Kɔrɛnti 1, 8 - Bibeli do fee

Ijɛ iyi à ceò kuwee

¹ Nsɛi si idei mii iyi à ceò kuwee ǹ lɔ si. Ntɔi awa fei à nɛ kumà si bɛi ì fɔ ŋa. Kumà í ya jɔ̀ inɛ ku nɛ faaui, amma kubi í ya sobi inɛ.

² Bii inɛ gɔ í tamaa nŋu í mà ngɔgɔ, kù mà nkãma titã si bɛi í jɔ.

³ Amma inɛ iyi í bi Ilaaɔ̃, Ilaaɔ̃ í mà lafɛ̃ɛ.

⁴ Iyi í jɛ ti idei iŋai kuwee si bii ì waa bee mà í sĩa i ya ŋɔɔ ŋa. Awa à mà iyi iwɛ̃ kù jɛ ngɔgɔ si andunya. À nɔ à mà iyi Ilaaɔ̃ nŋu akãi í wɛɛ.

⁵ Ntɔ ntɔ, iwɛ̃ nkpɔ do lafɛ̃ɛ nkpɔi í wa lele do si ilɛ. Amma baa do iyi inɛ ŋa à waa tɔɔ iwɛ̃ nkpɔ nkpɔ fei,

⁶ bi tu wa Ilaaɔ̃ akãi í wɛɛ. Nŋui í jɛ Baaba nɔ nŋui í taka mii fei. Na iriɛi awa à nɔ à wɛɛ. Lafɛ̃ɛ akã mɔi í nɔ í wɛɛ. Nŋui í jɛ Jesu Kirisi, nɔ mii fei í wɛɛi na iriɛ. Do saabuɛi à nɛò kuwɛɛ.

⁷ Amma kù jɛ inɛ feii í mà iyi bɛ. Hee nsɛi inɛ gɔ ŋa iyi à tako à nɛ dɔ̃ɔnɛi iwɛ̃ ku tɔɔ à waa ŋɔ iŋau bɛi ijɛi kuwee, nɔ idɔ nŋa wa yɛ taale nŋa na gbugbã hai nɛ nŋa.

⁸ Kù jɛ ijɛi á bɔò wa bi Ilaaɔ̃. Bii à jɛ, kaa kɔ̃ɔ nwa si ngɔgɔ, bii a kù nɔ a kù jɛ, kaa jɔ̀ ka kua ngɔgɔ.

⁹ Amma i ce laakai ŋa ku ba ara ku nɛ nŋɛ ku maà dasi inɛ gɔ ŋa dulum.

¹⁰ Bii nsɛi, awɔ iyi ì nɛ kumà ì buba ì waa jɛ ilei iwɛ̃, inɛ iyi kù nɛ gbugbã, bii í yɛɛ bɛ, nŋu mɔ á nɛ wɔɔkɔ ku jɛ ijɛi kuweeui baa bii idɔɛ wa yɛò taaleɛ.

¹¹ Nɔ do saabui kumàɛ kpaasiɛu ku ce nfe, nŋu mɔ iyi Kirisi í ku na iriɛ.

¹² Bii ì waa ce kurara bɛɛbɛ si gãmɛi kpaasi hai nɛ gbugbã nŋɛ ŋa nɔ ì waa mɛɛ ŋa si idɔ nŋa ŋa, ì waa ce dulum ŋai si gãmɛi Kirisi takaɛ.

¹³ Na nŋu, bii iŋai á jɔ̀ kpaasim gɔ ku dasi kurara, n kaa n ŋɔ iŋa má ajɔ kãma ku ba n maà n dasiɛ kurara.