प्रकासना री गल्ला 5 - मंडयाली नंऊँआं नियम

मोहर बंद, कताब होर छेलू

¹ होर जो राजगद्दी पर बैठिरा था, मैं तेसरे सीधे हाथा मन्झ एक कताब देखी, जेता रे दुहीं पासे लिखिरा था। होर से कताब सात मोहर ल्गाई किन्हें बंद करी दितिरी थी।

² फेरी मैं एक सामर्थी स्वर्गदूत देखेया, जो ऊची अवाजा मन्झ बोली करहा था कि, “कुण एह्ड़ा लायक आ, जो एस कताबा री मोहरा जो तोड़ी किन्हें तेता जो खोली सका?”

³ पर ना स्वर्गा मन्झ, ना धरती पर, होर ना पताल लोका मन्झ कोई तेस्सा कताबा जो खोलणे, या एस कताबा मन्झ लिखीरी गल्ला जो पढ़ने रे लायक कोई नी मिल्या।

⁴ होर हांऊँ जोर-जोरा किन्हें रोंदा लग्या, क्यूंकि तेस्सा कताबा जो खोलणे, या तेता मन्झ लिखीरी गल्ला जो पढ़ने रे लायक कोई नी मिल्या।

⁵ तेबे तिन्हा अगुवे मन्झा ले एकी जणे मेरे किन्हें बोल्या, “मत रो, जेस जो यहूदा रे गोत्रा रा सेर बोली जाहाँ, होए जो राजा दाऊदा रा बंस आ, से सैताना ले जीती गईरा। इधी कठे से तिन्हा सात मोहरा जो तोड़ी किन्हें तेस्सा कताबा जो खोलणे रे लायक आ।”

⁶ होर तेबे मैं चारो प्राणी होर तिन्हा अगुवे रे बीचा मन्झ राजगद्दी रे पासे एक छेलू खड़ीरा देखेया। होर तेस छेलु पर एह्ड़े नसाण थे जिहां कि तेसरी बलि करी दितिरी हो। तेसरे सात सींग होर सात हाखिया थी; होर ये परमेसरा री सात आत्मा ई, जो सारी धरती पर भेजी गईरी।

⁷ छेलूए आगे आई किन्हें तेसरे सीधे हाथा ले जो राजगद्दी पर बैठिरा था, तिन्हें तेस ले कताब लई ली।

⁸ होर जेबे तिन्हें से कताब लई लिती, ता स्यों चारो प्राणी होर चौबी अगुवे तेस छेलू रे पैरा पर पई गये। होर हर एकी अगुवे रे हाथा मन्झ सोने रा डोंगा होर वीणा थी, होर से डोंगा तेस धूपा किन्हें भरिरा था, जो परमेसरा रे पवित्र लोका री प्रार्थना जो दसी थी।

⁹ होर स्यों ये नंऊँआं गाणा गान्दे लगे कि, “तू एस कताबा री मोहरा जो तोड़ने, होर खोलणे रे लायक आ, क्यूंकि तू मारी दितिरा था, होर आपणा खून जो तैं क्रूसा प्रयाल्हे बहाईरा था, तेता रे ज्रीए तैं, लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका, परमेसरा रे कठे लोका जो छुड़ाई लितेया।

¹⁰ तैं स्यों राजे बणाहें, होर आस्सा रे परमेसरा री अराधना रा काम करणे रे कठे याजक बणाये, होर तिन्हा धरती पर राजेया साहीं राज करणा।”

स्वर्गदूता रे ज्रीए छेलु री तारीफ

¹¹ होर जेबे मैं दबारा देख्या, ता राजगद्दी रे चारों पासे स्यों प्राणी, अगुवे होर बौह्त सारे स्वर्गदूता री अवाज सुणी, जिन्हारी गिणती लाखा करोड़ा री थी।

¹² होर स्यों उच्ची अवाजा मन्झ बोल्हा ऐं थे कि, “मारी दितिरा छेलू ई बड़ाई रे लायक आ, क्यूंकि तेसरी सामर्थ, धन, ज्ञान होर सक्ति महान ई। तेस जो हमेसा इज्जत होर महिमा मिलणी चहिए।”

¹³ फेरी मैं सभ रची गईरी चीजा जो, जो स्वर्गा मन्झ, होर धरती पर, होर धरती रे हेठ समुद्रा मन्झ ऐं, ये बोल्दे सुणेया कि, “जो राजगद्दी पर बैठिरा, तेसरी होर छेलू री बड़ाई करहे, होर आस्से तेसरी इज्जत करहे, होर तेसरी महिमा हमेसा हुन्दी रहे, होर तेसरी सामर्थ जुग-जुग बणी रहे।”

¹⁴ होर चारो प्राणिये आमीन बोल्या। होर चौबी अगुवे छेलू रे पैरा पर पई गये, होर तेसरी अराधना किती।