रोमियो 2 - मंडयाली नंऊँआं नियम

परमेसरा रा न्याय

¹ तुस्सा जो लगा कि तुस्से एह्ड़े लोका पर दोस लगाई सके, पर हे दूजे पर दोस लगाणे वाले, तू चाहे कोई भी हो, ऐबे तेरे वाले कोई भाना नी आ। क्यूंकि जेस गल्ला मन्झ तू दूजे पर दोस ल्गाहां, तेस ई गल्ला मन्झ तू आपणे आपा जो भी दोसी बणाहां, क्यूंकि जो दोस तू दूजे पर ल्गाहां, तेह्ड़ा ई काम तू आपु भी करहा।

² होर आस्से जाणहां ऐं कि, परमेसर धर्मी आ होर तेस एह्ड़े-एह्ड़े काम करणे वाले रा न्याय करणा होर तिन्हो आपणी धार्मिकता रे मताबक सजा देणी।

³ होर तू जो एह्ड़े बुरे काम करणे वाले पर दोस ल्गाहां, होर आपु भी तेह्ड़ा ई काम करहा, क्या तू ये समझ्हा कि तुध परमेसरा री सजा ले बची जाणा? नी कधी नी।

⁴ क्या तू परमेसरा री असीम कृपा, होर सैहनसीलता, होर सब्रा जो बेकार जाणहां? होर क्या तू ये नी समझ्दा कि, परमेसरा री कृपा तुजो पाप करणा छाडणा स्खाहीं?

⁵ पर एह्ड़ा करणे रे बजाय, तू जिद्दी हुई किन्हें पाप करणा नी छाडदा, इधी कठे परमेसरा तुजो सख्त सजा देणी, होर जेस ध्याड़े परमेसरा गुस्से हूंणां तेस ध्याड़े परमेसरा रा न्याय धार्मिकता साउगी जाहिर हूंणां।

⁶ परमेसरा हर एकी जो तेसरे कामा रे मताबक इनाम देणा।

⁷ जो लोक खरे कामा जो करदे हुए परमेसरा री वखा ले मिलणे वाली महिमा, आदर होर कधी ना खत्म हूंणे वाली जिन्दगी री तोपा मन्झ रैंहयां ऐं, परमेसरा तिन्हा सभी जो अनंत जिन्दगी देणी।

⁸ पर जो सिर्फ आपणे बारे मन्झ सोचा ऐं होर सच्चाई जो नी मन्नदे, पर बुराई करना चाहें, परमेसरा रा गुस्सा होर कैहर तिन्हा पर पऊणा।

⁹ जो बुराई करहा तिन्हा सभी माह्णुंआं पर दुःख होर संकट आऊंणा। परमेसरा पैहले यहूदी लोका रा न्याय करणा, फेरी गैर-यहूदी लोका रा न्याय करणा।

¹⁰ होर जो खरे काम करहा तेस जो महिमा होर आदरा होर सांति मिलणी, पर परमेसरा इन्हा गल्ला जो पैहले यहूदी लोका जो फेरी गैर-यहूदी लोका जो देणी।

¹¹ क्यूंकि परमेसरा सभीरा न्याय एक बराबर करहा।

व्यवस्था रे ज्रीए उद्धार नी आ

¹² इधी कठे कि गैर-यहूदी लोको बगैर मूसा री व्यवस्था जो पाये पाप कितेया, परमेसरा तिन्हा जो व्यवस्था रे मताबक सजा नी देणी, होर जिन्हें लोके मूसा री व्यवस्था पाई किन्हें पाप कितेया, परमेसरा तिन्हा जो व्यवस्था रे मताबक सजा देणी।

¹³ क्यूंकि जो सिर्फ मूसा री व्यवस्था सुणने वाले ऐं, स्यों परमेसरा री नजरा मन्झ धर्मी माह्णुं नी ऐं, पर जो व्यवस्था जो मन्हा ऐं, तिन्हा ई परमेसरा री नजरा मन्झ धर्मी माह्णुं बणना।

¹⁴ फेरी जेबे गैर-यहूदी लोका जिन्हा वाले मूसा री व्यवस्था नी हाई, पर स्यों व्यवस्था री कुछ गल्ला जो कुदरती तरीके ले मनी ले, ता चाहे तिन्हा वाले व्यवस्था नी हाई तेबे भी स्यों एस गल्ला जो जाहिर करहे कि तिन्हारे मना मन्झ एक व्यवस्था बसीरी।

