Kɔrɛnti 1, 1 - Bibeli do fee

Í ce ŋa fɔɔ

¹ Amui Pɔlu, amu iyi Ilaaɔ̃ í kpe si idɔɔbiɛ ǹ jɛ woo bɛi Jesu Kirisi. Amu do Sɔsitɛni kpaasi nwau

² à waa ce ŋɛ fɔɔ, iŋɛ inɛi igbɛi Ilaaɔ̃ ŋa iyi ì wa ilui Kɔrɛnti ŋa. À waa ce ŋɛ fɔɔ, iŋɛ iyi Ilaaɔ̃ í kpe ì jɛ tɛɛ ŋa, iŋɛ iyi í cica í jilɛ i maa nɛ anu akã do Jesu Kirisi ŋa. À ce iŋɛ fei fɔɔ hee do inɛ ŋa iyi à wa ilɛ baa yooma fei, inɛ ŋa iyi à waa tɔɔ do irii Lafɛ̃ɛ nwa Jesu Kirisi, nŋu iyi í jɛ Lafɛ̃ɛi awa fei.

³ Ilaaɔ̃ baa nwa do Lafɛ̃ɛ Jesu Kirisi a mu nŋɛ didɔ̃ do laakai ku sũ.

Pɔlu wa saabu Ilaaɔ̃ na inɛi Kɔrɛnti ŋa

⁴ Waati kãma fei ǹ ya n maa n saabu Ilaaɔ̃i na iri nŋɛ si na iyi í jɔ̀ í mu nŋɛ didɔ̃ɛ na anu akã nŋɛ iyi ì ce do Jesu Kirisi ŋa.

⁵ Ntɔ ntɔ, anu akã nŋɛ iyi ì ce do Jesu Kirisi ŋa í jɔ̀ ì ba amua baa yooma fei ì jɛò ilu amani ŋa si idei Ilaaɔ̃ ku fɔ do ku mà.

⁶ Idei Kirisi iyi à waazo nŋɛu nŋui ì leekĩ si dim dim ŋa hee

⁷ amuai Hundei Ilaaɔ̃ baa akã kù gaizia ŋɛ, iŋɛ iyi ì waa degbe waati iyi Lafɛ̃ɛ nwa Jesu Kirisi á faata wa.

⁸ Jesu Kirisii á jɔ̀ i ya maa leekĩ dim dim ŋa hee kɔɔ ku ba i jɛ hai nɛ taale ŋa si ajɔ iyi á nyi wa má.

⁹ Ilaaɔ̃ ilu naanɛi, nŋu iyi í kpe ŋɛ i ce anu akã ŋa do Amaɛ Jesu Kirisi Lafɛ̃ɛ nwa.

Njɛ ku fɛɛfɛ si igbɛi Jesu

¹⁰ Iŋɛ kpaasim ŋa, ǹ wa n tɔɔ ŋɛ do irii Lafɛ̃ɛ nwa Jesu Kirisi, i ce kookaai i ya maa gbɔsi njɛ ŋa ku ba njɛ ku fɛɛfɛ ku maà ya wa si anini nŋɛ. I jɔ̀ i nɛ anu akã dee dee ŋa, nɔ lasabu nŋɛ mɔ do mii iyi ì waa lele ŋa ku jɛ akã.

¹¹ Iŋɛ inɛm ŋa, ǹ wa n fɔ bɛɛbɛi si na iyi í jɔ̀ inɛi nyaanzei Koloe ŋa à sɔ̃m à ni njɛ ku wã í ya wa si anini nŋɛ.

¹² Mii iyi í jɔ̀ ǹ wa n fɔ bɛɛbɛ wee. Ǹ gbɔ à ni inɛ gɔ ŋa à ya ni ti Pɔlui aŋa à jɛ, inɛ gɔ ŋa mɔ à ya ni ti Apoloi aŋa à jɛ, nɔ inɛ gɔ ŋa mɔ à ya ni ti Piɛɛi aŋa à jɛ, nɔ inɛ mmu gɔ ŋa mɔ à ya ni ti Kirisii aŋa à jɛ.

¹³ Ì waa tamaa bɛi aa kpɛ̃ Kirisi ikɔ bututu ŋai? Amu Pɔlu, amu si ǹ ku si jĩi na irii dulum du ŋɛ. Kù nɔ kù jɛ do irim nii à dasi ŋɛ inyi.

¹⁴ Ǹ wa n saabu Ilaaɔ̃ do iyi n kù dasi inɛ gɔ nŋɛ inyi, bii kù jɛ Kirisipu do Gayusi.

¹⁵ Bɛɛbɛ mɔi inɛ gɔ kaa yɔkɔ ku ni à dasi ŋɛ inyi do irim.

¹⁶ Amma ntɔi, ǹ dasi inɛi kpasɛ̃i Setefani ŋa mɔ inyi. To, aŋa baasi n kù mà mà ǹ dasi inɛ gɔ inyi má.

