Kɔrɛnti 1, 5 - Bibeli do fee

Inɛi igbɛi Jesu gɔ í ce sakara

¹ À waa gbɔ bii fei à ni inɛ akã nŋɛ gɔ wa ce sakara iyi baa hai dasi Jesu naanɛ ŋa a kaa yɔkɔ a coo. À ni inɛ akã nŋɛ í ya maa sũò aboi baaɛ.

² Nɔ do nŋu fei ì waa tɔɔ fufu ŋa. Á sĩai wo i nɛ inɔ kufɔ ŋa, nɔ i nya lafɛ̃ɛ hai inɔ nŋɛ.

³ Amu, baa do iyi n kù wa bi tu ŋɛ do ara, lasabum í wa bɛ. Na nŋu, inɛ iyi í ce kurarau bɛ, ǹ yɛ taalei lafɛ̃ɛ tã do yaase bɛi an yɛ taaleɛ bii ǹ wa bɛ.

⁴ Ǹ wa n sɔ̃ ŋɛi i ceaa kutɔtɔɔ nɔ lasabum á wa bi tu ŋɛ nɔ gbugbãi Lafɛ̃ɛ nwa Jesu á wɛɛ do iŋɛ. Ǹ wa n tɔɔ ŋɛ do irii Jesu,

⁵ i so inɛɛu i daa Seetam si awɔ, ku kpãa iju ku ba hundeɛ ku ba faaba si ajɔi Lafɛ̃ɛ Jesu.

⁶ Dimii fufu ku tɔɔ nŋɛu kù sĩa. I kù mà ŋa, levɛ̃ɛ keekei í ya dede iyafũi pɛ̃ɛ fei?

⁷ Ntɔ ntɔ, à kpa Kirisi tã, nŋu iyi í jɛ bɛi ama angudãi jingaui Iku ku kua nwa. Na nŋu, í sĩa nsɛi i nya levɛ̃ɛ nwo hai si kuwɛɛ nŋɛ ku ba i yɛ bɛi pɛ̃ɛ titɔ̃ iyi kù nɛ levɛ̃ɛ, si bɛi ì yɛ tã ŋa.

⁸ Debɛi, ka maà jɛ jingauu do laalɔ do inɔ sãmi iyi í yɛ bɛi levɛ̃ɛ nwo, amma ka jɔɔ do pɛ̃ɛ hai nɛ levɛ̃ɛ. Pɛ̃ɛ hai nɛ levɛ̃ɛui í jɛ ntɔ do idɔ kumá.

⁹ Si tia iyi ǹ tako ǹ ce nŋɛ wo ǹ ni i maà tɔtɔɔ do woo ce sakara ŋa.

¹⁰ Amma bii ǹ ni i maà tɔtɔɔ do woo ce sakara ŋa walakɔ do ilu binɛ ŋa do ile ŋa do woo tɔɔ iwɛ̃ ŋa, kù jɛ hai dasi Jesu naanɛ ŋai ǹ wa n fãa, domi bii bɛɛbɛi tilasii i fita hai si andunya ŋa.

¹¹ Ǹ ni i maà tɔtɔɔ do inɛ iyi wa kpe araɛ woo dasi Jesu naanɛ nɔ wa ce sakara, walakɔ binɛ, walakɔ iwɛ̃ ku tɔɔ, walakɔ inɛ ku bu, walakɔ í ya mɔ atɛ̃ hee ku kpaa, walakɔ í ya takii inɛ ŋa. Iŋɛò inɛ dimi bɛɛbɛ ŋa i maà ya tɔtɔɔ i jɛ ŋa mɔm.

^12-13 Amu n kù nɛ kpãa n kiiti hai dasi Jesu naanɛ ŋa. Ilaaɔ̃i á kiiti ŋa. Amma í sĩa i kiiti inɛi igbɛ nŋɛ ŋa. Debɛi, i nya inɛ laalɔ hai si anini nŋɛ si bɛi kukɔi idei Ilaaɔ̃ wa fɔ.