Kɔrɛnti 1, 13 - Bibeli do fee

Idei kubi

¹ Baa bii ǹ wa n fɔ ide do feei amanɛ ŋa ikã ikã do ti amaleka ŋa nɔ n kù nɛ kubi, ǹ yɛi bɛi isɔ iyi à waa cã walakɔ bɛi londi.

² Baa bii ǹ nɛ amuai walii ku ce, nɔ ǹ mà asiiu fei nɔ ǹ nɛ kumà fei, baa bii ǹ dasi Ilaaɔ̃ naanɛ hee bɛi an yɔkɔ n jɔ̀ geete ku tekĩ, bii n kù nɛ kubi, n kù jɛ ngɔgɔ.

³ Baa bii ǹ kpɛ̃a ilu are ŋa amanim fei, nɔ baa bii ǹ jɔ̀ à sɔ̃ aram bɛi iŋai kuwee, bii n kù nɛ kubi, n kaa n ba riba.

⁴ Kubi í ya temua, í ya nɔ ku ce mii jiida, ci ya ja igu, ci ya so araɛ lele, nɔ ci ya jɛ ilu faau.

⁵ Kubi ci ya ce mii gɔ iyi kù jɛ dee dee, nɔ ci ya dɛ aranfãanii nŋu akã. Inɛ iyi í nɛ kubi idɔɛ ci ya kɔ̃ gbãa gbãa, nɔ ci ya jilɛ idei taale si idɔɛ.

⁶ Inɛ iyi í nɛ kubi ci ya wɛɛò inɔ didɔ̃ si mii iyi kù jɛ dee dee, í gbe si mii iyi í jɛ ntɔ.

⁷ Kubi ci ya mɔngɔ nkãma. Naanɛ ku dasiɛ do kpãa ku cɔɛ do temuaɛ ci ya tã.

⁸ Kubi ci ya nɛ kɔɔ. Amma walii ku ce á na ku kpa iri, fee ikã ikã ku fɔ á na ku tã, nɔ kumài amanɛ mɔ á na ku tã.

⁹ Mii ŋau aa na a kpa iri si na iyi í jɔ̀ kumà nwa do walii ku ce nwa, kãmaɛ kù kɔ̃.

¹⁰ Amma waati iyi mii iyi í kɔ̃ á naa, waati bɛɛbɛi, iyi kù kɔ̃ á nɛ.

¹¹ Waati iyi ǹ wɛɛ keeke, ǹ ya n maa n fɔ idei bɛi ama keeke, nɔ n maa n ce laakai bɛi ama keeke, nɔ n maa n lasabu bɛi ama keeke, amma nsɛi iyi ǹ ce inɛ ngbo ǹ jɔ̀ daai ama.

¹² Iyi à waa yɛ nsɛi í yɛi bɛi mii iyi à waa hɔ̃nnɛ bari bari si isɔ fũfũ, amma ajɔ wa naa iyi aa ka yɛ ijuò iju. Iyi ǹ mà si nsɛi kù kɔ̃, amma waati nŋu an màa sãa sãa bɛi Ilaaɔ̃ í màm.

¹³ Nsɛi mii mɛɛtai í wɛɛ. Mii ŋau wee. Naanɛ ku dasi, do kpãa ku cɔ, do kubi. Amma kubi í re ŋa.