Kɔrɛnti 1, 16 - Bibeli do fee

Fia ku tɔtɔɔ na woo dasi Jesu naanɛ ŋa

¹ Nsɛi, ka fɔ idei fia iyi à waa tɔtɔɔ na woo dasi Jesu naanɛ ŋa iyi à wa Zeruzalɛmu. Í sĩa iŋɛ mɔ i ce bɛi ǹ sɔ̃ inɛi igbɛi Jesu ŋa iyi à wa ilɛi Galati.

² Si ajɔ amaazuma fei í sĩa inɛ fei ku ya nya fiaɛ ikã zaka bɛi á yɔkɔ, ku ba i maà ti i degbe hee waati iyi ǹ to wa i bɛi i maa tɔtɔɔ fiau ŋa.

³ Bii ǹ naa, an bɛ inɛ ŋa iyi ì cica ŋau Zeruzalɛmu do amua nŋɛ do tia iyi á sisi nŋa yaaseɛ.

⁴ Bii í nɔ í jɛ í sĩa amu takam n koo mɔi, awaò ŋa aa ka koo ajɔ.

Mii ŋa iyi Pɔlu wa bi ku ce

⁵ Bii í kɔ̃ɔsi an bɔ ilɛi Masedɔni nɔ hai bɛ an naa bi tu ŋɛ.

⁶ An ce baa ajɔ minji bi tu ŋɛ, bii i kù laakai mɔm, bɛi an jɛ kpaa. Si anyii nŋu, nɔ i sobim do bii ǹ nɛ ku bɔ ŋa.

⁷ Bɛbɛi n kù bi n yɛ ŋɛ do saasa, amma bii Lafɛ̃ɛ í bi an kpɛ bi tu ŋɛ bɛ.

⁸ Amma hee ajɔi jingaui Pantekotu koo toò wa an maa n wa Efɛɛzu ihɛ̃ titã

⁹ domi Ilaaɔ̃ í cĩim kpãa nla nla n ceò icɛ ihɛ̃ iyi á nɛ aranfãani, baa bii mbɛɛ ŋa à kpɔ.

¹⁰ Bii Timɔtee í to wa bi tu ŋɛ, i gbaa do yaase bɛi á nɛò ara ku fũ si anini nŋɛ, domi nŋu mɔ icɛi Lafɛ̃ɛi wa ce bɛi ǹ wa n ceu.

¹¹ Na nŋu, i maà jɔ̀ inɛ gɔ ku dondaɛ ŋa, amma i sobiɛ si isɛɛnɛɛ iyi á ce ku baaò wa ku ba ku to wa bi tom do laakai ku sũ, domi ǹ wa n cɔ kpãaɛ nŋu do kpaasi ŋa iyi à waa suu wa.

¹² Amma iyi í jɛ idei kpaasi nwa Apolo, tuuba nkpɔ nkpɔi ǹ ya n maa n sɔ̃ɔ n ni koo cɔ ŋɛ do kpaasi nwa gɔ ŋa ajɔ, amma si nsɛi titã kù waa bi ku naa kpata kpata. Bii í ba fayaɛ á naa.

Idei ankãanyi ŋa

¹³ I ce laakaii ara nŋɛ, i leekĩ si naanɛ ku dasi dim dim ŋa. I ce wɔɔkɔ ku ba i ba gbugbã ŋa.

¹⁴ Iyi ì waa ce fei, i coo do kubi ŋa.

¹⁵ Ì mà ŋa iyi Setefani do inɛi kpasɛ̃ɛ ŋai à jɛ woo dasi Jesu naanɛ sinte si ilɛi Gɛrɛsi à nɔ à na ara nŋa à sobiò woo dasi Jesu naanɛ ŋa. Iŋɛ inɛm ŋa, ǹ wa n tɔɔ ŋɛi,

¹⁶ amanɛ dimi bɛɛbɛ ŋa do inɛ ŋa iyi à waa ba ŋa icɛu ku ce do himma fei, i ya jirima ŋa ŋa.

¹⁷ Ǹ nɛ inɔ didɔ̃ do kunaai Setefani, do Fɔɔtunatu do Akaiku, domi si bɛi i kù wa ihɛ̃ ŋa aŋai à ce mii iyi ì nɛ ku ce ŋa.

¹⁸ Inɛ ŋau à tũ inɔm bɛi à tũ ti iŋɛ mɔ. Í sĩa i saabu inɛ dimi bɛɛbɛ ŋa.

¹⁹ Igbɛi inɛi Jesu ŋa iyi à wa ilɛi Azii à waa ce ŋɛ fɔɔ. Akilasi do Piisila do inɛi igbɛi Jesu ŋa iyi à ya tɔtɔɔ kpasɛ̃ nŋa, à waa ce ŋɛ fɔɔ jiida jiida do irii Lafɛ̃ɛ.

²⁰ Kpaasi woo dasi Jesu naanɛ ŋa fei à waa ce ŋɛ fɔɔ. Iŋɛ mɔ i ce njɛ fɔɔ ŋa do kubi.

²¹ Amu Pɔlu, amui ǹ kɔ nŋɛ fɔɔu ihɛ̃ wa do awɔm.

²² Inɛ iyi kù nɛ kubii Lafɛ̃ɛ fei, ikpe ku muu. Lafɛ̃ɛ Jesu ku nyi wa.

²³ Didɔ̃i Lafɛ̃ɛ Jesu ku wɛɛ do iŋɛ.

²⁴ Kubim í wɛɛ do iŋɛ fei na anu akã nwa do Jesu Kirisi. Ami.