Kɔrɛnti 1, 3 - Bibeli do fee

Amaacɛi Ilaaɔ̃ ŋa

¹ Iŋɛ kpaasim ŋa, n kù yɔkɔ n kù ba ŋɛ ide ku fɔ bɛi ǹ ya n fɔ do inɛ ŋa iyi à waa too si idɔɔbii Hundei Ilaaɔ̃. Amma ǹ ba ŋɛ ide ku fɔi bɛi inɛ ŋa iyi à waa too si idɔɔbii ara, inɛ ŋa iyi à yɛ bɛi ama kpɔtɔɔ ŋa si kpãai Kirisi.

² Cio iyi ǹ kɔ ŋɛ si í yɛi bɛi amɔi ǹ na ŋɛ, kù jɛ ijɛ kili, domi i kù to inɛ ŋa iyi aa jɛ ijɛ kili ŋa. I kù to baa nsɛi ŋa

³ si na iyi í jɔ̀ ì waa too idɔɔbii ara titã ŋa. Ntɔ ntɔ, igu do kakɔɔ í wa si anini nŋɛ, nɔ iyi bɛ wa nyisi iyi ì waa too idɔɔbii ara nŋɛi. Isɛɛnɛ nŋɛ ŋa mɔ í yɛi bɛi ti inɛi andunya ŋa.

⁴ Bii inɛ gɔ nŋɛ wa ni ti Pɔlui nŋu í jɛ, nɔ inɛ gɔ mɔ wa ni ti Apoloi nŋu í jɛ, iŋɛ mɔ i kù tia inɛi andunya ŋa iyi à gbe ŋa.

⁵ Yooi í jɛ Apolo. Mà yooi í jɛ Pɔlu. Awa taka nwa mɔ amaacɛi Ilaaɔ̃ ŋai. Awa fei, icɛ iyi Lafɛ̃ɛ í dasi wai à waa ce, ku ba i dasi naanɛ ŋa do saabui icɛ nwa.

⁶ Iŋɛ ì yɛi bɛi ikoi Ilaaɔ̃ ŋa tengi bii à gbɛ̃ ideɛ. Amu ǹ yɛi bɛi inɛ iyi wa gbɛ̃, Apolo mɔ bɛi inɛ iyi wa fãsi inyi, amma Ilaaɔ̃i í jɔ̀ wa la.

⁷ Na nŋu, inɛ iyi wa gbɛ̃ do inɛ iyi wa fãsi inyi a kù jɛ ngɔgɔ, bii kù jɛ Ilaaɔ̃ iyi í jɔ̀ wa la.

⁸ Woo gbɛ̃ do woo mua inyi aŋa fei akãi, nɔ aŋa fei aa ba riba nŋai si bɛi icɛ nŋa í to.

⁹ Ntɔ ntɔ awa à waa ce icɛi do Ilaaɔ̃ ajɔ, nɔ iŋɛ ì yɛ ŋai bɛi ikoi Ilaaɔ̃. Iŋɛi ì yɛ má ŋa bɛi ile iyi Ilaaɔ̃ wa ma.

¹⁰ Amu mɔ, na saabui didɔ̃ iyi Ilaaɔ̃ í ceem, amui ǹ nyɔ icui ileu bɛi woo ma iyi í nɛ laakai. Nsɛi inɛ mmu gɔi wa ma si antaiɛ. Amma inɛ fei ku ce laakai si yaase bɛi wa ma si.

¹¹ Iyi í jɛ idei icui ileu, à nyɔɔ tã nɔ inɛ gɔ kaa yɔkɔ ku nyɔ mmuɛ gɔ má. Jesu Kirisii í nɔ í jɛ icui ileu.

¹² Nɔ inɛ ŋa iyi à waa ma si antaiɛu, ti inɛ gɔ ŋa í yɛi bɛi à waa ma do wura walakɔ do isɔ fũfũ walakɔ do dimii kuta ku daana gɔ ŋa. Ti inɛ gɔ ŋa mɔ í yɛi bɛi à waa ma do jĩi walakɔ do taka walakɔ do fɔfɔ.

¹³ Amma si ajɔi kiitiu Ilaaɔ̃ á jɔ̀ icɛi inɛ fei ku fita gbugbãa. Ajɔ nŋu bɛi á dasi icɛi inɛ fei si ina nɔ inaui á nyisi bɛi icɛi inɛ fei í yɛ.

¹⁴ Inɛ iyi kumaɛ kù jo á ba riba.

¹⁵ Amma inɛ iyi icɛɛ í jo nŋui á yɛ muse. Nŋu takaɛ á ba faaba, amma á yɛ bɛi inɛ iyi í cã ina í fitaò.

¹⁶ I kù mà ŋa iyi iŋɛi ì jɛ bi kuwai Ilaaɔ̃? I kù mà ŋa iyi Hundeɛ í wa si ŋɛi?

¹⁷ Na nŋu, bii inɛ gɔ í bɛjɛ bi kuwai Ilaaɔ̃, Ilaaɔ̃ mɔ á bɛjɛ lafɛ̃ɛ. Á ce bɛɛbɛi si na iyi í jɔ̀ bi kuwaɛ í má, iŋɛi ì nɔ ì jɛ bi kuwau.

¹⁸ Inɛ gɔ ku maà lɛlɛ araɛ. Inɛ gɔ nŋɛ iyi í tamaa nŋu í nɛ bisi si andunyau ihɛ̃ ku jɔ̀ ku jɛ nnyɛi ku ba ku yɔkɔ ku jɛ ilu bisi ntɔ ntɔ.

¹⁹ Í sĩa ku ce bɛɛbɛi domi bisii andunya í yɛi bɛi idei sũmu si kuyɛi Ilaaɔ̃. Kukɔi idei Ilaaɔ̃ takaɛ í ni, Ilaaɔ̃ í ya mu ilu bisi ŋai do idei bisi laalɔi aŋa taka nŋa.

²⁰ Kukɔi idei Ilaaɔ̃ í ni má, Aɔ̃ Lafɛ̃ɛ í mà iyi lasabui ilu bisi ŋa ngbɛi.

²¹ Mii fei tu ŋɛi. Na nŋu, inɛ gɔ ku maà tɔɔ fufu na amanɛ.

²² Hai Pɔlu do Apolo do Piɛɛ do andunya do kuwɛɛ do iku do iyi í wɛɛ nnyi do iyi wa naa ala, fei ndɛɛ tu ŋɛi.

²³ Iŋɛ mɔ ti Kirisii ì jɛ ŋa, Kirisi mɔ í jɛ ti Ilaaɔ̃.