रोमियो 8 - मंडयाली नंऊँआं नियम

पवित्र आत्मा रे ज्रीए जिन्दगी

¹ इधी कठे ऐबे जो मसीह यीसू मन्झ विस्वास करहे, तिन्हा पर सजा रा हुक्म नी आ।

² क्यूंकि पवित्र आत्मा तुस्सा जो जिन्दगी देआ, जो मसीह यीसू रे वखा ले आ, होर आस्सा जो पाप होर मौता ले अजाद करी देणा।

³ मूसा री व्यवस्था आस्सो नी बचाई सकदी, क्यूंकि पापा रा स्वभाव व्यवस्था जो कमजोर बणा। पर परमेसरे आपणे मह्ठे जो आस्सा पापी लोका री समानता मन्झ एस संसारा मन्झ भेजी किन्हें होर आस्सा रे पापा रे कठे बलिदान करी किन्हें तिन्हें आस्से बचाई दिते। परमेसरे मसीह रे सरीर मन्झ पापा री सजा रा हुक्म देई दितेया।

⁴ परमेसरे ये इधी कठे कितेया कि आस्सा जो पापी स्वभावा रे मताबक नी, पर पवित्र आत्मा रे मताबक चल्हा ऐं, आस्सा मन्झ व्यवस्था रे धार्मिक बिधिया पूरी हुई जाये।

⁵ क्यूंकि जो पापा रे स्वभावा रे मताबक चल्हा ऐं, स्यों पापमय गल्ला पर ध्यान ल्गाहें; पर जो पवित्र आत्मा रे मताबक चल्हा ऐ, स्यों तिन्हा गल्ला पर ध्यान ल्गाहें जो आत्मा जो खरी लगी।

⁶ इधी कठे अगर आस्से पापा रे स्वभाव रे अधीन आ, ता ये आस्सो मौत वखा जो लेई जाई। पर अगर आस्से पवित्र आत्मा रे अधीन आ, ता ये आस्सा जो जिन्दगी होर सांति देईं।

⁷ क्यूंकि पापा रे स्वभाव रे अधीन हूंणा परमेसरा किन्हें बैर रखणा आ, क्यूंकि पाप रा स्वभाव परमेसर री व्यवस्था रे अधीन नी आ, होर ना ही ये व्यवस्था री गल्ला जो मनी सक्हा।

⁸ क्यूंकि जो पापा रे स्वभाव रे अधीन ऐं, स्यों परमेसरा जो खुस नी करी सक्दे।

⁹ पर जेब्की पवित्र आत्मा तुस्सा मन्झ वास करहा, ता तुस्से पापा रे स्वभाव रे अधीन नी ऐं, पर पवित्र आत्मा रे अधीन ऐं। अगर केसी मन्झ पवित्र आत्मा नीआ, ता से मसीह रा नीआ।

¹⁰ होर अगर मसीह तुस्सा मन्झ वास करहा आ, ता पापा री वजहा ले सरीरा रे मरणे पर भी पवित्र आत्मा तुस्सा जो जिन्दगी देआ, क्यूंकि तुस्से परमेसरा री नजरा मन्झ धर्मा माह्णुं बणाई गईरे।

¹¹ होर अगर परमेसरा री आत्मा जिन्हें यीसू जो मरिरे मन्झा ले जिउंदा कितेया तुस्सा मन्झ वास करहा। जेस परमेसरे मसीहा जो मरिरे मन्झ जिउंदा कितेया तेस आपणी आत्मा रे ज्रीए जो तुस्सा मन्झ वास करही, तुस्सा रे मरणे वाले सरीरा जो भी जिउंदा करणा।

पवित्र आत्मा रे ज्रीए परमेसरा रे बच्चे बणना

¹² इधी कठे हे भाईयो बैहणो, आस्से पाप रे स्वभाव रे कर्जदार नी ऐं कि, आस्से तेसरे मताबक जिन्दगी जीए।

¹³ क्यूंकि अगर तुस्से पापा रे स्वभाव रे मताबक आपणी जिन्दगी जिंघे, ता तुस्सा मरणा, पर अगर पवित्र आत्मा री सामर्था ले तुस्से आपणे पापा रे स्वभाव री इच्छा जो मारघे, ता जिउंदा रैंह्णां।

