Kɔrɛnti 2, 1 - Bibeli do fee

Idei fɔɔ

¹ Amui Pɔlu woo bɛi Jesu Kirisi si idɔɔbii Ilaaɔ̃, do Timɔtee kpaasi nwa. À ce inɛi igbɛi Ilaaɔ̃ ŋa iyi à wa Kɔrɛnti fɔɔ do woo dasi naanɛ ŋa fei iyi à wa si ilɛi Gɛrɛsi fei.

² Ilaaɔ̃ Baa nwa do Lafɛ̃ɛ Jesu Kirisi a mu nŋɛ didɔ̃ do laakai ku sũ.

Pɔlu wa saabu Ilaaɔ̃

³ Ka saabu Ilaaɔ̃, Baai Lafɛ̃ɛ nwa Jesu Kirisi, nŋui í nɛ araare, nɔ nŋui í ya maa tũ idɔ nwa waati kãma fei.

⁴ Wa tũ idɔ nwa si wahala baa yooma nwa fei. Í ya ce bɛɛbɛi ku ba awa mɔ ka yɔkɔ ka tũ idɔi inɛ ŋa iyi à waa wahala do yaase bɛi í tũò ti awa mɔ.

⁵ Ntɔ ntɔ, à nɛ ikpɛ̃ nla nla si ijuukpãi Kirisi, amma bɛi ijuukpãu í la í to, bɛɛbɛ mɔi yaase bɛi Kirisi wa tũò idɔ nwa ŋau mɔ í to.

⁶ Bii à yɛ ijuukpã, na iri nŋɛi, ku ba i ba faaba ŋa nɔ Ilaaɔ̃ ku tũ idɔ nŋɛ. Bii Ilaaɔ̃ í nɔ í tũ idɔ nwa, na iri nŋɛi, iŋɛ mɔ i temua ŋa do ijuukpã dimi akã do iyi à waa yɛu, nɔ idɔi iŋɛ mɔ ku tũ.

⁷ À waa naanɛ ŋɛ ntɔ ntɔ domi à mà, si bɛi ì nɛ ikpɛ̃ si ijuukpã nwa ŋa, bɛɛbɛ mɔi Ilaaɔ̃ á tũ idɔ nŋɛ si bɛi wa tũ tu wa.

⁸ Iŋɛ inɛ nwa ŋa, à bi i mà ŋa wahala iyi í ba wa si ilɛi Azii í caa. Í re gbugbã nwa hee a kù tamaa mà aa ka wɛɛ si hunde má.

⁹ À tamaa bɛi à yɛ taale nwa á kpa wai. Amma ideu ihɛ̃ í ba wai ku ba ka mà iyi kù sĩa ka dasi naanɛ nwa si awa taka nwa, amma ka dasi naanɛ nwa fei si Ilaaɔ̃ nŋu akã iyi á jĩ iku ŋa.

¹⁰ Nŋui í nya wa hai si iku dimi bɛɛbɛ, á nɔ ku nya wa má. Ntɔi, à waa cɔ kpãaɛ á nyi ku nya wa má.

¹¹ Iŋɛ taka nŋɛ ì waa sobi wa do kutɔɔ nŋɛ. Ilaaɔ̃ á gba kutɔɔ iyi inɛ nkpɔ í ce na iri nwa, nɔ á ce nwa didɔ̃ ku ba inɛ nkpɔ ku saabuɛ na iri nwa.

Pɔlu í kpaasi idei ilu ku bɔɛ

¹² Ide iyi í jɔ̀ à waa tɔɔ fufu wee. Idɔ nwa wa jɛ nwa sɛɛda iyi isɛɛnɛ nwa í má si wajui inɛi andunya ŋa, nɔ iyi í re mɔm nŋui í jɛ si waju nŋɛ. Kù nɔ kù jɛ do muafiti. Mii ŋau bɛ fei, hai bi Ilaaɔ̃i wa naa. Kù jɛ do bisii amanɛ ŋa, amma do didɔ̃i Ilaaɔ̃i.

^13-14 Bɛɛbɛi si tia iyi à ce nŋɛ wa, a kù kɔ nŋɛ mii mmu gɔ bii kù jɛ iyi ì cio ì gbɔ yaaseɛ ŋau bɛ. Si ajɔ iyi Lafɛ̃ɛ Jesu á nyi wa aa ka yɔkɔ ka tɔɔ fufu na iri nŋɛ. Bɛɛbɛ mɔi iŋɛ mɔ aa yɔkɔ i tɔɔ fufu ŋa na iri nwa. Ì gbɔ yaasei ideu ihɛ̃ keeke tã ŋa, amma ǹ bi i gbɔ yaaseɛ ŋai mam mam.

¹⁵ Na saabui ideu ihɛ̃i í jɔ̀ ǹ tako ǹ dasi idɔ n bɔ bi tu ŋɛ ku ba i ba didɔ̃ ikɔ minji ŋa.

¹⁶ Ǹ lasabu bii ǹ wa n bɔ ikpa ilɛi Masedɔni n yaa n yɛ ŋɛ, nɔ n nyi n yɛ ŋɛ má bii ǹ wa n baa. Bɛɛbɛi aa sobim si isɛɛnɛm ŋa n bɔò ikpa ilɛi Zudee.

¹⁷ Si ide iyi ǹ lasabuu, idɔ minjii ǹ ce? Mà ì waa tamaa ŋa ǹ ya n ni ǹ wa n naa nɔ gbakã n kpaasi ide má n ni n kù wa n naa bɛi inɛi andunya ŋa à ya cei?

¹⁸ Si bɛi ì mà ŋa iyi Ilaaɔ̃ í jɛ ilu naanɛ, ǹ bi i mà ŋa iyi n ci ya ni, ǹ wa n naa nɔ n ni, n kù wa n naa má.

¹⁹ Ntɔ ntɔ, Jesu Kirisi amai Ilaaɔ̃, nŋu iyi amu do Silasi do Timɔtee à waazo nŋɛu, kù naa do idɔ minji. Amma í naai do ide ntɔi Ilaaɔ̃,

²⁰ nɔ kuwã ŋa iyi Ilaaɔ̃ í ce fei í kɔ̃ siɛ. Na nŋu na saabuɛi à waa ni, ami, à waa saabuò Ilaaɔ̃.

²¹ Ilaaɔ̃i í jɔ̀ awaɛ ŋa fei à leekĩ si Kirisi dim dim ajɔ. Nŋui í nɔ í cica wa ikã.

²² Nŋui í ce si wa sɛɛdaɛ iyi wa nyisi iyi à jɛ tɛɛ, nɔ í da nwa si Hundeɛ si idɔ ku jɛ nwa bɛi kaazigi.

²³ Ilaaɔ̃ í jɛ sɛɛdam n kù bi n ba ŋɛ ide kugaabu ku ce. Na ŋɔi í ce n kù nyi wa Kɔrɛnti.

²⁴ A kù bi ka jilɛ nŋɛ ide gɔ do tilasi si naanɛ ku dasi nŋɛ si na iyi í jɔ̀ ì waa leekĩ dim dim ŋa tã si naanɛ ku dasiu, amma à bi ka ce icɛi awaɛ ŋa ajɔ ka mu nŋɛ inɔ didɔ̃.