Timɔtee 1, 5 - Bibeli do fee

Isɛɛnɛi woo dasi naanɛ ŋa aŋa duusɔ̃ɔ

¹ Maà ya fɔ si mɔkɔ ngbo ŋa ide do gbugbã, amma jɔ̀ i ba ŋa ide ku fɔ kpɛlɛ kpɛlɛ bɛi baai awɔ takaɛ. Nɔ i cea awaasũ ŋa bɛi ifɔɛ ŋa,

² abo ngbo ŋa mɔ bɛi iyeɛ ŋa, nɔ inaabo saatara ŋa mɔ i ce nŋa bɛi wecĩɛ ŋa, daaɛ fei ku má bi tu ŋa.

³ Gbɔa jaaɔ̃ ŋa nɔ i mà bɛɛrɛ nŋa, aŋa iyi à jɛ jaaɔ̃ do ntɔ.

⁴ Bii jaaɔ̃ gɔ í nɛ amu ŋa walakɔ tɔku ŋa, í sĩa amaɛ ŋau a woo bɛi nŋu mɔ í tako í ce nŋa. Bii à waa ce bɛɛbɛ à waa cea Ilaaɔ̃ icɛi, nɔ nŋui á dɔ̃a Ilaaɔ̃ si.

⁵ Inaabo iyi í jɛ jaaɔ̃ do ntɔ nɔ kù nɛ inɛ gɔ iyi á woo, kpãa ku cɔɛ fei si Ilaaɔ̃i í ya wa nɔ í ya maa ce kutɔɔ ku maa tɔɔ sobiɛ dasãò idũ.

⁶ Amma jaaɔ̃ iyi wa jɛ andunyaɛ do faayi í yɛ bɛi iku baa bii í wɛɛ si hunde.

⁷ Ide ŋa iyi aa ya maa sɔ̃ ŋa mbɛ ku ba inɛ gɔ ku maà yɛ taale nŋa.

⁸ Inɛ iyi kù waa gbɔa nyaanzeɛ ŋa, iyi í re mɔm inɛi kpasɛ̃ɛ ŋa, lafɛ̃ɛ í kɔ̀si naanɛ ku dasii, nɔ laalɔ ku jɛɛ í re baa hai dasi Jesu naanɛ.

⁹ Maà ti i kɔ irii jaaɔ̃ gɔ si tia bii à ya kɔ irii jaaɔ̃ ŋa bii kù jɛ lafɛ̃ɛ í nɛ adɔ̃ kita, nɔ ku jɛ ilu mɔkɔ akã,

¹⁰ nɔ ku jɛ inɛ gɔ iyi à waa jɛ sɛɛdai icɛ jiidaɛ. Nɔ ku jɛ inaabo iyi í mà amu ŋa ku mu, nɔ ku jɛ inɛ gɔ iyi í ya yaaɛ inɛ njoo ŋa nɔ ku wiɛ kutɛi woo dasi Jesu naanɛ ŋa, nɔ ku ya sobi inɛ ŋa iyi à wa si wahala, nɔ ku jɛ inɛ gɔ iyi í ya ce icɛ jiida baa yooma fei.

¹¹ Amma maà ti i doo jaaɔ̃ saatara ŋa si inɔi jaaɔ̃ ŋa, domi waati iyi kubi á tale ŋa aa ce Kirisi atafii, aa bi a so mɔkɔ

¹² nɔ aa jɛ ilu taale ŋa si na iyi í jɔ̀ a kù ceò ide iyi à wãu icɛ.

¹³ Si anyiɛ nɔ aa nɛ ika a ya maa dabii dabii kpasɛ̃ do kpasɛ̃. Iyi í re mɔm, aa ya maa sɔ irii inɛ ŋa nɔ a ya maa gũ wɔbia nɔ aa jɛ woo sisi ide ŋa.

¹⁴ Na nŋu ŋau bɛi í jɔ̀ ǹ bi jaaɔ̃ saatara ŋa a so mɔkɔ a bí ama, nɔ a dasi kpasɛ̃ nŋa iju jiida, ku ba a maà na a mua mbɛɛ nwa ŋa kpãa a fɔ laalɔ nwa.

¹⁵ Ntɔ ntɔ jaaɔ̃ ŋau, gɔgɔ ŋa à yaa tã à waa too kpãai Seetam.

¹⁶ Amma bii inaabo woo dasi Jesu naanɛ gɔ í nɛ jaaɔ̃ ŋa si nyaanzeɛ, í sĩa ku sobi ŋa, ku maà ti ku kãa igbɛi inɛi Jesu ŋa asou ku ba igbɛu ku yɔkɔ ku sobi jaaɔ̃ ŋa iyi a kù nɛ inɛ gɔ.

¹⁷ Si anyii nŋu, inɛ ngboi igbɛ ŋau iyi à waa ce icɛ jiida, í sĩa i doo ŋa ilu bɛɛrɛ iyi à nɛ aranfãani nla nla. Iyi í re mɔm nŋui í jɛ inɛ ŋa iyi à waa ce kookaai si waazo do cio ku kɔsi.

¹⁸ Kukɔi idei Ilaaɔ̃ wa fɔ í ni, i maà ti i dĩ gɛlɛi kɛtɛ iyi wa jojo si bilee wa nya yɔyɔɛ. Nɔ wa fɔ má í ni, woo ce icɛ í nɛ kpãa ku gba fiaɛ.

¹⁹ Bii à naa à sɔ̃ɛ taale iyi inɛ ngboi igbɛ gɔ í ce, maà ti i jɛsi ideu, bii kù jɛ amanɛ minji walakɔ mɛɛta í jɛ sɛɛdaɛ.

²⁰ Inɛ ŋa iyi à waa ce dulum, sɔ̃ ŋa si wajui inɛi igbɛ ŋau fei ku ba inɛ ŋa iyi à gbe a ce njo.

²¹ Ǹ wa n tɔɔɛ si wajui Ilaaɔ̃ do Jesu Kirisi do si wajui amaleka kumáɛ ŋa, gbɔ idei kukɔsiu ihɛ̃, maà ti i ce njoi ijui inɛ gɔ. Nɔ i maà ti i ce ngɔgɔ na kubii kpaasi.

²² Maà ti i saasa i lea inɛ gɔ awɔ si iri ku ba i maà nɛ ikpɛ̃ si dulum dii inɛ gɔ. Fa araɛ hai si dulum.

²³ Maà ya mɔ inyi nŋu akã, amma i ya mɔ vɛ̃ɛ keeke na baanii inɔɛ si na iyi í jɔ̀ i ci ya fɛ bɔ̃ɔ.

²⁴ Dulum dii inɛ gɔ ŋa í ya fitai gbasasa a bɛi a kiiti ŋa. Amma ti inɛ gɔ ŋa í ya fitai do ankãanyi.

²⁵ Bɛɛbɛ mɔi icɛ jiida mɔ í ya fitai gbasasa, nɔ baa iyi kù fita a kù yɔɔ waati bɛɛbɛ, kaa manji do ajɔ fei.