Kɔrɛnti 1, 11 - Bibeli do fee

¹ I sisiim ŋa bɛi amu takam ǹ wa n sisi Kirisi.

Yaase bɛi í sĩa inɛ ku nyisiò bɛɛrɛi Ilaaɔ̃

² Ǹ wa n saabu ŋɛ do iyi ì ya maa ye gigim si fei ndɛɛ ŋa, do si bɛi ì mu cio iyi ǹ kɔ ŋɛ siu dim dim ŋa.

³ Amma ǹ bi i mà ŋa iyi Kirisii í jɛ inɛ ngboi inɛ baa yooma fei, inɛmɔkɔ mɔi í jɛ inɛ ngboi aboɛ, Ilaaɔ̃ mɔi í jɛ inɛ ngboi Kirisi.

⁴ Inɛmɔkɔ iyi wa ce kutɔɔ walakɔ walii fei, bii í bii iriɛ kù waa nyisi bɛɛrɛi inɛ ngboɛ.

⁵ Amma inaabo iyi wa ce kutɔɔ walakɔ walii fei, bii kù bii iriɛ, kù waa nyisi bɛɛrɛi inɛ ngboɛ. Í yɛi bɛi inaabo iyi à gbogoo iriɛ.

⁶ Bii inaabo kù waa bi mango ku we, ku ja iriɛ. Amma bii iri ku ja walakɔ ku gbogoou í jɛaa anyɔ, ku we mango.

⁷ Kù sĩa inɛmɔkɔ ku bii iriɛ domi Ilaaɔ̃ í takaɛ ku jɔɔ nɔ ku nyisi amboeɛ, amma inaabo, amboei inɛmɔkɔi wa nyisi,

⁸ domi hai si kutaka inɛmɔkɔ kù fita hai si inaabo, amma inaaboi í fita hai si inɛmɔkɔ.

⁹ Bɛɛbɛ mɔi a kù taka inɛmɔkɔ na inaabo amma à taka inaaboi na inɛmɔkɔ.

¹⁰ Na nŋu, na irii amaleka ŋa í sĩa inaabo ku we mango ku nyisi iyi nŋu wa sũa mɔkɔi nŋu iri ilɛ.

¹¹ Amma do nŋu fei si wajui Lafɛ̃ɛ inɛ gɔ kaa yɔkɔ ku ni nŋu í nɛ gbugbã nŋu ku ce kuwɛɛi nŋu ikã, domi inaabo í nɛ bukaatai inɛmɔkɔ, inɛmɔkɔ mɔ í nɛ bukaatai inaabo.

¹² Bɛi à nya inaabo hai si inɛmɔkɔ, bɛɛbɛ mɔi à bí inɛmɔkɔ hai bi inaabo, amma Ilaaɔ̃i wa ce fei ndɛɛ.

¹³ Iŋɛ taka nŋɛ i lasabu ŋa. Í sĩa inaabo ku tɔɔ Ilaaɔ̃ hai we mango?

¹⁴ Iŋɛ taka nŋɛ i kù mà ŋa iyi anyɔi bii inɛmɔkɔ í nɛ ntoi iri sisɔ?

¹⁵ Amma bii ntoi irii inaabo í sɔ, bɛɛrɛɛi. À muaa ntoi iriɛi ku jɛ bɛi fuugɛsɛ.

¹⁶ Bii inɛ gɔ wa bi ku ba wa kakɔɔ ku ce si ideu bɛ, amu de ǹ wa n fɔ iyi si inɔ nwa do si igbɛi inɛi Ilaaɔ̃ ŋa a kù nɛ dɔ̃ɔnɛ mmu gɔ má.

Ijɛi Lafɛ̃ɛ

¹⁷ Ide iyi an sɔ̃ ŋɛ nsɛi, n kaa n saabu nŋɛ si, domi á sĩa kutɔtɔɔ nŋɛ ŋau ku mu nŋɛ gbugbãi wo, amma wee nsɛi wa kɛkɛ ŋɛi.

¹⁸ Sinte, à sɔ̃m à ni bii ì tɔtɔɔ ŋa inɛ gɔ ŋa à wa si inɔ nŋɛ iyi iŋɛò ŋa i ci ya nɛ anu akã. Nɔ ǹ tamaa ntɔi.

