Kɔrɛnti 1, 6 - Bibeli do fee

I maà ya kpe njɛ kiiti bi inɛi andunya ŋa

¹ Bii kpaasi woo dasi naanɛ gɔ í ce nŋɛ kurara, bɛirei aa ce i dale inɛi igbɛ nŋɛ ŋa nɔ i kpoo kiiti bi hai dasi naanɛ ŋa.

² I kù mà ŋa iyi woo dasi naanɛ ŋai aa na a kiiti inɛi andunya ŋa? Nɔ bii iŋɛi aa kiiti inɛi andunya ŋa, debɛi i kaa yɔkɔ i kiiti baa ide keeke ŋa?

³ I kù mà ŋa iyi awai aa ka kiiti amaleka ŋau? Aa na i fɔ idei andunyau ihɛ̃ má?

⁴ Na nŋu, bii kpaasiɛ í ceɛ kurara, kù sĩa i jɔ̀ hai dasi Jesu naanɛ gɔ ku kiiti nŋɛ, nŋu iyi kù nɛ baa gɔ si igbɛi Jesu.

⁵ Ǹ kɔ nŋɛ iyi ihɛ̃ wai anyɔ ku ba ku mu ŋɛ. Ntɔ ntɔ, inɛ gɔ kù wa si anini nŋɛ iyi laakaiɛ í to ku kiiti kpaasiɛ ŋai?

⁶ Na mii í ce ì waa kpe njɛ kiiti bi hai dasi Jesu naanɛ ŋa.

⁷ Bii ì waa bɔò njɛ bi ku ce kiiti ŋa, wa nyisi mɔngɔ nŋɛi mam mam. Na mii í ce i ci ya yɔkɔ i tɛ idɔ ŋa bii à rara nŋɛ. Na mii í ce i ci ya jɛ a takii ŋɛ.

⁸ Amma iŋɛ taka nŋɛi ì ya maa raraa inɛ gɔ ŋa, kpaasi woo dasi Jesu naanɛ ŋa mɔm nii ì ya maa takii ŋa.

⁹ Iŋɛ, i kù mà ŋa iyi woo ce laalɔ ŋa a kaa ba tubu si bommai Ilaaɔ̃? I maà jɔ̀ a dĩ iju nŋɛ. Woo ce adɛi abo yaamɔ do woo tɔɔ iwɛ̃ ŋa do woo ce sakara ŋa do inɛ ŋa iyi à waa sũò inɛmɔkɔ kpaasi ŋa

¹⁰ do ile ŋa do ilu binɛ ŋa do woo mɔ atɛ̃ hee ku caa ŋa do woo yaako inɛ ŋa do woo jɛ inɛ takii ŋa a kaa ba tubu si bommai Ilaaɔ̃.

¹¹ Bɛɛbɛi inɛ gɔ nŋɛ ŋa à yɛ wo. Amma à wɛ ŋɛ, nɔ à jɔ̀ ì má ŋa, nɔ ì jɛ dee dee ŋa na saabui irii Lafɛ̃ɛ nwa Jesu Kirisi do Hundei Ilaaɔ̃.

I jɔ̀ kucei ara nŋɛ ku na Ilaaɔ̃ amboe

¹² Inɛ gɔ nŋɛ ŋa à ya ni, ǹ nɛ kpãai n ce mii fei. Ntɔi, amma fei ndɛɛ si á sĩa nŋɛ. An yɔkɔ n ni, ǹ nɛ kpãai mii fei ku ce, amma n kaa n jɔ̀ n jɛ arui nkãma.

¹³ Ì ya nyi i ni ŋa, ijɛ í wɛɛi na inɔ, nɔ inɔ mɔ í wɛɛi na ijɛ. Ntɔi, amma do nŋu fei Ilaaɔ̃ á na ku kpa irii mii minji ŋau bɛ fei. Amma i ce laakai ŋa, ara kù wɛɛ na abo kaafe ŋa ku sũò. Í wɛɛi na Lafɛ̃ɛ nɔ Lafɛ̃ɛ mɔ í wɛɛi na iriɛ.

¹⁴ Ilaaɔ̃, nŋu iyi í jĩ Lafɛ̃ɛ hai si balɛ á jĩ awa mɔ do gbugbãɛ.

¹⁵ Iŋɛ i kù mà ŋa iyi ara nŋɛ í yɛi bɛi ikɔ̃ ikɔ̃i arai Kirisi? Debɛi, aa so ikɔ̃i arai Kirisi i jɔ̀ ku tɔtɔɔò abo à ta icu a jɛ akã ŋa? Aawo, kaa ce.

¹⁶ Mà i kù mà ŋa inɛ iyi wa tɔtɔɔ do abo à ta icu, aŋaò à baa à jɛ ara akãi? Si kukɔi idei Ilaaɔ̃ à ni, aŋa minjiu fei aa na a jɛ ara akã.

¹⁷ Bɛɛbɛ mɔi inɛ iyi í tɔtɔɔ do Lafɛ̃ɛ aŋaò à baa à nɛ lasabu akã.

¹⁸ I saa adɛi abo ŋa. Kurara iyi amanɛ wa ce fei ci ya má si araɛ, amma inɛ iyi wa ce adɛi abo, arai nŋu takaɛi wa dasi kurara.

¹⁹ Mà i kù mà ŋa iyi ara nŋɛi í jɛ bi kuwai Hundei Ilaaɔ̃ iyi í wa si ŋɛ iyi Ilaaɔ̃ í mu nŋɛ? I kù nɛ ara nŋɛ

²⁰ domi à ya ŋɛi do fia. Na nŋu, i jɔ̀ kucei ara nŋɛ ku jɔ̀ inɛ ŋa a mà bɛɛrɛi Ilaaɔ̃.