Kɔrɛnti 1, 9 - Bibeli do fee

Kpãai mii iyi woo bɛ í nɛ do icɛ iyi í nɛ ku ce

¹ N kù nɛ aram nii? N kù jɛ woo bɛi? N kù yɛ Jesu Lafɛ̃ɛ nwai? I kù jɛ isoi icɛm iyi ǹ cea Lafɛ̃ɛ ŋai?

² Baa bii inɛ gɔ ŋa à kɔ̀ ku màm bɛi woo bɛ, ǹ jɛ woo bɛ bi tu ŋɛ, domi iŋɛi ì jɛ sɛɛda iyi wa nyisi iyi amu woo bɛi Lafɛ̃ɛi ntɔ ntɔ.

³ Inɛ ŋa iyi à waa wusɛm, ide iyi an jɛ nŋa wee.

⁴ A kù nɛ kpãa ka jɛ nɔ ka mɔi?

⁵ A kù nɛ kpãa ka nɛ abo woo dasi Jesu naanɛ iyi á si wa bɛi woo bɛ gɔ ŋa à waa cei? Bɛi ifɔi Lafɛ̃ɛ ŋau do Piɛɛ?

⁶ Mà amu do Baanabasi awa akãi a kù nɛ kpãai a ya na wa ijɛ, í gbe ka ce icɛ?

⁷ Inɛ kãma kaa bɔ ikoi igũ do fiai nŋu takaɛ. Inɛ kãma kaa lɔ jĩi ndii rezɛ̃ɛ iyi kù jɛ isoɛ. Nɔ inɛ kãma kaa maa degbe mɛɛmu gaa iyi kù waa mɔ amɔɛ.

⁸ Kù jɛ do bisii amanɛ nŋu akãi ǹ wa n fɔò ideu ihɛ̃. Ide akãui do iyi woodai Moizi wa fɔ.

⁹ Moizi í kɔ si tiai woodaɛu í ni, i maà ti i dĩ gɛlɛi kɛtɛ iyi wa jojo si bilee wa nya yɔyɔɛ. Na kɛtɛ ŋai Ilaaɔ̃ í fɔ iyi bɛ ba.

¹⁰ Mà na iri nwai wa fɔ ideu. Oo, na iri nwai à kɔɔ, domi í sĩa woo logoo do inɛ iyi wa kpokpo aŋa fei a maa cɔ kpãai ikpɛ̃ nŋa.

¹¹ Ide iyi à sɔ̃ ŋɛ í yɛi bɛi idei Hundei à gbɛ̃ nŋɛ. Debɛi, bii ì mu nwa sɔndai ara ŋa, aa jɔ̀ ku la nŋɛi?

¹² Bii inɛ gɔ ŋa à nɛ kpãaɛ bi tu ŋɛ, awa mɔ ni a kù re ŋa? Amma a kù ceò kpãau icɛ si ŋɛ. À temua si fei ndɛɛ ku ba ka maà ti ka dĩ kpãai laabaau jiidai Kirisi.

¹³ I kù mà ŋa iyi inɛ ŋa iyi à waa ce icɛ kpasɛ̃i Ilaaɔ̃, bɛi à ya ba ijɛ nŋa? Inɛ ŋa mɔ iyi à jɛ woo wee ŋa, si kuweeu bɛi à ya ba mii ku jɛ nŋa.

¹⁴ Bɛɛbɛ mɔi Lafɛ̃ɛ í jilɔɔ si inɛ ŋa iyi à waa sisi laabaau jiidau aŋa mɔ a ba ijɛ nŋa si bɛ.

¹⁵ Amma n kù ceò kãmaɛ icɛ. N kù nɔ n kù wa n kɔ iyi ihɛ̃ ku ba a ceem bɛɛbɛ. Ǹ gbasi n kú do iyi inɛ gɔ á ganjim fufu ku tɔɔ si gãmɛi ideu ihɛ̃.

¹⁶ N kù wa n tɔɔ fufu si na iyi í jɔ̀ ǹ wa n sisi laabaau jiida. Amma tilasii bi tom n coo. Nɔ ijuukpãi á jɛ titom bii n kù waazo ideu.

¹⁷ Bii do idɔɔbim nii ǹ wa n coo, ǹ nɛ kpãai n ba riba. Amma tilasi ǹ nɛ ku ceɛ mɔm nii domi Ilaaɔ̃i í dasim.

¹⁸ Debɛi, yoomai í jɛ ribam. Ribam nii í jɛ n waazo laabaau jiidai Kirisi, ku maà ti ku jɛ do idei fia nɔ n maà n ti n ce icɛ do kpãa iyi ǹ nɛ.

¹⁹ Ǹ nɛ aram, n kù jɛ arui inɛ kãma. Amma do nŋu fei ǹ ce aram arui inɛ fei ku ba n fa inɛ nkpɔ n naaò wa bi Kirisi.

²⁰ Bi Zuifu ŋa ǹ baa ǹ jɛ bɛi Zuifu, ku ba n fa ŋa wa. Inɛ ŋa mɔ iyi à waa jirima wooda ǹ jɛ inɛ akã nŋa ku ba n fa ŋa wa baa bii amu takam n kù wa si awɔi wooda.

²¹ Bi inɛ ŋa iyi a kù nɛ wooda ǹ jɛ inɛ akã nŋa ku ba n fa ŋa wa. Kù jɛ n kù wa n jirima woodai Ilaaɔ̃, domi ǹ wa n too woodai Kirisi.

²² Bi inɛ ŋa iyi a kù nɛ gbugbã amu mɔ n ce bɛi inɛ iyi kù nɛ gbugbã ku ba n fa ŋa wa. Ǹ ce bɛi inɛ fei í yɛ ku ba gɔgɔ nŋa ŋa a ba faaba, baa bii bɛirei.

²³ Ǹ wa n ce fei ndɛɛi ku ba kuwee iyi laabaau jiidau í nɛ n ba si ikpɛ̃.

²⁴ Iŋɛ fei ì mà ŋa si gaasai kusɛi inɛ feii í ya sɛi amma inɛ akãi í ya ba ribaɛ. Na nŋu, i hanya ku ba i ba ribaɛ ŋa.

²⁵ Woo ce gaasai kusɛi ŋa à ya maa mu ara nŋai si fei ndɛɛ. À waa ce bɛɛbɛi ku ba a ba fulai wua ŋa iyi aa gbɛ. Amma awa à waa cei ku ba ka ba iyi ci ya tã.

²⁶ Na ŋɔi í ce ǹ wa n sɛi bɛi inɛ iyi í nɛ mii iyi wa lele. Ǹ wa n jabu amma kù jɛ si ngbɛ.

²⁷ Ǹ wa n wahala aram ntɔ ntɔ ku ba n kãmiaɛ nɔ n maà n ti n jɛ inɛ iyi aa na a lele awɔ ngbɛ waati iyi ǹ cea inɛ ŋa waazo ǹ tã.