रोमियो 7 - मंडयाली नंऊँआं नियम

सादीसुधा जिन्दगी ले उदाहरण

¹ हे भाईयो बैहणो, तुस्से बिधियो जो जाणांहे कि जेबे तक माह्णुं जिउंदा रैंहयां, तेबे तक ही मूसा री व्यवस्था रा हक तिन्हारा पर रैंहयां।

^2-3 उदाहरणा रे कठे बिधि रे मताबक एक जन्नानी आपणे लाड़े किन्हें जिन्दे जी तेस किन्हें बझीरी। पर जेबे तेस्सा रा लाड़ा मरी जां, ता से केसी होरी किन्हें ब्याह करणे रे कठे अजाद ई। हालांकि अगर लाड़े रे जिन्दे जी से केसी दूजे माह्णुं वाले चली जाईं, ता तेस्सा जो व्यभिचारणी बोल्या जां।

⁴ ता हे मेरे भाईयो होर बैहणो, जेबे तुस्से मसीह साउगी मरी गये तेबे तुस्से व्यवस्था रे कठे मरिरे बणी गये, ताकि तुस्से मसीह रे हुई जाओ, जो मरिरे मन्झा ले जिउंदा हुई गईरा। होर तुस्से परमेसरा री सेऊआ करी सके।

⁵ क्यूंकि जेबे आस्से पापा रे स्वभावा रे अधीन थे, ता व्यवस्था सक्ति पाई किन्हें आस्सा री पापा री इच्छा जो बढ़ाई देईं थी, जो मौता वखा जो लेई जाईं थी।

⁶ जेस व्यवस्था री कैदा मन्झ आस्से थे तेता रे कठे आस्से मरी गये। होर ऐबे व्यवस्था ले छुटी गये ताकि ऐबे आस्से पवित्र आत्मा रे मताबक नौंईं रीती किन्हें परमेसरा सेऊआ करी सके, ना कि तेस्सा पुराणी रीती पर जेबे आस्से लिखिरी व्यवस्था जो मन्ने थे।

मूसा री व्यवस्था होर पाप

⁷ ता आस्से क्या बोलिए? क्या मूसा री व्यवस्था पाप ई? नी कधी नी! पर ये व्यवस्था ई थी जिन्हें मेरे पाप मेरे पर जाहिर किते। अगर व्यवस्था मन्झ ये नी लिखिरा हुंदा कि, “लालच मत कर, ता हांऊँ नी जाणी पांदा कि लालच करणा पाप आ।”

⁸ पर पापे मौका पाई किन्हें हुक्मा रे ज्रीए मेरे मन्झ सभ किस्मा रा लालच पैदा कितेया, क्यूंकि मूसा री व्यवस्था रे बगैर पाप मुर्दा आ।

⁹ एक टैम था जेबे हांऊँ बगैर मूसा री व्यवस्था जाणे जिया था, पर जेबे हांऊँ व्यवस्था जो जाणी गया, ता पाप मेरे पर असर करदा लगेया, होर एता ले एह्ड़ा लगेया कि हांऊँ मरी गया।

¹⁰ होर जिन्हा हुकमा जो परमेसरे दितिरा था कि हांऊँ जिउंदा रहूँ, से ही मुंजो मरणे री सजा देई गई।

¹¹ क्यूंकि पापे मौका पाई किन्हें हुक्मा रे ज्रीए हांऊँ धोखा दितेया, होर एह्ड़ा लगा कि एता रे ज्रीए हांऊँ मरी ही गया।

¹² इधी कठे आस्से बोली सके कि मूसा री व्यवस्था पवित्र ई, होर हुक्म भी पवित्र, धर्मी होर खरा आ।

पापा ले बचाणे मन्झ व्यवस्था नाकामयाब

¹³ ता क्या से व्यवस्था जो खरी, मेरे मरणे री वजहा बणी? नी कधी नी! पापे ही एह्ड़ा कितेया। पापे ही तेस व्यवस्था जो लेई किन्हें जो खरी, मुंजो मौत देई गई। एह्ड़ा करणे ले पापे जाहिर कितेया कि तेसरी असलीयत क्या ई, होर हुक्मे ये जाहिर कितेया कि पाप बौह्त ज्यादा बुरा।

¹⁴ क्यूंकि आस्से जाणहां ऐं कि मूसा री व्यवस्था ता आत्मिक ई, पर हांऊँ सिर्फ एक माह्णुं आ होर पापा रा गुलाम आ।

¹⁵ होर जो कुछ हांऊँ करहा, तेता जो हांऊँ नी समझ्दा, होर जो कुछ हांऊँ करणा चाहां, से हांऊँ हमेसा नी करदा, होर जेस चीजा ले मुंजो नफरत हुंहाँ ईं, सेई चीज हांऊँ हमेसा करहा।

¹⁶ होर अगर जो हांऊँ नी चाहन्दा स्यों ही बुरे काम करहा, ता हांऊँ मनी लैहां कि, मूसा री व्यवस्था खरी ई।

¹⁷ ता एह्ड़ी हालता मन्झ जो तेस बुरे काम जो करहा से हांऊँ नी, पर जो मेरे अंदर पाप बस्सिरा से ही करहा।

¹⁸ क्यूंकि हांऊँ जाणहां कि, जो पापा रा स्वभाव मेरे मन्झ आ से कोई खरी चीज नी करदी, भले काम करणे री इच्छा ता मेरे मन्झ हाई, पर खरे काम मेरे ले बणदे।

¹⁹ क्यूंकि जेस खरे कामा करणे री इच्छा हांऊँ करहा, से ता हांऊँ नी करदा, पर जेस बुराई रे काम करणे री इच्छा हांऊँ नी करदा सेई हांऊँ करदा रैंहयां।

²⁰ पर अगर हांऊँ तेह्ड़ा ई करहा जेसरी इच्छा हांऊँ नी करदा, ता तेता रा करणे वाल़ा हांऊँ नी हाया, पर पाप जो मेरे मन्झ बस्सिरा।

²¹ एस वजहा ले मुंजो एस सच्च रा पता लगा कि, जेबे हांऊँ भलाई करणे री इच्छा करहा, ता हांऊँ बुरा ही करहा।

²² क्यूंकि हांऊँ पूरे दिला ले ता परमेसरा री व्यवस्था पर खुस रैंहयां।

²³ पर मुंजो आपणे सरीरा रे अंगा मन्झ पापा रा स्वभाव सुझ्हा, जो परमेसरा री व्यवस्था किन्हें लड़हा, होर ये पापा रा स्वभाव जो मेरे सरीरा मन्झ बस्सिरा से मुंजो आपणा कैदी बणा।

²⁴ हांऊँ केह्ड़ा बदनसीब माह्णुंआं! कोस हांऊँ एस सरीरा मन्झ बस्सिरे पापा रे स्वभावा ले बचाणा जो मौत लेई आहूँआं?

²⁵ हांऊँ परमेसरा रा धन्यावाद करहा जिन्हें प्रभु यीसू मसीह रे ज्रीए हांऊँ बचाया, सारा मतलब ये आ कि हांऊँ आपणे दिला ले चाहां कि परमेसरा री व्यवस्था जो मन्नू, पर पापा रे स्वभावा री वजहा ले हांऊँ पापा रा गुलाम आ।