तितुस 1 - मंडयाली नंऊँआं नियम

नमस्कार

¹ हांऊँ पौलुस, एस्सा चिठ्ठी जो लिख्या करहा। हांऊँ परमेसरा रा सेऊआदार होर यीसू मसीह रा चुणिरा चेला आ। हांऊँ परमेसरा रे चुणिरे लोका रे विस्वासा जो मजबूत करणे रे कठे नियुक्त कितिरा, ताकि स्यों सच्चा जो जाणे होर परमेसरा जो खुस करणे वाली जिन्दगी जीए।

² जेसरी वजहा ले स्यों परमेसरा साउगी अनंत जिन्दगी जीणे री आस रखे। एह्ड़ा परमेसर जो कधी झूठ नी बोल्दा, होर जिन्हें संसारा रे रचणे ले पैहले ले ही वादा कितिरा था कि तेसरे लोका जुग-जुग जिउंदे रैहणा।

³ पर ऐबे ठीक टैमा पर, परमेसरे एस खुसी री खबर आस्सा पर जाहिर किती होर एता रा प्रचार आस्से सभी किन्हें करहे, आस्सा रे उद्धारकर्ता परमेसरे मुंजो ये जिम्मेदारी सौम्पी री होर हुक्म दितिरा कि हांऊँ ये काम तेसरे कठे करूं।

⁴ तितुस ये चिठ्ठी हांऊँ तुजो लिखी करहा, तू सच्चे मेरे मह्ठे साहीं आ, क्यूंकि आस्से यीसू मसीह पर विस्वास करहे। हांऊँ प्रार्थना करहा कि आस्सा रा बापू परमेसर होर उद्धारकर्ता मसीह यीसू तुजो अनुग्रह होर सांति देंदा रहे।

क्रेते मन्झ तितुसा रा काम

⁵ मैं तुजो क्रेते टापू मन्झ इधी कठे छाडी आईरा था कि, तू तेथी रही किन्हें आस्सा रे सुर्हू कितिरे कामा जो पूरा करहे, होर जिहां मैं तुजो गलाईरा था ठीक तिहां ही क्रेते टापू रे हर गांऊँआं मन्झ अगुवे जो नियुक्त करेया।

⁶ होर कलीसिया रा अगुवा एह्ड़ा हूंणा चहिए कि से बेकसूर हो, होर एक ई लाड़ी रे लाड़े हो, जिन्हारे बाल बच्चे विस्वासी हो, होर जिन्हा पर लुचपन करणे होर हुक्म नी मनणे रा दोष नी लगिरा हो।

⁷ होर एक कलीसिया रा अगुवा परमेसरा रा भंडारी हूंणे री वजहा ले बेकसूर हूंणां चहिए; ना हठी, ना गुस्सा करणे वाल़ा, ना दारुबाज, ना मारपीट करणे वाल़ा हो, होर ना दूजेया जो धोखा देई किन्हें पैसे कमाणे री इच्छा रखदा हो।

⁸ पर आदर-खातर करणे वाल़ा, दूजे री भलाई करणे री इच्छा रखणे वाल़ा, आपणे पर काबू रखणे वाल़ा, धर्मी माह्णुं पवित्र होर हमेसा आपणी भावनाओं पर काबू रखणे वाल़ा हो।

⁹ होर से तेस भरोसे रे लायक उपदेसा जो मजबूती किन्हें पकड़ी रखणे वाल़ा हो, जो आस्से तेस जो सखाईरा था; जेता ले दूजेया जो सखाई सके होर सच्चे उपदेस रे बरखलाप बोलणे वाल़ेया रा मुंह बंद कुराई सके।

उपदेस सखाणे वाले पाखंडी

¹⁰ क्यूंकि बौह्त सारे लोका जो वकवास करहे होर दूजेया जो धोखा दे, तिन्हा सही उपदेसा रा विरोध करणा। ये खास करी किन्हें कुछ यहूदी लोका रे बारे मन्झ आ जो विस्वासी बणी गईरे।

¹¹ इन्हारा मुंह बन्द करणा चहिए; कि ये लोक एह्ड़ा नी स्खायें, क्यूंकि जेबे स्यों एह्ड़ा स्खायें, ता स्यों सभ परिवारा रे विस्वासा जो बगाड़ी दे। स्यों पैसे कमाणे रे कठे एह्ड़ा स्खायें।

¹² क्रेते टापू मन्झ रैहणे वाल़ा एक माह्णुं जेस जो लोक नबी समझे, तिन्हें बोल्या कि, “क्रेते टापू मन्झ रैहणे वाले लोक बौह्त झूठ बोल्हा ऐं। स्यों जंगली जानवरा साहीं खतरनाक ऐं! होर स्यों आलसी होर पेटू ऐं।”

¹³ क्रेते टापू मन्झ रैहणे वाले लोका रे कठे ये गल ऐबे भी सच्ची ई, इधी कठे तिन्हा जो कड़ी चेतावनी देआ कर कि, स्यों यीसू मसीह रे बारे मन्झ सच्चे उपदेसा पर विस्वासा करहे।

¹⁴ यहूदी लोका री काह्णियां पर होर तिन्हा माह्णुंआं रे हुक्मा पर मन नी ल्गाऊआ, जो सच्चाई ले भटकी जाहें।

¹⁵ जिन्हा लोका रे मना मन्झ पाप भरे विचार नी हुंदे तिन्हारे कठे सभ चीजा सुद्ध ई। पर जो लोक बुरे हुयें, होर जो यीसू मसीह पर विस्वास नी करदे तिन्हारे कठे सभ चीजा असुध ई, क्यूंकि तिन्हारी बुद्धि होर अंतरात्मा दोन्हो असुद्ध हुई गईरी।

¹⁶ झूठे उपदेस स्खाणे वाले बोल्हा ऐं कि, आस्से परमेसरा जो जाणहां ऐं; पर तिन्हारे काम एस गल्ला जो साफ जाहिर करहे कि स्यों परमेसरा जो नी जाणदे। क्यूंकि स्यों हुक्म नी मनणे वाले ऐे होर परमेसरा तिन्हा किन्हें नफरत करहा; होर स्यों कोई भी खरे काम नी करदे।