Kɔrɛnti 1, 7 - Bibeli do fee

Idei abɔdɔ̃

¹ Ide iyi ì kɔɔm wa si tia nŋɛ, nŋui ǹ wa n jɛ nŋɛ wa bɛbɛi. Í sĩa inɛmɔkɔ ku maà so abo.

² Amma na sakara í sĩa inɛ fei ku nɛ aboɛ, nɔ abo fei ku nɛ mɔkɔɛ.

³ Mɔkɔ í nɛ kú cea aboɛ mii iyi í jɔ a cea abo fei, nɔ abo mɔ ku cea mɔkɔɛ mii iyi í jɔ ku cea mɔkɔ fei.

⁴ Abo kaa yɔkɔ ku ce bɛi í bi do araɛ, domi araɛu ti mɔkɔɛi. Bɛɛbɛi mɔkɔ mɔ kaa yɔkɔ ku ceò araɛ bɛi í bi, domi nŋu mɔ araɛ ti aboɛi.

⁵ I maà ya kɔ̀ ku sũò njɛ ŋa bii kù jɛ iŋɛ minji feii ì gbɔsi njɛ ì yɔɔ ŋa iyi á sĩa i jɔ̀ɔ titã ŋa si waati keeke ku ba i na ara nŋɛ i ce kutɔɔ ŋa. Nɔ si anyiɛ i tɔtɔɔ má ŋa. Bii kù jɛ bɛɛbɛ á yɔkɔ ku jɛ i kaa na i yɔkɔ i mu ara nŋɛ nɔ Seetam á na ku lɛlɛ ŋɛ.

⁶ N kù wa n fɔ iyi ihɛ̃ bɛi tilasi, amu de ǹ wa n tɔɔ ŋɛi.

⁷ Á sĩaam si bii inɛ fei í wɛɛ kaafe bɛi amu takam, amma Ilaaɔ̃ í cea inɛ fei amuaɛi, ti inɛ ihɛ̃ ikã, ti inɛ ihɔ̃ mɔ ikã.

⁸ Amma ǹ wa n sɔ̃ kaafe ŋa do jaaɔ̃ ŋa á sĩa a maa wɛɛ nŋa kaafe bɛi ǹ wɛɛ.

⁹ Amma bii a kaa yɔkɔ a mu ara nŋa, a dɛdɛ njɛ a so njɛ, domi í sĩa a so njɛ do iyi aa maa wɛɛò binɛɛ ntɔ ntɔ.

^10-11 Nsɛi, inɛ ŋa iyi à so njɛ tã aŋai ǹ wa n sɔ̃ woodau ihɛ̃. Abo ku maà kɔ̀ mɔkɔɛ. Amma bii abo í ce bɛɛbɛ, ku buba ku maà so mɔkɔ mmu, walakɔ ku nyi bi mɔkɔ nwoɛu. Mɔkɔ mɔ ku maà kɔ̀si aboɛ. Kù jɛ amui ǹ wa n na ŋɛ woodau ihɛ̃, Lafɛ̃ɛi wa na ŋɛ.

¹² Inɛ ŋa iyi à gbe aŋa mɔi ǹ wa n sɔ̃ iyi ihɛ̃, kù jɛ Lafɛ̃ɛi í fɔɔ. Bii woo dasi Jesu naanɛ gɔ í nɛ abo, nɔ abou kù jɛ woo dasi naanɛ, bii abou í jɛsi aŋa a maa wɛɛ, ku maà kɔ̀siɛ.

¹³ Bii abo gɔ mɔ í nɛ mɔkɔ nɔ mɔkɔu kù jɛ woo dasi Jesu naanɛ, bii í sĩaa mɔkɔu si aŋa a maa wɛɛ, ku maà kɔ̀siɛ.

¹⁴ Ǹ ni bɛɛbɛi domi Ilaaɔ̃ á yɔkɔ ku cica mɔkɔ hai dasi Jesu naanɛu na aboɛ. Bɛɛbɛ mɔi Ilaaɔ̃ á yɔkɔ ku cica abo hai dasi naanɛu na mɔkɔɛ. Nɔ á yɔkɔ ku cica ama nŋa ŋa mɔ. Bii kù jɛ bɛɛbɛ, amu ŋau, hai dasi naanɛ ŋai aa jɛ.

