प्रकासना री गल्ला 7 - मंडयाली नंऊँआं नियम

^1-2 एता ले बाद मैं धरती रे चारो कुणे पर चार स्वर्गदूत खड़ीरे देखे। होर तिन्हों स्वर्गदूता जो परमेसरे हक दितिरा था कि स्यों संसारा रा बुरी ब्मरिया लगाई किन्हें नुकसान करहे। चाहे समुद्र मन्झ या जमीन पर, होर तिन्हें हाऊआ जो संसारा रे चारो वखा ले रोकी लितेया। इधी कठे समुद्र मन्झ, या जमीन पर, होर जंगला मन्झ हाऊआ नी चलदी लगिरी थी। फेरी मैं दूजे स्वर्गदूता जो पुरबा दिसा ले ऊपरा वखा जो आऊंदे देख्या, तेस वाले परमेसरा री मोहर थी जो हमेसा रे कठे जिउंदी, तिन्हें स्वर्गदूते इन्हा चारो स्वर्गदूता किन्हें उची अवाजा लगाई किन्हें बोल्या,

³ “जेबे तक आस्से आपणे परमेसरा रे सेऊआदारा रे माथे पर तिन्हा बुरी ब्मरिया ले बचने रे कठे मोहर नी ल्गाई दे, तेबे तक जमीना रा, समुद्रा रा, होर जंगला रा नुकसान देख्या करदे।”

इस्राएल देसा रे 144,000 लोक

⁴ होर जेबे स्वर्गदूते मोहर ल्गाई दिती, तेबे केसिए मेरे किन्हें बोल्या कि, जिन्हा लोका रे माथे पर परमेसरा री मोहर लगिरी, तिन्हारी गिणती एक लाख चुताली हजार थी। ये लोक इस्राएला रे बारा गोत्रा मन्झा ले थे।

⁵ यहूदा रे गोत्रा मन्झा ले बारा हजारा पर मोहर ल्गाई दिती। रुबेना रे गोत्रा मन्झा ले बारा हजारा पर, गादा रे गोत्रा मन्झा ले बारा हजारा पर।

⁶ असेर गोत्रा मन्झा ले बारा हजारा पर, नप्ताली रे गोत्रा मन्झा ले बारा हजारा पर, मनस्से रे गोत्रा मन्झा ले बारा हज़ारा पर मोहर ल्गाई दिती।

⁷ समौन रे गोत्रा मन्झा ले बारा हज़ारा पर, लेवी लोका रे गोत्रा मन्झा ले बारा हजारा पर, इस्साकारा रे गोत्रा मन्झा ले बारा हजारा पर।

⁸ जबूलून रे गोत्रा मन्झा ले बारा हजारा पर, युसुफा रे गोत्रा मन्झा ले बारा हजारा पर, होर बिन्यामिना रे गोत्रा मन्झा ले बारा हजारा पर मोहर ल्गाई दिती।

चिटे कपड़े पैहनीरे एक बडी भीड़

⁹ एता ले बाद मैं देख्या कि मेरे साम्हणें एक बडी भीड़ खड़ी थी, जेसरी गिणती कोई नी करी सक्दा था। तेस्सा भीड़ा मन्झ लग-लग देसा रे लोक, होर हर कुला रे लोक, होर जातिया रे लोक, होर लग-लग भासा बोलणे वाले लोक थे, स्यों तेस राजगद्दी होर तेस छेलू रे साम्हणें खड़ीरे थे। तिन्हें चिटे कपड़े पैहनीरे थे, होर खुसी मनाणे रे रूपा मन्झ तिन्हें आपणे हाथा मन्झ खजरे रे पांगे लईरे थे।

¹⁰ होर स्यों उची अवाजा किन्हें बोलदे लगिरे थे कि, “राजगद्दी पर बैठिरे परमेसरा री होर छेलू री बढ़ाई हो, क्यूंकि तू ही आ, जो आस्सा रा उद्धार करी सक्हा।”

¹¹ होर सारे स्वर्गदूत, राजगद्दी रे, अगुवे होर चारो प्राणिया रे चारो पासे खड़ीरे थे। फेरी स्यों राजगद्दी रे साम्हणें तेसरे पैर पर पई गये, होर परमेसरा री अराधना किती। होर तिन्हें बोल्या,

¹² “आमीन! आस्सा रे परमेसरा री बड़ाई, महिमा, धन्यावाद, इज्जत, तेसरा ज्ञान, सामर्थ होर सक्ति जुग-जुग बणी रैहीं। आमीन।”

¹³ एता पर अगुवे मन्झा ले एकिये मेरे ले पूछेया, “क्या तू इन्हा चिटे कपड़े पैहनीरे लोका जो जाणहां? क्या तू जाणहां कि यूयाँ ऐं केथी ले आईरे?”

¹⁴ मैं तेस किन्हें बोल्या, “हे माल्का, हांऊँ नी जाणदा, पर तू आप्हुए जाणहां।” तिन्हें मेरे किन्हें बोल्या, “ये स्यों लोक ऐं, जो तेस महान क्लेसा रे टैमा मरी गईरे थे, होर इन्हें आपणे कपड़े छेलू रे खूना मन्झ धोई किन्हें चिटे कीतिरे, यानि तिन्हारे पाप टाही दितिरे।”

¹⁵ “एस वजहा ले, स्यों परमेसरा री राजगद्दी रे साम्हणें ऐं, होर स्यों परमेसरा रे मन्दरा मन्झ राती-ध्याड़ी तेसरी सेऊआ करहा ऐं; होर जो राजगद्दी पर बैठिरा, तेस तिन्हारे बीचा मन्झ रेहणा, होर स्यों संभाल्ने।

¹⁶ तिन्हा फेरी भूखे होर सोखे नी हूंणां; सूरजा आपणी धूपा ले स्यों नी फुकणे, होर ना कोई गर्मी तिन्हो तपाई सकदी।

¹⁷ क्यूंकि छेलू जो राजगद्दी रे बीचा मन्झ आ, तेस तिन्हारी देखभाल करणी, जिहां पुहाल आपणी भेडा जो संभाला। होर तेस स्यों जिन्दगी देणे वाले पाणी रे झरने वाले लई जाणे, ताकि स्यों तेता मन्झा ले पीये। होर परमेसरा तिन्हारी हाखिया ले सभ आंसू पुन्झी देणे।”