Timɔtee 1, 6 - Bibeli do fee

¹ Inɛ ŋa iyi à jɛ aru fei í sĩa a doo lafɛ̃ɛ nŋa ŋa ilu jirima ŋa si mii fei, ku ba inɛ gɔ ku maà ba faya ku fɔ taalei irii Ilaaɔ̃ walakɔ kukɔsi nwa.

² Aru ŋa iyi à nɛ lafɛ̃ɛ woo dasi Jesu naanɛ ŋa a maà donda ŋa a ni aŋa à jɛ saa na saabui Lafɛ̃ɛ. Amma si na iyi í jɔ̀ inɛ ŋa iyi à waa jɛ aranfãanii icɛ nŋau à jɛ woo dasi Jesu naanɛ ŋa iyi Ilaaɔ̃ í bi, nŋui í jɔ̀ í sĩa a ce nŋa icɛ ku re. Mii iyi í sĩa i waazo nŋa mbɛ nɔ i kɔ ŋa si cioɛ.

Kukɔsi ibo do amani jiida

³ Inɛ iyi wa kɔa inɛ ŋa si cio mmu gɔ nɔ kù waa too ide ntɔi Lafɛ̃ɛ nwa Jesu Kirisi iyi á jɔ̀ ka mà bɛɛrɛi Ilaaɔ̃,

⁴ lafɛ̃ɛ ilu faau nla nlai, kù mà nkãma. Amma wa ce bɔ̃ɔi kakɔɔ do ide ku fengee. Nɔ hai bɛi igu do ija do arabu wa naa, nɔ nŋui í ya jɔ̀ inɛ ŋa a ci ya naanɛ njɛ.

⁵ Nɔ í ya jɔ̀ irii inɛ ŋa ku sinda a kaa mà ntɔ, nɔ a maa ce kakɔɔ hai nɛ kɔɔ. À tamaa kpãai idei Ilaaɔ̃ ku too á ce ŋa ilu amani ŋai.

⁶ Ntɔi, kpãai Ilaaɔ̃ ku tɔɔ amani nla gɔi, bii amanɛ wa saabu si mii iyi í nɛ.

⁷ Ntɔ ntɔ, a kù naaò nkãma wa si andunyau ihɛ̃, nɔ bɛɛbɛ mɔi a kaa ka nɛò nkãma.

⁸ Na nŋu, bii à nɛ ijɛ do nyau ŋa í nɛ ku to wai wo.

⁹ Amma inɛ ŋa iyi à waa bi aŋa a jɛ ilu fia nla, à ya dasi kulɛlɛi, nɔ binɛ laalɔ nkpɔ nkpɔ hai nɛ yaase a mu ŋa bɛi cɛkũm ku jɔ̀ a dasi nfe ku ce.

¹⁰ Bɛɛbɛi á ce si na iyi í jɔ̀ kubii fiai í jɛ icãi laalɔ ikã ikã baa yooma fei. Nŋui inɛ gɔ ŋa à lɔsi ku dɛ hee à yaa hai si kpãai naanɛ ku dasi, à baa à dasi ara nŋa si kpãai wahala.

Iyi Pɔlu í dasi Timɔtee ku ce

¹¹ Amma awɔ iyi ì jɛ ti Ilaaɔ̃, saa mii ŋau bɛ fei. Nɔ i lele kpãai dee dee ku jɛ do bɛɛrɛi Ilaaɔ̃ ku mà do naanɛ ku dasi do kubi do temua do daa didɔ̃.

¹² Jabu jiida si kpãai naanɛ ku dasi. Leekĩ dim dim si kpãai kuwɛɛ hai tã si bii Ilaaɔ̃ í kpeɛ. Na kuwɛɛui ì jɛ sɛɛda jiida si wajui inɛ nkpɔ.

¹³ Ǹ wa n sɔ̃ɛ si wajui Ilaaɔ̃ nŋu iyi wa na mii fei kuwɛɛ do si wajui Jesu Kirisi nŋu iyi í jɛ sɛɛda jiida si wajui Pɔnsu Pilati,

¹⁴ jirima wooda nɔ kuwɛɛɛ ku maà nɛ riisi do taale gɔ hee ku toò ajɔ iyi Lafɛ̃ɛ nwa Jesu Kirisi á faata wa.

¹⁵ Ilaaɔ̃, nŋu iyi í jɛ icui inɔ didɔ̃ fei, á jɔ̀ ajɔu ku to wa si waatiɛ. Nŋu akã lege legei í nɛ yiiko si mii fei, nŋui í jɛ ilaalui ilaalu ŋa, do Lafɛ̃ɛi lafɛ̃ɛ ŋa.

¹⁶ Nŋu akãi í jɛ inɛ iyi ci ya ku. Nɔ í wa si inya kumá iyi inɛ gɔ kaa yɔkɔ ku maai si. Inɛ gɔ kù yɔɔ, nɔ inɛ gɔ kaa yɔkɔ ku yɔɔ mɔm. Nŋui í nɛ bɛɛrɛ do gbugbã iyi ci ya tã. Ami.

¹⁷ Sɔ̃ ilu amani ŋa a maà ti a tɔɔ fufu, nɔ naanɛ nŋa ku maà wa si amani iyi á na ku tã, amma a jɔ̀ naanɛ nŋa ku wa si Ilaaɔ̃, nŋu iyi wa mu nwa fei ndɛɛ do inɔ akã ku ba ka wɛɛò inɔ didɔ̃.

¹⁸ Sɔ̃ ŋa a ce mii iyi í sĩa, a jɛ ilu amani si jiida ku ce, nɔ a ya kpɛ̃a inɛ ŋa amani nŋa do inɔ didɔ̃.

¹⁹ Bɛɛbɛi aa singaa ara nŋa amani jiidai ala iyi kaa bɛjɛ nɔ a ba kuwɛɛ iyi í jɛ kuwɛɛ do ntɔ.

²⁰ Timɔtee, ide iyi à daɛ si awɔu, muu ku sĩa. Fa araɛ hai si ide nfe nfei andunya. Maà ce kakɔɔ do inɛ ŋa iyi à waa tamaa aŋa à nɛ kumà.

²¹ Kumàui inɛ gɔ ŋa à waa ni aŋa à nɛ, nŋui í jɔ̀ à nyɔ hai si kpãai naanɛ ku dasi. Didɔ̃i Ilaaɔ̃ ku wɛɛ do iŋɛ fei.