¹⁴ इधी कठे जितने लोक परमेसरा रे आत्मा रे मताबक जीये, स्यों ईं परमेसरा रे बच्चे ऐं।

¹⁵ क्यूंकि तुस्सा जो गुलामी री आत्मा नी मिलिरी कि, गुलामा साहीं दबारा परमेसरा ले डरे, पर पवित्र आत्मा आस्सो परमेसरा री बच्चे बणाई, जेस ले आस्से परमेसरा जो, “हे बापू, हे बापू,” पुकारी किन्हें बोल्हा ऐं।

¹⁶ पवित्र आत्मा आपु ई आस्सा री आत्मा साउगी गुआही देहां कि, आस्से परमेसरा रे बच्चे ऐे।

¹⁷ होर अगर आस्से बच्चे ऐं, ता वारिस भी ऐं, होर परमेसरा रे वारिस होर मसीह रे संगी वारिस ऐं। अगर आस्से मसीह साहीं दुःख सहन करहे ता तेस साउगी आस्से तेसरी महिमा मन्झ भी साझी हुयें।

दुखा ले महिमा तक

¹⁸ मुंजो पक्का पता कि, जो एस टैम जो दुःख आस्से सहन करहे स्यों तेस महिमा रे साम्हणें कुछ भी नी ऐं, जो परमेसर आस्सा जो देणे वाल़ा आ।

¹⁹ क्यूंकि सारी रचिरी चीजा बड़ी आसा ले तेस ध्याड़े रा इंतजार करेया करहा ई, जेबे परमेसरा ये जाहिर करी देणा कि तेसरे सच्चे बच्चे कुणहें?

²⁰ क्यूंकि परमेसरा री रचिरी सारी चीजे आपणा रचिरा मकसद गुआई दितेया, पर आपणी इच्छा ले नी, पर इधी कठे कि परमेसरे एह्ड़ा कितेया। पर फेरी भी आस्सा जो आस हाई।

²¹ कि परमेसरा रा रचिरी सारी चीजे तेस ध्याड़े रा इंतजार करही जेस ध्याड़े से मौत होर विनासा ले छुटकारा पाई किन्हें परमेसरा री संताना री साउगी महिमामय अजादी रे साझी हूंणा।

²² क्यूंकि आस्से जाणहां ऐं कि, आदमा रे पाप करणे रे टैमा ले ऐबे तक परमेसरा री रचिरी सारी चीजे पीड़ा मन्झ करलाया होर तड़फया करहा ई, ठीक जिहां एक जनानिया जो बच्चा जमणे रे पैहले पीड़ा हुई।

²³ होर सिर्फ परमेसरा री रचिरी चीजे ई नी पर आस्से भी आपणे आपा मन्झ करलाहें हालांकि आस्से मन्झ पवित्र आत्मा वास करहा, जो आऊणें वाली महिमा रा पैहले ले सुआद चखणे रे रूपा मन्झ आस्सा साउगी आ। पर ऐबे आस्से इंतजार करहा ऐं कि परमेसरा आस्से आपणे सच्चे बच्चे बनाणे, होर ये तेबे हूंणा जेबे तेस आस्सा रे सरीरा जो छुटकारा देणा।

²⁴ ऐबे परमेसरे आस्सा रा उद्धार कितिरा इधी कठे आस्सा वाले ये आसा ई। पर अगर आस्सा वाले पैहले ले कोई चीज हाई जेसरी आस्से आस रखिरी, ता फेरी आगे जो तेता जो पाणे री आस रखणे री जरूरत नी। क्यूंकि जेस चीजा जो कोई देख्या करहा तेता जो पाणे री आस क्या करणी?

