रोमियो 5 - मंडयाली नंऊँआं नियम

परमेसरा किन्हें मेल मिलाप

¹ इधी कठे यीसू मसीह पर विस्वास करणे रे वजहा ले परमेसरे आस्से आपणी नजरा मन्झ धर्मी माह्णुं बणाए, क्यूंकि प्रभु यीसू मसीहे जो आस्सा रे कठे कितिरा जेसरे ज्रीए आस्सा रा परमेसरा साउगी मेल मिलाप हुआ।

² आस्सा रे विस्वास करणे रे ज्रीए मसीहे आस्सा पर अनुग्रह कितेया, जेसरे ज्रीए आस्से टिकीरे, होर आस्से हिम्मत होर खुसी साउगी परमेसरा री महिमा जो बांडणे रे कठे उत्सुक ऐं।

³ सिर्फ येई नी, पर आस्से दुःखा जो सैहण रे कठे भी खुस हुयें, एह्ड़ा जाणी किन्हें कि दुःखा सैहण करणे ले सबर बधां।

⁴ क्यूंकि आस्से ऐबे सिखिरा कि कियां सबर रखणा चहिए, इधी कठे परमेसरे आस्सो मंजूरी दितिरी, क्यूंकि तिन्हें आस्सो मंजूरी देई दितिरी, इधी कठे आस्सा वाले आस ई।

⁵ होर ये आस आस्सा जो दुआस नी करदी क्यूंकि परमेसरे आस्सा जो पवित्र आत्मा दितिरी, होर से पवित्र आत्मा आस्सा रे दिला जो परमेसरा रे प्यारा किन्हें भरा।

⁶ क्यूंकि जेबे आस्से कमजोर थे, ता परमेसरा रे नियुक्त टैमा पर मसीह यीसू आस्सा पापी लोका रे कठे मरेया।

⁷ धर्मी माह्णुं रे कठे आपणी जान देणा लोका रे कठे मुस्किल आ, पर हुई सक्हा कि कोई माह्णुं केसी भले माह्णुं रे कठे आपणी जाण देणे रे कठे त्यार हुई जाये।

⁸ पर परमेसर आस्सा पर आपणे प्यारा री भलाई एस तरहा जाहिर करहा कि, जेबे आस्से पापी ही थे ता मसीह यीसू आस्सा रे कठे मरेया।

⁹ क्यूंकि मसीहे रे खून बहाई किन्हें आस्सा रे पाप रे कठे मरणे रे ज्रीए परमेसरे आस्से आपणी नजरा मन्झ धर्मी माह्णुं बणाए, इधी कठे मसीहा आस्से परमेसरा रे गुस्से ले पक्का बचाणे।

¹⁰ क्यूंकि जेबे आस्से परमेसरा रे बरखलाप थे ता तेसरे मह्ठे री मौता रे ज्रीए आस्सा रा मेल मिलाप परमेसरा साउगी कुराया गया। जेबे कि मसीह ऐबे जिउंदा ये पक्की गल कि तेस आस्सा रा उद्धार करणा।

¹¹ होर सिर्फ येई नी, ऐबे ता प्रभु यीसू मसीह रे ज्रीए आस्सा रा परमेसरा किन्हें मेल मिलाप हुई गया, इधी कठे आस्से परमेसरा मन्झ खुस ऐं।

आदमा रे ज्रीए मौत, मसीह रे ज्रीए जिन्दगी

¹² इधी कठे जिहां कि एक माह्णुं आदमा रे ज्रीए पाप एस संसारा मन्झ आया जो परमेसरा रा पैहला बणाईरा माह्णुं था। होर आदम पाप करणे री वजहा ले से मरेया, होर इंहां ही संसारा मन्झ जिउंदे सभ माह्णुं मरी गये, क्यूंकि ये एह्ड़ी गल थी कि जिहां आदमे पाप कितेया ता सभी लोके पाप कितेया।

¹³ परमेसरे मूसा जो व्यवस्था देणे रे पैहले ही पाप संसारा मन्झ था, पर जेथी व्यवस्था नी, तेथी पाप भी नी गिणी जांदा।

¹⁴ तेबे भी आदमा ले लई किन्हें मूसा तक सभ लोके पाप कितेया, होर स्यों सभ मरी गये; एथी तक कि स्यों लोक भी मरी गये; जिन्हें जे परमेसरा रे हुक्म नी टाल्या था, जिहां जे आदमे सीधे परमेसरा ले पाईरे हुकमा जो टाल्ली दितिरा था। जेबे आदम आया ता तेसरे पापा री वजहा ले सभी लोका री जिन्दगी पर असर पया, ठीक तिहां ईं जेबे यीसू मसीह संसारा मन्झ आया ता तेसरा भी सभी लोका री जिन्दगी जो पापा ले बचाणे रा असर पया।

¹⁵ पर आदमा रे पाप होर परमेसरा रे अनुग्रहा रे दाना मन्झ बौह्त फर्क आ। क्यूंकि आदमा रे पापा री वजहा ले सभ लोका मरी गये, पर एस ले बड़ी किन्हें यीसू मसीह रे ज्रीए कई लोका जो परमेसरा रा बड़ा अनुग्रह होर धार्मिकता रा दान मिलेया।

¹⁶ पर परमेसरा रे दाना री तुलना आदमा रे पापा किन्हें नी किती जाई सक्दी। क्यूंकि एक माह्णुं रे पापा रे वजहा ले तेस पर होर तेस साउगी सभ माह्णुं जो सजा मिली, हालांकि आस्से बौह्त ज्यादा पाप किते पर परमेसरा रे आस्सा जो आपणा दान दितेया जिन्हें आस्से तेसरी नजरा मन्झ धर्मी माह्णुं बणाए।

¹⁷ क्यूंकि एक माह्णुं आदमा रे पाप री वजहा ले सभ लोक मरी गये। पर यीसू मसीह रे ज्रीए आस्सा पर बौह्त बडा अनुग्रह हुआ, होर परमेसरे आस्से आपणी नजरा मन्झ धर्मी माह्णुं बणाए। होर यीसू मसीह पर विस्वास करणे रे ज्रीए आस्सो अनंत जिन्दगी मिलणी होर आस्सा यीसू मसीह साउगी राज करणा।

¹⁸ इधी कठे जिहां आदमा रे पापा री वजहा ले परमेसरे सभ लोका जो सजा दिति, ठीक तिहां ईं यीसू मसीह रे धार्मिकता रे काम करणे रे ज्रीए सभ माह्णुं जो जिन्दगी मिली, होर स्यों परमेसरा री नजरा मन्झ धर्मी माह्णुं बणे।

¹⁹ क्यूंकि जिहां एक माह्णुं रे हुक्म नी मनणे ले बौह्त लोक पापी बणे, तिहां ही एक माह्णुं रे हुक्म मनणे री वजहा ले बौह्त लोका परमेसरा री नजरा मन्झ धर्मी माह्णुं बणे।

²⁰ परमेसरे आपणी व्यवस्था मूसा जो इधी कठे दिती, ताकि लोक ये जाणी सके कि स्यों कितना भारी पाप करी चुकिरे, पर जेबे लोके होर भी ज्यादा पाप किते, तेथी परमेसरे आपणा अनुग्रह होर भी ज्यादा कितेया।

²¹ परमेसरे ये इधी कठे कितेया क्यूंकि लोक पाप करी किन्हें मरदे लगिरे थे, पर यीसू मसीह रे ज्रीए परमेसरा रा अनुग्रह तिन्हो तेसरी नजरा मन्झ धर्मी माह्णुं बणा होर अनंत जिन्दगी देआ।