁰ Ì waa coko à waa ce ŋɛ aru ŋa, à waa ce ŋɛ ile, à waa takii ŋɛ, nɔ à waa donda ŋɛ, nɔ à waa sambala ŋɛ.

²¹ Anyɔ wa mum n sɔ̃ ŋɛ iyi n kù nɛ gbugbã n ce nŋɛ bɛɛbɛ. Do nŋu fei, bii inɛ gɔ ŋa à nɛ wɔɔkɔ à waa tɔɔò fufu amu mɔ ǹ nɛ. Ǹ wa n fɔ ide bɛi sũmu.

²² À jɛ inɛi Ebɛɛ ŋai? Bɛɛbɛ mɔi amu takam. À jɛ inɛi Izirɛli ŋai? Bɛɛbɛ mɔi amu takam. À jɛ tɔkui Aburahamui? Bɛɛbɛ mɔi amu takam.

²³ À jɛ woo ce icɛi Kirisi ŋai? Ǹ re ŋa si bɛ. Idem nɔu, idei sũmui. Ǹ ce icɛ ǹ re ŋa, à dasim piisɔ̃ɔ í re ŋa, à tɛɛm kpɔtɔɔ n kù mà baa jiaɛ. Isɛ nkpɔ nkpɔi ǹ maai iku.

²⁴ Isɛ gbɛɛwui Zuifu ŋa à tɛɛm kpɔtɔɔ anu ciiji fakã kù wa si.

²⁵ Inɛi Romu ŋa à cãm do golo í to isɛ gbɛɛta. À tam kuta à bi a kpam gbakã akã. Isɛ gbɛɛtai akɔi inyi iyi ǹ lɔ í jɛ inyi, nɔ ǹ dasi inyi gbakã akã ǹ wa bɛ hai daakɔ hee iju í koo í má.

²⁶ Si isɛɛnɛm ŋa ajɔ nkpɔ nkpɔ si mbiisii ǹ ya n maa n wa na kukɔ̃i ido do woo bata ku gba ŋa iyi à wa si kpãa. Ajɔ gɔ ŋa ǹ ya n wa si mbiisi bi dimii inɛm ŋa, ajɔ gɔ ŋa mɔ bi dimi mmu ŋa, ajɔ gɔ ŋa mɔ si inɔ ilu, ajɔ gɔ ŋa mɔ si gbabua, ajɔ gɔ ŋa mɔ si tenku, ajɔ gɔ ŋa mɔ bi inɛ ŋa iyi à sɔ ibo à waa ni aŋa à jɛ kpaasi woo dasi naanɛ ŋa.

²⁷ Ǹ mà icɛ kugaabu ŋa do wahala nla nla ŋa, à ganjim njoo ku sũ. Ari í ya kpam nɔ agbɛ í ya kpam, ǹ ce anu ku dĩ do tilasi, ǹ wahala do tũtũ nɔ n kù nɛ jĩnɛ ku dasi ŋa.

²⁸ Si anyii mii ŋau bɛ fei, lasabum do zigiidam í ya maa wai si igbɛi inɛi Jesu ŋa fei.

²⁹ Bii inɛ gɔ kù nɛ gbugbã, amu mɔ n ci ya n nɛ gbugbã. Bii inɛ gɔ í dasi dulum ǹ ya n nɛ ara kuroi jiida.

³⁰ Bii í jɛ ǹ wa n tɔɔ fufui, an tɔɔi si mii iyi wa nyisi gbugbã hai nɛm fei.

³¹ Ka saabu Ilaaɔ̃ baai Lafɛ̃ɛ nwa Jesu do ajɔ fei. Nŋui í mà iyi n kù wa n sɔ ibo.

³² Waati iyi à wa Damasi, inɛ ngbo iyi amanlu Aretasi í jilɛ si iluu í jilɛ inɛ ŋai a maa degbe anu koofai ilu nlau a ba a mum.

³³ Amma kpaasim ŋa à jɔ̀ ǹ fitai hai do fɛrɛntii bindii iluu nɔ à kitaam nii si kɔlɔ, nɔ do yaase bɛɛbɛi ǹ ce ǹ gbãò.