¹⁵ Amma hai dasi Jesu naanɛu, bii í nɛ, jɔ̀ɛ ku koo. Kù jɛ tilasi i maa wɛɛò njɛ ŋa domi Ilaaɔ̃ í kpe wai ka wɛɛò laakai ku sũ.

¹⁶ Amma bii hai dasi Jesu naanɛu í jɛsi i maa wɛɛ do njɛ ŋa í sĩa, domi awɔ abo i kù mà bii í jɛ mɔkɔɛ á na ku ba faaba na iriɛ. Nɔ awɔ mɔ mɔkɔ i kù mà bii í jɛ aboɛ á na ku ba faaba na iriɛ.

I wɛɛ bɛi ì tako ì yɛ ŋa Ilaaɔ̃ í bɛi í kpe ŋɛ

¹⁷ Aɔ̃ Lafɛ̃ɛ í jilɛa inɛ fei tengi bii á nɛ si kuwɛɛɛ. Na nŋu, baai idei njɛ ku so do hai dasi naanɛ ŋa baasi, í sĩa inɛ fei ku máa nɛ si kpãai kuwɛɛ bii í tako í wa wo Ilaaɔ̃ í bɛi í kpoo. Iyi ǹ jilɛa igbɛi inɛi Jesu ŋa bii fei mbɛ.

¹⁸ Bii à dasi inɛ bango Ilaaɔ̃ í bɛi í kpooi, lafɛ̃ɛ ku wɛɛ bɛɛbɛ. Inɛ mɔ iyi a kù dasiɛ bango Ilaaɔ̃ í bɛi í kpoo, lafɛ̃ɛ ku maà dɛ a dasiɛ bango má.

¹⁹ Bii à dasi inɛ bango walakɔ bii a kù dasiɛ, kãmaɛ kù jɛ taale, amma woodai Ilaaɔ̃ ku jirimai í sĩa.

²⁰ Inɛ fei ku leekĩ si bɛi í wɛɛ í bɛi í gbɔò kukpei Ilaaɔ̃.

²¹ Ì jɛ aru wo waati iyi Ilaaɔ̃ í kpeɛi? Maà ti i jɔ̀ inɔɛ ku fɔ. Amma bii ì na ì ba kpãa gɔ iyi aa nɛò araɛ, bɛɛgɛ si bɛ gbakã.

²² Aru iyi Aɔ̃ Lafɛ̃ɛ í kpe í baa í jɛ inɛ iyi í nɛ araɛi na saabui Lafɛ̃ɛ. Bɛɛbɛ mɔi inɛ iyi í nɛ araɛ iyi Aɔ̃ Lafɛ̃ɛ í kpoo, lafɛ̃ɛ í baa í jɛ arui Kirisi.

²³ À ya ŋɛi do fia. Na nŋu, i maà jɔ̀ i baa i jɛ arui inɛ ŋa má ŋa.

²⁴ Iŋɛ inɛm ŋa, i jɔ̀ inɛ baa yooma fei ku leekĩ si wajui Ilaaɔ̃ si bɛi í wɛɛ wo Ilaaɔ̃ í bɛi í kpoo.

Idei kaafe ŋa do jaaɔ̃ ŋa

²⁵ Nsɛi, iyi í jɛ ti inɛ ŋa iyi a kù tɔtɔɔ sɛ̃ɛ do inɛ gɔ titã, n kù nɛ ide gɔ iyi í jɛ woodai Lafɛ̃ɛ. Amma si bɛi Lafɛ̃ɛ í ce araarem ǹ jɛò ilu naanɛ, ǹ wa n sɔ̃ ŋɛ iyi í jɛ lasabum.

²⁶ Ǹ tamaa na wahalai waatiu ihɛ̃ á sĩa inɛ fei ku wɛɛ bɛi í wɛɛ nsɛi.

²⁷ Bii ì nɛ abo, maà dɛ kpãa i fɛɛfɛ njɛ ŋa. Bii ì nɔ ì wɛɛ kaafe, maà dɛ abo.

