Timɔtee 1, 4 - Bibeli do fee

Woo kɔsi cio ilu ibo ŋa

¹ Hundei Ilaaɔ̃ í fɔ dee dee í ni si awaatii ankãanyi inɛ gɔ ŋa aa jɔ̀ kpãai naanɛ ku dasi, a maa jirima idei woo dĩ ijui inɛ ŋa do kukɔsii Seetam.

² Dimii kukɔsi nŋu wa naai hai bi ilu muafiti ŋa do woo sɔ ibo ŋa. Inɛ ŋau à lele idɔ nŋa hee ci ya yɛ taale nŋa má.

³ Amanɛ dimi bɛɛbɛ ŋai à ya ni kù sĩa inɛ ŋa a so njɛ. Nɔ à ya nyi a ni má ijɛ gɔ ŋa à wɛɛ iyi kù sĩa inɛ ŋa a jɔɔ, baa do iyi ijɛ ŋau Ilaaɔ̃ í taka ŋai ku ba woo dasiɛ naanɛ ŋa iyi à mà ntɔu a ya jɔɔ do saabu.

⁴ Nkãma kù wa si iyi aa nyɔ, domi mii iyi Ilaaɔ̃ í taka fei mii jiidai, nɔ í sĩa ka gba fei ndɛɛ do saabu.

⁵ Ntɔ ntɔ, ijɛ fei í mái bii à waa ceò idei Ilaaɔ̃ icɛ nɔ à waa ce kutɔɔ.

Woo ce icɛ jiidai Jesu Kirisi*

⁶ Bii ì waa kɔa woo dasi Jesu naanɛ ŋa si bisiu ihɛ̃, aa jɛ woo ce icɛ jiidai Jesu Kirisi, nɔ naanɛ ku dasi do idei kukɔsi jiida iyi ì waa too si á yɛi bɛi ijɛ iyi ì waa na hundeɛ.

⁷ Amma kɔ̀si ará hai nɛ yaase ŋa iyi a kù waa too si idei Ilaaɔ̃. Hanya i ce kuwɛɛɛ si bɛi á dɔ̃a Ilaaɔ̃ si.

⁸ Ntɔi, icɛi ara aranfãaniɛ kù la, amma idei Ilaaɔ̃ ku leekĩ si í nɛ aranfãani si mii fei, domi si bɛi à nɛ kuwɛɛi nsɛi do ti ala.

⁹ Ide iyi à fɔu bɛ ide ilu naanɛi iyi í jɔ inɛ fei ku yɔ awɔ ku gba mam mam.

¹⁰ Na ŋɔi í ce à jabu à waa ceò icɛ, domi kpãa ku cɔ nwa si Ilaaɔ̃i í wa, nŋu iyi í jɛ icui kuwɛɛ, nɔ í jɛ woo faabai inɛ fei, woo dasi Jesu naanɛ ŋa mɔm nii à re.

¹¹ Sɔ̃ ŋa a jirima mii ŋau ihɛ̃ nɔ i kɔ nŋa si cioɛ.

¹² Maà ti i jɔ̀ a dondaɛ na awaasũ ku jɛɛ, amma jɔ̀ i nyisi woo dasi Jesu naanɛ ŋa yaase jiida si ide ku fɔɛ, do kuceɛ, do kubiɛ, do naanɛ ku dasiɛ, do dee dee ku jɛɛ.

¹³ Hee n maa n to wa, hanya i maa ka kukɔi idei Ilaaɔ̃ si zamaa, nɔ i kɔ inɛ ŋa si, nɔ i ce waazoɛ.

¹⁴ Maà ti i ce atafii si amua iyi í wa siɛ, iyi Hundei Ilaaɔ̃ í muuɛ si waati iyi à ce walii na iriɛ nɔ inɛ ngboi igbɛi Jesu ŋa à leɛ awɔ si iri.

¹⁵ Laakaiɛ fei ku wa si ideu ihɛ̃, nɔ i naa araɛ mam mam ku ba inɛ fei ku yɛ waju ku bɔɛ.

¹⁶ Ce laakai do bɛi ì waa jɛ kuwɛɛɛ do cio iyi ì waa kɔ si nɔ i ya maa temua si. Bii ì waa ce bɛɛbɛ, aa ba faaba, awɔ do inɛ ŋa iyi à waa gbɔ ideɛ.