Kɔrɛnti 1, 10 - Bibeli do fee

I maà ya tɔɔ iwɛ̃ ŋa

¹ Iŋɛ inɛm ŋa, ǹ bi i mà ŋa iyi si waatii Moizi, bala nwa ŋau fei kudũi ijĩui à too nɔ aŋa fei à kua tenkuu do isɛ.

² Kudũi ijĩu ku too do tenkuu ku kua í yɛi bɛi à dasi ŋa inyi nɔ à baa à jɛ mɔcɔi Moizi ŋa.

³ Nɔ aŋa fei ijɛ dimi akã gɔi à jɛ. Ijɛu hai bi Ilaaɔ̃i í naa.

⁴ Nɔ aŋa fei inyi dimi akãi à mɔ. Inyiu Ilaaɔ̃i í jɔ̀ í fita hai si kuta. Kutau í ya maa too ŋai. Nɔ Kirisii í jɛ kutau.

⁵ Do nŋu fei, Ilaaɔ̃ í jɔ̀ inɛ nkpɔ nŋa í ku si gbaa si na iyi í jɔ̀ daa nŋa kù sĩaa si.

⁶ Nsɛi, mii ŋau bɛi í jɛ nwa yaase ku ba ka maà nɛ binɛ laalɔ ŋa bɛi aŋa mɔ.

⁷ I maà ya tɔɔ iwɛ̃ ŋa bɛi gɔgɔ nŋa ŋa à ce. Ì mà ŋa iyi à kɔ idei iwɛ̃ ku tɔɔ nŋa à ni, inɛ ŋau à buba à jɛ à mɔ, nɔ à dede à waa ce daa bɛɛtɛkɛ.

⁸ Ka maà ya ce adɛi abo kaafe bɛi gɔgɔ nŋa ŋa à ce, nɔ amanɛ dubu kɔnfia do mɛɛta (23.000) í ku si ajɔ akã.

⁹ Ka maà ya ka cɔ laakaii Kirisi bɛi í to bɛi gɔgɔ nŋa ŋa à ce, nɔ njo ŋa à kpa si ŋa inɛ nkpɔ.

¹⁰ Ka maà gbagba bɛi gɔgɔ nŋa ŋa à ce, nɔ amalekai iku í kpa ŋa.

¹¹ Mii ŋau bɛi í ba ŋa bɛi yaase, nɔ à kɔɔ ku ba ka ce laakaii ara nwa, awa iyi à wɛɛ si waatii ankãanyiu ihɛ̃.

¹² Na nŋu, inɛ iyi í tamaa nŋu wa leekĩ dim dim ku jɔ̀ ku ce laakaii araɛ, ku ba ku maà ti ku cuku.

¹³ I kù yɛ dimii laakai ku cɔ gɔ ŋa iyi kù jɛ dimi iyi inɛ fei í ya yɛ. Ilaaɔ̃ ilu naanɛ kaa jɔ̀ a cɔ laakai nŋɛ ku re zaka bɛi aa yɔkɔ i temuaò ŋa. Amma si laakai ku cɔ baa yooma fei í ya nyi ku ce bi ku fita má ku ba i yɔkɔ temua ŋa.

¹⁴ Na nŋu kpaasim ŋa, i saa iwɛ̃ ku tɔɔ ŋa.

¹⁵ Ǹ wa n ba ŋɛ ide ku fɔi bɛi ilu laakai ŋa. I jɔ̀ i ce lasabu si iyi ǹ wa n fɔ ŋa.

¹⁶ Si ijɛi Lafɛ̃ɛ, kɔɔfu iyi à ya ka so ka saabuò Ilaaɔ̃ wa nyisi iyi à nɛ ikpɛ̃ si njɛi Kirisi. Nɔ pɛ̃ɛ iyi à ya ka so ka buu wa nyisi iyi à nɛ ikpɛ̃ si arai Kirisi, mà irei.

¹⁷ Si bɛi awa fei pɛ̃ɛ akãui à jɛ, nŋui í jɔ̀ baa do iyi à kpɔ fei à jɛ ara akã, domi awa fei à ba ikpɛ̃ nwa si pɛ̃ɛ akãu.