¹⁵ स्यों एस गल्ला जो दस्हा ऐं कि परमेसरा री व्यवस्था तिन्हारे दिला मन्झ लिखिरी, होर तिन्हारी अंतरात्मा भी एस गल्ला री गुआही देई कि ये सच्च आ, क्यूंकि तिन्हारी सोच तिन्हो लगातार दोस ल्गाहीं, या तिन्हा जो बेकसूर बणाहीं।

¹⁶ एह्ड़ा तेबे हूंणा जेस ध्याड़े परमेसरा मेरे ज्रीए प्रचार कितिरे खुसी री खबरा रे मताबक यीसू मसीहा रे ज्रीए माह्णुंआं री लुख्ही री गल्ला रा न्याय करणा।

यहूदी लोक होर मूसा री व्यवस्था

¹⁷ पर तुस्सा मन्झ ले कुछ लोक आपणे आपा जो यहूदी बोल्हा ऐं, होर मूसा री व्यवस्था पर विस्वास करहा ऐं, होर एस बारे मन्झ बडयाई करहा ऐं कि तुस्से परमेसरा रे खास लोक ऐं।

¹⁸ होर तुस्से जाणांहे कि परमेसरा तुस्सा ले क्या चाहां होर तुस्से जाणांहे कि कुण गल्ला खरी, क्यूंकि मूसा री व्यवस्था ले तुस्से यूँ गल्ला सिखिरी।

¹⁹ होर तुस्सा जो एस गल्ला पर पूरा भरोसा कि तुस्सा काणेया जो परमेसरा रा रस्ता दसणा, होर जो नह्यारे मन्झ भटक्या करहा ऐं तिन्हारे कठे तू प्रयासा आ।

²⁰ होर नर्क्कले जो स्खाणे वाले, होर बच्चे रा उपदेसक ऐं, होर तुस्सा जो पक्का कि, परमेसरा री व्यवस्था तुस्सा जो पूरी सच्चाई होर ज्ञान सिखाई।

²¹ इधी कठे कि तुस्से जे होरी जो स्खाहें, आपणे आपा जो किधियो नी स्खान्दे? तू जो चोरी नी करणा सखा, होर आपु किधियो चोरी करहा?

²² तू बोल्हा कि, “व्यभिचार नी करणा,” होर आपु किधियो व्यभिचार करहा? तू जो मूर्ति ले नफरत करहा, होर आपु किधियो मन्दरा जो लुट्हा।

²³ तू जो बडयाई करहा कि तू परमेसरा री व्यवस्था जो जाणहां किधियो परमेसरा री व्यवस्था जो नी मनी किन्हें परमेसरा री बेज्जती करहा?

²⁴ इधी कठे पवित्र सास्त्रा मन्झ भी लिखिरा, “क्यूंकि तुस्सा यहूदी लोका री वजहा ले गैर-यहूदी लोका मन्झ परमेसरा रे नांऊँआं री निंदा हुंहाँ ई।”

खतने कुराणे रा फायदा नी

²⁵ अगर तू मूसा री व्यवस्था जो मन्ना, ता तेरा खतने कुराणे ले तुजो फायदा, पर अगर तू व्यवस्था जो नी मन्ने, ता तुस्से जे खतना कुराहें होर गैर-यहूदी जो खतना नी कुरांदे, ता तुस्सा दुहीं मन्झ कोई फर्क नी आ।

²⁶ अगर केसी रा खतना नी हुईरा हो होर से मूसा री व्यवस्था री बिधिया जो मन्ने, ता परमेसरा रे कठे से होर खतना कुराईरा आदमी दुहें बराबर ऐं।

²⁷ होर जो माह्णुं बगैर खतने कितरे ही मूसा री व्यवस्था जो मना, तेस तू दोसी ठैहराणा, क्यूंकि तेरे वाले व्यवस्था ई होर खतना भी हुईरा पर फेरी भी तू व्यवस्था जो नी मनदा।

²⁸ सच्चा यहूदी से नी आ, जेसरा जन्म यहूदी लोका मन्झ हुईरा या जेसरा खतना हुईरा।

²⁹ पर सच्चा यहूदी लोक सेई आ, जिन्हारा मन परमेसरा रे साम्हणें सच्चा आ; होर सच्चा खतना सेई आ, जो पवित्र आत्मा रे कामा रे ज्रीए दिला रा खतना हुआ। ना कि मूसा री व्यवस्था जो मनणे रे ज्रीए हुईरा। एह्ड़े लोका री बड़ाई माह्णुं नी पर परमेसर आपु करहा।