¹⁹ Ntɔ ntɔ, kù nɛ bɛi á ce iyi njɛ ku fɛɛfɛ kù wa si anini nŋɛ, ku ba a mà inɛ ŋa iyi à jɛ ti ntɔ.

²⁰ Bii ì tɔtɔɔ ì waa jɛ ŋa, ì ya tamaa bɛi ijɛi Lafɛ̃ɛi ì waa jɛ ŋa amma iboi,

²¹ domi bii ì buba ŋa gbakã, inɛ fei í ya maa saasai ku jɛ sɔndaɛ iyi í naaò wa, nɔ a jɔ̀ inɛ gɔ ŋa do ari, nɔ inɛ gɔ ŋa à jɛ à mɔ hee atɛ̃ ku kpa ŋa.

²² I kù nɛ kpasɛ̃i ara nŋɛ bii aa jɛ i mɔ ŋai? Mà ì bi i donda igbɛi inɛi Ilaaɔ̃ ŋa, nɔ i dasi ilu are ŋa anyɔ ŋai? Bɛirei an ni nŋɛ. N saabu ŋɛ? Aawo, n kaa n saabu ŋɛ si nŋu bɛ.

²³ Ide iyi ǹ gba hai bi Lafɛ̃ɛ nɔ ǹ kɔ ŋɛ si wee. Idũ ajɔ iyi à so Lafɛ̃ɛ Jesu à daa inɛ ŋa si awɔ í so pɛ̃ɛ

²⁴ í saabu Ilaaɔ̃, nɔ í bububuɛ. Nɔ í ni, iyi ihɛ̃i í jɛ aram iyi ǹ na na iri nŋɛ. I ya ce iyi ihɛ̃ i maa yeò gigim ŋa.

²⁵ Bɛɛbɛ mɔi, iyi à jɛ à tã, í so kɔɔfu í ni, kɔɔfuu ihɛ̃i í jɛ akabuu titɔ̃i Ilaaɔ̃ iyi í dĩ do njɛm. Waati iyi ì waa mɔ do kɔɔfuu ŋa fei, i ya coo i maa yeò gigim ŋa.

²⁶ Waati kãma iyi ì waa jɛ pɛ̃ɛu nɔ ì waa mɔ do kɔɔfuu ŋa fei, ikui Lafɛ̃ɛi ì waa sisi ŋa hee koo nyiò wa.

²⁷ Na nŋu, inɛ iyi í jɛ pɛ̃ɛi Lafɛ̃ɛ walakɔ í mɔ do kɔɔfuɛ, nɔ kuwɛɛɛ kù jɛ dee dee, í ce dulum nii si gãmɛi arai Lafɛ̃ɛ do si njɛɛu.

²⁸ Na nŋu, inɛ fei ku wusɛ araɛ ku bɛi ku jɛ pɛ̃ɛu, nɔ ku mɔ do kɔɔfuu.

²⁹ Ntɔ ntɔ, bii ì jɛ nɔ ì waa mɔ ŋa nɔ i kù mà ŋa iyi arai Kirisii, ì waa soa ara nŋɛ taalei si kujɛ do si kumɔ nŋɛ.

³⁰ Ŋɔi í jɔ̀ inɛ nkpɔ nŋɛ wa ce bɔ̃ɔ nɔ inɛ gɔ ŋa à kua gbugbã, inɛ gɔ ŋa mɔ à ku.

³¹ Bii à kiiti ara nwa do ntɔ Ilaaɔ̃ kaa kiiti wa má.

³² Amma bii Lafɛ̃ɛ í kiiti wa, í ya jɔ̀ ka baa si kpãa jiidai ku ba ku maà yɛ taale nwa do inɛi andunya ŋa ajɔ.

³³ Na nŋu, iŋɛ inɛm ŋa, bii ì waa tɔtɔɔ ku ba i jɛ ŋa, i jɔ̀ i ya degbe njɛ.

³⁴ Bii ari wa kpa inɛ gɔ, ku jɛ sɔndaɛ kpasɛ̃ ku ba i maà na i so taale si kutɔtɔɔ nŋɛ. Ide iyi í gbe si ide ŋa iyi ì beem ŋa, an ce nŋɛ cioɛ bii ǹ na ǹ to wa.