प्रकासना री गल्ला 8 - मंडयाली नंऊँआं नियम

सातुहीं मोहर-तुरहीयां होर सोने री धूपदानी

¹ फेरी छेलू सातुहीं मोहर खोल्ही ता स्वर्गा मन्झ कोई आधा घंटे तक सन्नाटा छाई रैंहयां।

² फेरी मैं परमेसरा रे साम्हणें खड़े हूंणे वाले सात स्वर्गदूता जो देख्या, होर तिन्हा जो सात तुरहिया दिती गईरी थी।

³ फेरी तेथी ले दूजा स्वर्गदूत आई किन्हें धूपा री बेदी वाले खड़ी गया। तेस स्वर्गदूता वाले सोने री धूपदानी थी, होर तेस जो बौह्त सारा धूप दितेया कि से सभ परमेसरा रे पवित्र लोका री प्रार्थना समेत तेस जो भ्खाई सके। तिन्हें तेस धूपा जो होर प्रार्थना जो सोने री तेस्सा बेदी पर भ्खाई, जो परमेसरा री राजगद्दी रे साम्हणें थी।

⁴ होर जो धूप स्वर्गदूते भ्खाई रा था तेस धूपा रा धुआं परमेसरा रे पवित्र लोका री प्रार्थना समेत परमेसरा रे साम्हणें पूजी गया।

⁵ होर स्वर्गदूते धूपदानी लई किन्हें से भखिरे कोयले किन्हें भरी दिती, जो बेदी पर रखिरी थी, होर धरती पर डयाई दिती। होर जेस ले बिजलिया री चमक होर बादला री गड़गड़ाहट री अवाज, होर हिलण हुन्दा लगेया।

सात तुरही-पैहली तुरही

⁶ होर स्यों सात स्वर्गदूत जिन्हा वाले सात तुरहिया थी, तिन्हा जो बजाणे रे कठे त्यार हुए।

⁷ जेबे पैहले स्वर्गदूते तुरही बजाई, तेबे झटपट बौह्त सारा सुणाट होर आगी खूना साउगी मिली किन्हें धरती पर डयाई दितेया गया। जेसरी वजहा ले एक तिहाई धरती फुख्ही गई, होर एक तिहाई डाल फुख्ही गये, होर एक तिहाई हरी घाह फुख्ही गई।

दूजी तुरही

⁸ होर दूजे स्वर्गदूते तुरही बजाई, ता एह्ड़ा लग्या कि बड़े पहाड़ साहीं कोई चीज समुद्रा मन्झ डयाई दिती, जेसरी वजहा ले समुद्रा रा एक तिहाई हिस्सा खून बणी गया।

⁹ होर समुद्रा मन्झ रैहणे वाले एक तिहाई जानवर मरी गये, होर एक तिहाई समुद्री जहाज नास हुई गये।

त्रीजी तुरही

¹⁰ होर त्रीजे स्वर्गदूते तुरही बजाई, होर एक बडा तारा जो एह्ड़ा भखी करहा था, जिहां कोई दिऊआ भख्हिरा हो; से तारा आसमाना ले टूटेया होर दराऊआ रे एक तिहाई हिस्से पर, होर पाणी रे झरने पर पई गया।

¹¹ होर तेस तारे रा नांऊँ नागदौना था (से एक किस्मा रा कोऊड़ा बूटा था) तेता री वजहा ले एक तिहाई पाणी नागदौना साहीं कौड़ा हुई गया, होर बौह्त सारे माह्णुं तेस कौड़े पाणी री वजहा ले मरी गये।

चौथी तुरही

¹² होर चौथे स्वर्गदूते तुरही बजाई, तेबे सूरजा री एक तिहाई, होर चांदा री एक तिहाई होर तारे री एक तिहाई कोई चीज आई किन्हें बजी होर से टूटी गये। जेसरी वजहा ले ध्याड़ीया रे एक तिहाई टैमा तक सुरजे प्रयासा नी कितेया, होर तिहां ई राती मन्झ एक तिहाई टैमा तक चांद होर तारे भी प्रयासा नी कितेया।

¹³ होर तेबे मैं देखेया कि एक ईल्लण आसमाना पर बौह्त गास उडी करहा ई थी, होर तेस जो मैं उच्ची अवाजा मन्झ ये बोल्दे सुणेया कि, “जेबे आखरी रे तीन स्वर्गदूता जेबे आपणी तुरही बजाणी, ता संसारा मन्झ रैहणे वाले लोका पर कैहर! कैहर! बौह्त बडा कैहर आऊंणा!”