Kɔrɛnti 1, 2 - Bibeli do fee

Waazo iyi Pɔlu í ce Kɔrɛnti wo

¹ Iŋɛ kpaasim ŋa, waati iyi ǹ naa bi tu ŋɛ n kù sisi idei Ilaaɔ̃ do bisi nla gɔ walakɔ do gɛlɛ didɔ̃ gɔ.

² N kù nɔ n kù dasi idɔ n sisi ide mmu gɔ si anini nŋɛ bii kù jɛ idei Jesu Kirisi iyi à kpakpa si jĩi ku gaau.

³ Nɔ waati iyi ǹ wa bi tu ŋɛu, do gbugbã hai nɛi do njo do kuyaya nla nla.

⁴ Si idem do si waazom n kù dɛdɛ n lɛlɛ ŋɛ do bisii amanɛ ŋa, amma ide ŋa iyi ǹ fɔ fei do gbugbãi Hundei Ilaaɔ̃i.

⁵ Ǹ ce bɛɛbɛi ku ba naanɛ ku dasi nŋɛ ku maà leekĩ si bisii inɛ ŋa, bii kù jɛ si gbugbãi Ilaaɔ̃.

Idei bisii Ilaaɔ̃

⁶ Do nŋu fei, idei bisi gɔi à waa sisia inɛ ŋa iyi à jĩa si naanɛ ku dasi nŋa. Amma kù jɛ bisii andunyau ihɛ̃ walakɔ bisii inɛ nla ŋau aŋa iyi à waa bɔ nfe ku ce.

⁷ Aawo, bisii asiii Ilaaɔ̃ iyi í singaa amanɛ ŋai à waa waazo. Bisiu Ilaaɔ̃ í ce sɔɔluɛi hai waati iyi kù taka andunya ku ba ka kpɛ̃ amboeɛ do nŋu takaɛ ajɔ.

⁸ Baa inɛ akãi ilu irii andunya ŋau ihɛ̃ kù mà yaaseɛ, domi bii í jɛ à màai wo a kaa kpakpa Lafɛ̃ɛ si jĩi ku gaau, nŋu iyi í nɛ amboe fei.

⁹ Amma kukɔi idei Ilaaɔ̃ í ni, iyi iju kù yɛ ajɔ kãma, nɔ itĩ kãma mɔ kù gbɔɔ, iyi kù nɔ kù lɔ si idɔi amanɛ, nŋui Ilaaɔ̃ í cea inɛ ŋa iyi à buu sɔɔluɛ.

¹⁰ Nŋu bɛi Ilaaɔ̃ í jɔ̀ Hundeɛ í nyisi wa. Hundeɛu í yɔkɔ í nyisi wai si na iyi í jɔ̀ í ya wusɛ fei ndɛɛ nɔ ku mà hee do lasabui Ilaaɔ̃ takaɛ iyi wa manji fei.

¹¹ Mà yooi í mà lasabui amanɛ bii kù jɛ hundei nŋu takaɛ iyi í wa siɛ. Bɛɛbɛ mɔi inɛ gɔ kù mà lasabui Ilaaɔ̃ bii kù jɛ Hundeɛ.

¹² Awa, kù jɛ lasabui andunyai à ba, amma Hundei Ilaaɔ̃i à ba, ku ba ka mà mii iyi Ilaaɔ̃ í mu nwa si didɔ̃ɛ.

¹³ Nɔ a kù waa tusɛ asiiu do ide iyi wa naa hai si lasabui amanɛ, bii kù jɛ hai bi Hundei Ilaaɔ̃. À ya tusɛa inɛ ŋa mii ndii Hundei do ide iyi wa naa hai bi Hundeu.

¹⁴ Inɛ ŋa iyi a kù nɛ Hundei Ilaaɔ̃ a kaa gba idei Hundei Ilaaɔ̃ domi bɛi idei sũmui í yɛ bi tu ŋa. A kaa yɔkɔ a gbɔ yaaseɛ domi do gbugbãi Hundei Ilaaɔ̃ nŋu akãi à ya wũa idei Hundeu.

¹⁵ Inɛ iyi í nɛ Hundei Ilaaɔ̃ á yɔkɔ ku kiiti si mii fei, amma inɛ gɔ kù wɛɛ iyi á yɔkɔ ku kiiti lafɛ̃ɛ.

¹⁶ Kukɔi idei Ilaaɔ̃ wa fɔ í ni, yooi í mà lasabui Aɔ̃ Lafɛ̃ɛ hee ku muaa ikɔ. Kù wɛɛ. Amma awa à nɛ lasabu dimi akã do Kirisi.