¹⁸ I cɔ inɛi Izirɛli ŋa. Inɛ ŋa iyi à waa jɛ ijɛi kuwee, à nɛ ikpɛ̃ si bi ku ce kuweeu, mà irei.

¹⁹ Debɛi, mii ǹ wa n fɔ. N kù ni iŋa iyi à ya ceò kuwee í jɛ ngɔgɔ. N kù nɔ n kù ni iwɛ̃u takaɛ mɔ í jɛ ngɔgɔ.

²⁰ Aawo, amma ǹ wa n fɔi ǹ ni kuwee iyi woo tɔɔ iwɛ̃ ŋau à ya ceu, inɛi inɔɔko ŋai à ya cea, kù jɛ Ilaaɔ̃. Nɔ wee n kù bi i nɛ ikpɛ̃ do inɛi inɔɔko ŋa.

²¹ Iŋɛ iyi ì ya jɛ ijɛi Lafɛ̃ɛ ŋa nɔ i mɔ mii iyi í wa si kɔɔfuɛ ŋa, i kaa nyi i sinda i ŋɔ iŋa iyi à ceaò inɛi inɔɔko ŋa kuwee má ŋa nɔ i mɔ mii iyi í wa si kɔɔfu nŋa ŋa.

²² À bi ka dede igui Lafɛ̃ɛi? À roo gbugbãi?

I ce fei ndɛɛ ku ba inɛ ŋa a mà bɛɛrɛi Ilaaɔ̃

²³ Inɛ gɔ nŋɛ ŋa à ya ni, ǹ nɛ kpãai n ce mii fei. Ntɔi, amma fei ndɛɛ si á sĩa nŋɛ. Ntɔ ntɔ, ì nɛ kpãai i ce mii fei ŋa, amma fei ndɛɛ kaa mua inɛ gbugbã.

²⁴ Inɛ kãma ku maà dɛdɛ aranfãanii nŋu takaɛ amma ku dɛdɛ ti inɛ mmu ŋa.

^25-26 Kukɔi idei Ilaaɔ̃ wa fɔ í ni, ilɛ do mii iyi í wa si fei ti Aɔ̃ Lafɛ̃ɛi. Na nŋu, iŋa iyi à waa ta aja fei i ŋɔ ŋa, i maà bee ide kãma ŋa ku ba idɔ nŋɛ ku maà yɛ taale nŋɛ.

²⁷ Bii hai dasi Jesu naanɛ gɔ í kpe ŋɛ ku jɛ, bii ì dasi idɔ i koo ŋa, mii iyi à na ŋɛ fei, i jɛ ŋa, i maà ya bee ide kãma ŋa ku ba idɔ nŋɛ ku maà yɛ taale nŋɛ.

²⁸ Amma bii inɛ gɔ í sɔ̃ ŋɛ í ni, iyi ihɛ̃ à ceò kuweei, i maà ŋɔ ŋa na inɛ iyi í sɔ̃ ŋɛu idɔɛ ku maà yɛ taaleɛ.

²⁹ Kù jɛ na idɔi iŋɛ taka nŋɛ, amma na ti inɛ iyi í sɔ̃ ŋɛui. Ntɔ ntɔ, idɔi inɛ gɔ kaa yɛ taalei ara ku nɛm.

³⁰ Bii ǹ saabu Ilaaɔ̃ si ijɛ, inɛ kãma kù nɛ kpãa ku yɛ taalem na ijɛu iyi ǹ saabuò Ilaaɔ̃ tã.

³¹ Na nŋu, bii ì jɛ ì waa mɔ ŋa walakɔ bii ì waa ce ngɔgɔ ŋa, i ce fei ndɛɛ ku ba inɛ ŋa a mà bɛɛrɛi Ilaaɔ̃.

³² I ce kuwɛɛ nŋɛ do yaase bɛi i kaa dasiò inɛ kãma kurara ŋa, hai Zuifu ŋa do Gɛrɛki ŋa hee do inɛi igbɛi Ilaaɔ̃ ŋa fei.

³³ I sisiim ŋa. Amu takam ǹ wa n ce kookaai ku ba kucem ku dɔ̃a inɛ fei si, si mii baa yooma fei. N kù wa n dɛ aranfãanii amu takam, í gbe ti zamaa iyi í gbe fei ku ba a ba faaba.