Kɔrɛnti 1, 4 - Bibeli do fee

Woo bɛi Kirisi* ŋa

¹ Í sĩa i doo wa bɛi woo ce icɛi Kirisi ŋa iyi Ilaaɔ̃ í so idei asiiɛ í daa si awɔ.

² Í sĩa inɛ ŋa iyi à nɔ à daa mii ŋau si awɔ a jɛ ilu naanɛ ŋa.

³ Si kuyɛm kù jɛɛm taale bii ì waa kiitim ŋa, walakɔ bii à waa kiitim si wajui amanɛ ŋa. Amu takam, n ci ya kiiti aram.

⁴ Do ntɔ, idɔm kù waa yɛ taalem, amma kù jɛ iyi bɛi wa nyisi iyi ǹ jɛ dee dee do ntɔ. Lafɛ̃ɛi á kiitim.

⁵ Na nŋu, i maà kiiti inɛ kãma hai waati iyi Ilaaɔ̃ í jilɛu kù to. I degbe ajɔ iyi Lafɛ̃ɛ á nyi wa ŋa. Mii iyi wa manji si ilu kuku fei á jɔ̀ ku fita bantuma, nɔ ku jɔ̀ a mà lasabui idɔi amanɛ ŋa. Waati bɛɛbɛi, inɛ fei á gbɔ saabu iyi í jɛ tɛɛ hai bi Ilaaɔ̃.

⁶ Iŋɛ kpaasim ŋa, ǹ so idei amu do Apolou ihɛ̃i ku ba n na ŋɛ ikɔ. Ǹ bi yaase nwa ku nyisi ŋɛ bɛi aa ce i leekĩ si kukɔi idei Ilaaɔ̃ ŋa. Inɛ kãma nŋɛ ku maà tɔɔò inɛ gɔ fufu nɔ ku jɔ̀ inɛ gɔ.

⁷ Ì tamaa ì tia inɛ gɔ ŋai? Mii ì nɛ ŋa iyi Ilaaɔ̃ kù mu nŋɛ. Mà i kù mà ŋa iyi nŋui í mu nŋɛ fei ndɛɛ. To, na mii í ce ì waa tɔɔ fufu ŋa bɛi inɛ ŋa iyi à ba do ara nŋa.

⁸ Ì waa ce bɛi inɛ ŋa iyi à nɛ mii iyi à bi fei tã ŋa, bɛi inɛ ŋa iyi à jɛ ilu amani tã. Ì waa ce má bɛi inɛ ŋa iyi à jɛ bomma nɔ awa a kù wa si. Á sĩa bii ì jɛ bomma do ntɔ ŋa awaɛ ŋa fei ka buba si bommau ajɔ.

⁹ Amma si kuyɛm, Ilaaɔ̃ í jilɛ awa woo bɛ ŋaui bɛi inɛi anyi ŋa. À jɛ bɛi inɛ ŋa iyi à yɛ taale nŋa ku ba a kpa ŋa. Í jɔ̀ à jɛ inɛ ŋa iyi inɛ baa yooma fei wa cɔ, hai amaleka ŋa hee do amanɛ ŋa fei.

¹⁰ Awa à waa cɔ wa bɛi sũmu ŋa na irii Kirisi, amma iŋɛ ì waa cɔ ara nŋɛ ilu bisi ŋa na anu akã nŋɛ do Kirisi. Awa a kù nɛ gbugbã, amma iŋɛ ì waa cɔ ara nŋɛ bɛi ilu gbugbã ŋa. Iŋɛ ì jɛ ilu bɛɛrɛ ŋa amma awa à jɛ hai nɛ bɛɛrɛ ŋa.

¹¹ Hee í koo í toò waatiu ihɛ̃ ari wa kpa wai, nɔ agbɛ wa kpa wa. Jĩnɛ ku dasi wa gaizia wa, à ya maa cã wa, a kù nɛ bi kuwa dee dee má.

¹² Nɔ do gbɛɛjii à ya ka maa ceò icɛ iyi aa ka baò mii ku jɛ. Bii à waa bu wa, à ya ka maa wee nŋai. Bii à waa kpã wa iju, à ya ka maa temuai.

¹³ Baa bii à waa má wa ide, à ya ka jɛi do ide didɔ̃. Hee nsɛi à ya maa cɔ wai bɛi gaawɔi caka do bɛi iri ankitã.

¹⁴ Kù jɛ ǹ wa n kɔ iyi ihɛ̃ ku ba n dasi ŋɛ anyɔ. Amma ǹ wa n fɔ si ŋɛ idei bɛi amam ŋa iyi ǹ bi ku ba i ce laakai ŋa.

¹⁵ Baa bii woo kɔsi cio nŋɛ ŋa si kpãai Kirisi a kù nɛ jia, do nŋu fei baa akãi ì nɛ ŋa. Ntɔ ntɔ amui ǹ jɛ baa nŋɛ si kpãai Jesu Kirisi si na iyi í jɔ̀ amui ǹ sisi nŋɛ laabaau jiidau.

¹⁶ Na nŋu, ǹ wa n tɔɔ ŋɛ i ya too si kucem ŋa.

¹⁷ Ŋɔi í jɔ̀ ǹ bɛ si ŋɛ Timɔtee wa, nŋu iyi í jɛ amam si kpãai Lafɛ̃ɛ. Í jɛ ilu naanɛ nɔ ǹ buu jiida. Nŋui á ye ŋɛ gigi bɛi isɛɛnɛm í yɛ si kpãai Kirisi si bɛi ǹ wa n kɔ inɛ ŋa si bii fei si igbɛi inɛi Jesu ŋa fei.

¹⁸ Wee nsɛi inɛ gɔ ŋa à waa tamaa bɛi n kaa n nyi wa bɛ mái, ŋɔi í jɔ̀ à waa so ara nŋa lele.

¹⁹ Amma bii í jɛ ti idɔɔbii Lafɛ̃ɛi, an nyi wa bi tu ŋɛ kaa kpɛ. Nɔ inɛ ŋa iyi à waa so ara nŋa lele, kù jɛ ide ku fɔ nŋa nŋu akãi an mà ajɔ nŋu, an mà bii í jɛ gbugbãi Ilaaɔ̃ í wa si ŋa do ntɔ.

²⁰ Ntɔ ntɔ, aa ka mà iyi inɛ gɔ í jɛsi Ilaaɔ̃ ku jɛ ilaaluɛi bii à yɛ gbugbãi Ilaaɔ̃ wa ce icɛ siɛ, kù jɛ si ide ku fɔɛ.

²¹ Yoomai ì bi ŋa. N naa si ŋɛ do golo? Mà do kubi do daa didɔ̃.