²⁸ Amma do nŋu fei bii ì so abo i kù ce dulum. Bii mudɛ̃ɛ mɔ í so mɔkɔ, kù ce dulum. Amma inɛ ŋa iyi à so njɛ, asoi andunya nŋai à kɔ̃ɔsi, nɔ n kù bi i nɛ aso dimi bɛɛbɛ ŋa.

²⁹ Inɛm ŋa, iyi ǹ wa n fɔ wee. Waatiu kù sɔ má. Na nŋu, hai nsɛi inɛ iyi í nɛ abo, í sĩa ku yɛ bɛi inɛ iyi kù nɛ abo.

³⁰ Nɔ inɛ iyi wa kpata ku ce bɛi inɛ iyi kù nɛ inɔ kufɔ. Inɛ mɔ iyi wa nyaanyi ku ce bɛi inɛ iyi kù nɛ inɔ didɔ̃. Inɛ mɔ iyi wa ra ngɔgɔ, ku ce bɛi kù jɛ titɛɛ.

³¹ Inɛ iyi amanii andunya wa bukaataa ku maà dasi laakaiɛ fei si bɛ. Ǹ wa n fɔ bɛɛbɛi si na iyi í jɔ̀ yaase bɛi andunyau ihɛ̃ í yɛ kaa kpɛ jiida má.

³² N kù bi nkãma ku maa bitandi ŋɛ. Inɛ iyi kù so abo, laakaiɛ fei si icɛi Lafɛ̃ɛi í ya wa, í ya maa dɛ nŋu ku ce iyi á dɔ̃a Lafɛ̃ɛ si.

³³ Amma inɛ iyi í nɛ abo, lasabuɛ si mii ndii andunya ŋai í ya wa. Mii iyi á dɔ̃a aboɛ sii í ya maa dɛ ku ce.

³⁴ Laakaiɛ ci ya jɛ akã. Inaabo ŋa iyi a kù nɛ mɔkɔ do mudɛ̃ɛ ŋa lasabu nŋa si idei Lafɛ̃ɛi í ya wa ku ba a jɛ dee dee si ara do si hunde. Amma inɛ iyi í nɛ mɔkɔ lasabuɛ si mii ndii andunya ŋai í ya wa. Mii iyi á dɔ̃a mɔkɔɛ sii í ya maa dɛ ku ce.

³⁵ Na aranfãani nŋɛi ǹ wa n fɔ iyi ihɛ̃, kù jɛ na n dasi ŋɛ wahala, amma na n nyisi ŋɛ iyi í sĩa i ce ŋai ku ba i na Lafɛ̃ɛ ara nŋɛ mam mam.

³⁶ Bii inɛ gɔ í yɛ ama inaaboɛ í jĩa í to abɔdɔ̃ nɔ í yɛ kù sĩa ku maa wɛɛ kaafe, nɔ í bi a gbaa abɔdɔ̃, kú ce bɛi í bi. Bii í ni a gbaa abɔdɔ̃ kù ce dulum.

³⁷ Amma inɛ iyi í dasi idɔ dim dim bii kù jɛ do tilasi gɔ, bii í jilɔɔ si ama inaaboi nŋu ku maà so mɔkɔ, mii jiidai í lasabu.

³⁸ Bɛɛbɛ mɔi inɛ iyi í jɔ̀ à gba ama inaaboɛ abɔdɔ̃ mii jiidai í ce, amma inɛ iyi í kɔ̀ a gba titɛɛ abɔdɔ̃ nŋui í ce í re.

³⁹ À dĩ aboi si mɔkɔɛ bii mɔkɔɛ í wɛɛ si hunde, amma bii mɔkɔu í ku, abou í nɛ araɛ ku so mɔkɔ titɔ̃ iyi í bi, lafɛ̃ɛ de kú jɛ woo dasi Jesu naanɛ.

⁴⁰ Amma si lasabum, bii abou kù so mɔkɔ má, inɔ didɔ̃ɛ á la ku re. Nɔ ǹ tamaa Hundei Ilaaɔ̃i í sɔ̃m ideu ihɛ̃.