²⁵ पर जेस चीजा जो आस्से नी देख्दे, अगर तेता जो पाणे री आस रख्हा ऐं, ता धीरजा किन्हें तेसरा इंतजार भी करहा ऐं।

²⁶ होर इंहां ईं पवित्र आत्मा भी आस्सा री कमजोरी मन्झ मदद करहा, क्यूंकि आस्से नी जाणदे कि प्रार्थना किहाँ करणी चहिए। आस्से बयान नी करी सकदे कि किहाँ पवित्र आत्मा आपु ई करलादें हुए आस्सा रे कठे अर्ज करहा।

²⁷ होर परमेसर जो सभ कुछ जाणहां से पवित्र आत्मा री मना री गल्ला जो जाणहां। क्यूंकि से पवित्र आत्मा परमेसरा रे पवित्र लोका रे कठे परमेसरा री इच्छा रे मताबक अर्ज करहा।

²⁸ होर आस्से जाणहां ऐं कि जो लोक परमेसरा किन्हें प्यार रख्हा ऐं, होर जो परमेसरा री इच्छा रे मताबक चुणिरे तिन्हारे कठे सब गल्ला मिली किन्हें भलाई पैदा करहा ई।

²⁹ क्यूंकि जिन्हों परमेसरे पैहले ले चुणी लितिरा तिन्हो आपणे मह्ठे साहीं बणने रे कठे पैहले ले ठैहराई भी आ, ताकि यीसू मसीह परमेसरा रे बाकि संताना रा जेठा बणे।

³⁰ फेरी जिन्हा जो तिन्हें पैहले ले ठैहराया, तिन्हा जो चुणिरा भी आ, होर जिन्हों चुणिरा, परमेसरे स्यों आपणी नजरा मन्झ धर्मी माह्णुं भी बणाईरे, होर जिन्हों परमेसरे आपणी नजरा मन्झ धर्मी माह्णुं बणाईरा, तिन्हा जो आपणी महिमा रे साझीदार भी बणाया।

परमेसरा रा अनंत प्यार

³¹ ता आस्से इन्हा गल्ला जो ध्यान रखदे हुए बोली सके कि, अगर परमेसर आस्सा वखा जो आ, ता कोई आस्सा रा व्रोध नी करी सकदा।

³² परमेसरे आपणे निज मह्ठे जो भी नी बचाया, पर आस्से सभी रे कठे से व्रोधीया ले पकड़वाया। ता परमेसरे जो कुछ देणे रा वादा आस्सा किन्हें कितिरा से सभ कुछ देणा।

³³ परमेसरा रे साम्हणें आस्से चुणिरे पर कोई दोस नी लगाई सकदा। क्यूंकि परमेसरे ही आस्सो आपणी नजरा मन्झ धर्मी माह्णुं बणाईरे।

³⁴ कोई आस्सा पर सजा रा हुक्म नी देई सकदा। क्यूंकि मसीह यीसू ही से आ जो मरी गया होर मरिरे मन्झा ले भी जिउंदा हुई गया। से परमेसरा रे सीधी वखा जो आ, होर आस्सा रे कठे अर्ज भी करहा।

³⁵ कुछ भी आस्सो मसीहा रे प्यारा ले लग नी करी सकदा। ना दुःख, ना संकट, ना उपद्रव, ना अकाल, ना नंगाईया, ना जोख्म, होर ना खतरा ना मौत।

³⁶ ये आस्सा साउगी तिहां ही हुआ करेया जिहां दाऊदे पवित्र सास्त्रा मन्झ परमेसरा किन्हें बोल्या, “हे परमेसर तुस्सा रे कारण आस्सा पर हर टैम मरणे रा खतरा बणी रैंहयां; आस्से मारी जाणे वाली भेडा साहीं समझे जाहें।”

³⁷ पर इन्हा सभी गल्ला ले आस्से मसीह रे ज्रीए जिन्हें जे आस्सा किन्हें प्यार कितेया, जयवन्ता ले भी बढ़ी किन्हें आ।

^38-39 क्यूंकि हांऊँ पक्का जाणहां कि, आस्सो परमेसरा रे प्यारा ले कोई लग नी करी सकदा, जो आस्सा रे प्रभु मसीह यीसू रे ज्रीए जाहिर हुईरा। चाहे आस्से मरी जाए, या जिउंदे रहे तेता ले कोई फर्क नी आ; ना स्वर्गदूत, ना प्रधानतायें, ना वर्तमान, ना भविस्य, ना सामर्थ, ना ऊंचाई, ना गैहराई होर ना कोई होर रचिरी चीजा आस्सो परमेसरा रे प्यारा ले लग करी सकी।