प्रकासना री गल्ला 9 - मंडयाली नंऊँआं नियम

पान्जुहीं तुरही

¹ होर जेबे पान्जुए स्वर्गदूते तुरही बजाई, ता मैं स्वर्गा ले धरती पर एक तारा पऊन्दा हुआ देख्या। होर तेस तारे जो डुगहे गड्ढे जो खोलणे री चाबी दितिरी थी।

² होर तिन्हें तेस डुगहे गड्ढे जो खोलेया, होर तेस गड्ढे रा धूआं बडी भठे रे धूएं साहीं उठेया। होर गड्ढे रे धुएं किन्हें सूरज होर हाऊआ काली हुई गई।

³ होर तेस धुएं मन्झा ले धरती पर टिटले निकले। होर तिन्हा जो बिछुआ साहीं धरती रे लोका जो डसणे री सक्ति दिती गई।

^4-5 होर तिन्हा टिटले किन्हें बोल्या गया कि ना धरती री घाह जो, ना केसी बूटे जो, ना केसी डाला जो नुकसान पुजाया। सिर्फ तिन्हा माह्णुंआं जो पांज महीने तक एह्ड़ी पीड़ा देंदे रैहया, जिहां जे बिछुआ रे डसणे ले पीड़ हुई। ये स्यों लोक ऐं जिन्हारे माथे पर परमेसरा री मोहर नी लगिरी थी।

⁶ तिन्हा पांज महीने रे बीचा मन्झ लोका मरणे री कोसिस करणी, पर तिन्हा नी मरणा। होर मरणे री इच्छा ता करणी, पर फेरी भी नी मरणा।

⁷ होर ये टिटले युद्ध करणे रे कठे त्यार कितिरे घोड़े साहीं सुझ्या करहा ई थे। तिन्हें आपणे मूंडा पर सोने रे ताजा साहीं कुछ की पैहनी रा था। होर तिन्हारे मुंह लोका रे मुंहा साहीं थे।

⁸ होर तिन्हारे बाल ज्नानिया रे वाल़ा साहीं लंबे थे, होर दांद सेरा रे दांदा साहीं तेज थे।

⁹ होर तिन्हें आपणी छाती पर लोहे रे बणिरे झिलम पैहनीरे थे। होर जेबे स्यों उडदे लगिरे थे, ता तिन्हारे फान्खा ले एह्ड़ी अवाज निकली करही थी, जिहां कि बौह्त सारे घोड़े रथा जो लेई किन्हें लड़ाई रे कठे दौड़े।

¹⁰ होर तिन्हारी पूंछ मन्झ डंक बिछुआ साहीं थी, होर तिन्हा जो पांज म्हीने तक लोका जो पीड़ा देणे री जो सक्ति थी, से तिन्हारे पूंछा रे डंका मन्झ थी।

¹¹ डुगहे गड्ढे रा दूत टिटले रा राजा था। होर ये सेई दूत आ जिन्हें तेस गड्ढे जो खोलिरा था। इब्रानी भासा मन्झ तेसरा नांऊँ अब्द्दौन आ, होर यूनानी भासा मन्झ अपुल्लयोन आ। होर “दुहीं नांऊँआं रा मतलब आ नास करणे वाल़ा।”

¹² पांज महीने बाद ये पैहला बडा कैहर खत्म हुआ गया। पर एता ले बाद दो कैहर होर आऊणें वाले ऐं।

छठुहीं तुरही

¹³ होर जेबे छठुहे स्वर्गदूते तुरही बजाई ता सोने री बेदी जो परमेसरा रे साम्हणें ई, होर जेता रे प्र्याहले धुप भखाहें, तेता रे चारों कुणेया मन्झा ले मैं एक अवाज सुणी।

¹⁴ तेस अवाजे छठुहे स्वर्गदूता किन्हें जेस वाले जे तुरही थी, तेस किन्हें बोल्या, “तिन्हा चार दूता जो खोल्ही देआ, जो बडी फरात दराऊआ रे नेडे बझिरे थे।”

¹⁵ होर स्यों चारो दूत खोल्ही दिते, होर स्यों पैहले ले ही त्यार थे। होर तिन्हो बोलिरा था कि, एस टैम, एस ध्याड़े, एस म्हीने होर एस साला जो न्हायल्दे रैहया। होर ऐबे टैम आई गईरा था। होर तिन्हा संसारा रे एक तिहाई लोक मारी देणे।

¹⁶ तिन्हें घोड़े पर सुआर स्पाही री एक बौह्त बडी सेना कठ्ठा किती, होर मैं तिन्हारी गिणती सुणी कि, स्यों बीह करोड़ लोक ऐं।

¹⁷ मैं दर्सना मन्झ जिन्हा घोड़े जो होर तिन्हारे सुआर जो देखिरा था, स्यों एह्ड़े सुझ्हे थे: तिन्हारी झिलम आगी साहीं लाल रंगा री, होर धुआं साहीं नीले रंगा री, होर गन्धका साहीं पिऊले रंगा री थी। होर तिन्हा घोड़े रे मूंड सेरा रे मूंडा साहीं सूझहा थे, होर तिन्हारे मुंहा ले आग, धूआं, होर गंधक निकल्या करहा ई थी।

¹⁸ तिन्हा घोड़े रे मुंहा ले निकल्ने वाले तीन भयानक कैहर, जो की आग, धूआं होर गंधक ई, तेता री वजहा ले धरती रे एक तिहाई लोक मरी गये।

¹⁹ इन्हें घोड़े आपणे मुंहा होर पूंछा ले लोका जो पीड़ा दिती, इधी कठे स्यों लोक मरी गये। क्यूंकि तिन्हा घोड़े रे पूंछा मन्झ कुछ एह्ड़े मूंड थे, जो सांपा रे मूंडा साहीं थे। होर स्यों तेस पूंछा ले लोका जो पीड़ा दे थे।

^20-21 होर बाकि लोक जो एस भयानक कैहरा ले नी मरिरे थे, तिन्हें ऐबे भी बुरे काम करणा नी छाडीरे थे। होर तिन्हें खून करणा, जादू टोणा करणा, व्यभिचारा करणा, होर चोरी करणा, एह्ड़े-एह्ड़े पापा जो करणा नी छाडेया था। तिन्हें दुस्टात्मा री होर आपणे हाथा ले बणिरे चीजा यानि मूर्तिया री अराधना करना नी छाडेया था। से मूर्ति सोने, चांदी, पीतल पात्थर होर लकड़ी री बणीरी थी, होर ना ता स्यों देखी सकदी, ना सुणी सकदी, होर ना चली सकदी थी।