¹⁷ N kù dasi inɛ nkpɔ inyi si na iyi í jɔ̀ kù jɛ na nŋui Kirisi í bɛm wa. Í bɛm wai n na n sisi laabaau jiidau. Laabaau jiidau, kù jɛ do gɛlɛ didɔ̃i ǹ wa n sisiɛ, ku ba ikui Kirisi si antaii jĩi ku gaauu ku maà ce nfe.

Bisii amanɛ ŋa do ti Ilaaɔ̃ iyi à waa cɔ bɛi idei sũmu

¹⁸ Ntɔ ntɔ, idei ikui Kirisi si antaii jĩi ku gaau í yɛi bɛi ide hai nɛ yaase bi inɛ ŋa iyi à wa si kpãai nfe ku ce. Amma bi awa iyi à wa si kpãai faabau, gbugbãi Ilaaɔ̃i.

¹⁹ Mii iyi kukɔi idei Ilaaɔ̃ wa fɔ wee. Í ni, Ilaaɔ̃ í ni, an nya laakaii ilu laakai ŋa, nɔ n kpa bisii ilu bisi ŋa.

²⁰ To, iwoi ilu bisi í wa mɔm. Iwoi woo kɔ inɛ ŋa si wooda í wa. Iwoi inɛ iyi inɛ ŋa à waa kpe woo mài andunyau í wa. Ilaaɔ̃ í nyisi iyi bisii andunyau í yɛi bɛi idei sũmu.

²¹ Ntɔ ntɔ, inɛi andunya ŋa a kù yɔkɔ a kù mà Ilaaɔ̃ do bisii aŋa taka nŋa. Ilaaɔ̃ takaɛi í coo bɛɛbɛ. Amma si bisiɛ mii iyi í sĩaa wee. Inɛ ŋa iyi à dasiɛ naanɛ à ba faaba na idei waazo iyi inɛ gɔ ŋa à waa cɔ bɛi idei sũmu.

²² Zuifu ŋa maamaakei à ya maa bee, nɔ Gɛrɛki ŋa mɔ bisii à ya maa dɛ.

²³ Amma awa, waazoi Kirisi iyi à kpakpa si antaii jĩi ku gaauui à waa ce. Ideu bɛi í jɛ bɛi kuta bi ku koosɛ bi Zuifu ŋa nɔ í jɛ má bɛi idei sũmu bi dimi mmu ŋa.

²⁴ Amma bi inɛ ŋa iyi Ilaaɔ̃ í kpe, baa bii à jɛ Zuifu walakɔ dimi mmu ŋa, Kirisii í jɛ gbugbãi Ilaaɔ̃ do bisiɛ.

²⁵ Kirisii í jɛ gbugbãi Ilaaɔ̃ do bisiɛ bi tu ŋa domi idei Ilaaɔ̃ iyi inɛ gɔ ŋa à waa cɔ bɛi idei sũmuu í re bisii amanɛ ŋa, nɔ icɛi Ilaaɔ̃ iyi inɛ gɔ ŋa à waa ni kù nɛ gbugbãu í re gbugbãi amanɛ ŋa.

²⁶ Iŋɛ kpaasim ŋa, iŋɛ iyi Ilaaɔ̃ í kpe, i cɔ bɛi ì yɛ ŋa. Kù jɛ inɛ nkpɔ nŋɛi í jɛ ilu bisi si kuyɛi amanɛ ŋa walakɔ ilu gbugbã walakɔ ilu bɛɛrɛ.

²⁷ Amma Ilaaɔ̃ í cica mii ŋa iyi inɛi andunya ŋa à waa cɔ bɛi hai nɛ yaase ŋa í dasiò ilu bisi ŋa anyɔ, nɔ í cica mɔngɔi andunya ŋa í dasiò ilu gbugbã ŋa anyɔ.

²⁸ Nɔ Ilaaɔ̃ í cica hai nɛ gbugbã ŋa do inɛ ŋa iyi à ya maa donda, iyi a kù jɛ ngɔgɔ si andunya í kayeò inɛ ŋa iyi à waa cɔ ara nŋa bɛi inɛ nla ŋa.

²⁹ Í ce bɛɛbɛi ku ba inɛ kãma ku maà yɔkɔ ku tɔɔ fufu si wajuɛ.

³⁰ Ilaaɔ̃i í jɔ̀ ì nɛ anu akã do Jesu Kirisi ŋa. Nɔ Kirisii í jɛ bisii Ilaaɔ̃ bi tu wa na saabui anu akã nwau iyi à ce do nŋu. Kirisii í nya wa hai si dulum du wa. Do saabuɛi à jɛò dee dee nɔ à jɛò inɛi Ilaaɔ̃ ŋa.

³¹ Na nŋu, inɛ iyi wa tɔɔ fufu ku tɔɔ na irii Lafɛ̃ɛ. Bɛɛbɛi kukɔi idei Ilaaɔ̃ í ni.