प्रकासना री गल्ला 2 - मंडयाली नंऊँआं नियम

इफिसुसा सैहरा री कलीसिया जो संदेस

¹ तिन्हें मेरे किन्हें बोल्या कि, “इफिसुस सैहरा री कलीसिया रे दूत जो ये संदेस लिख कि: हांऊँ ई आ जिन्हें आपणे सीधे हाथा मन्झ सात तारे लईरे, होर हांऊँ सोने रे सात दीऊदानिया रे बीचा मन्झ चल्हा फिरहा। हांऊँ तुस्सा किन्हें ये बोल्हा कि:

² हांऊँ जाणहां कि तू क्या काम करहा, होर कितनी मैहनत करहा, होर ये भी कि तू मेरे पर विस्वास करणे री वजहा ले सबर रखी किन्हें दुःख सहन करा। हांऊँ जाणहां कि तू बुरे लोका रे झूठे उपदेसा जो नी झल्दा। होर जो लोक आपणे आपा जो चुणिरा चेला बोल्हा ऐं, पर सच्चे हाए नी, एह्ड़े लोका जो तैं परखिरा कि स्यों लोक झूठे।

³ होर तू मेरे पर विस्वास करणे री वजहा ले सबर रखी किन्हें दुःख सहन करा। दुःख सहन करदे हुए भी तैं मेरी सेऊआ करणी नी छाडी।

⁴ पर हांऊँ तेरे बरखलाफ ये बोलणा चाहां कि, तैं मेरे किन्हें पैहले साहीं प्यार करणा छाडी दितिरा।

⁵ इधी कठे याद कर कि, तू किहाँ मेरे किन्हें पैहले प्यार करहा था, पर ऐबे तेह्ड़ा प्यार नी करदा। एस पापा जो करणा छाडी दे, होर पैहले साहीं मेरे किन्हें प्यार कर। होर अगर तू नी बधल्घा, ता मां तेरे वाले आई किन्हें तेरी दीऊदानी जेथी से थी, तेस जगहा ले हटाई किन्हें तुजो सजा देणी।

⁶ पर हां, तेरे मन्झ ये खरी गल ता जरुर ई कि, तू निकुलइया लोका रे कामा ले बैर करहा, जिहां हांऊँ भी तिन्हारे कामा ले बैर करहा।

⁷ जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा। जो लोक जीत हासिल करहे, मां तेस जो जिन्दगी देणे वाले डाला रा फल खाणे जो देणा जेह्ड़ा परमेसरा रे स्वर्गा रे बगीचे मन्झा आ।”

स्मुरना सैहरा री कलीसिया जो संदेस

⁸ तिन्हें मेरे किन्हें बोल्या, “होर स्मुरना सैहरा री कलीसिया रे दूत जो ये संदेस लिख कि: हांऊँ ही आ जो पैहला होर आखरी आ; हांऊँ मरी गईरा था पर ऐबे जिउंदा हुई गईरा। होर हांऊँ तुस्सा किन्हें ये बोल्हा कि:

⁹ हांऊँ जाणहां कि तैं दुःख सहन कितिरे होर तू गरीब आ, पर आत्मिक गल्ला मन्झ तू सच्चे अमीर आ। होर हांऊँ ये भी जाणहां कि जो लोक आपणे आपा जो परमेसरा रे चुणिरे लोक (यहूदी लोक) बोल्हे, पर स्यों हाये नी, स्यों तुस्सा री निंदा करहे। पर ये लोक सैताना री मंडली रे लोक ऐं।

¹⁰ जो दुःख तुध सैहणे, तिन्हा ले मत डर। सैताना तुस्सा मन्झा ले लोका जो पकड़ाई किन्हें जेल्हा मन्झ पाणे, ताकि तुस्से परखे जाओ; होर तुस्सा जो दस ध्याड़े तक क्लेस उठाणा पऊणा। प्राण देणे तक मेरे पर विस्वास करदा रैह, तेबे मां तुजो जीता रे इनाम मन्झ अनंत जिन्दगी देणी, जो ताजा साहीं ई।

¹¹ जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा: जो लोक जीत हासिल करहे, तेस जो दूजी मौता ले नुकसान नी हूंणां।”

पिरगमुन सैहरा री कलीसिया जो संदेस

¹² तिन्हें मेरे किन्हें ये भी बोल्या कि, “पिरगमुन सैहरा री कलीसिया रे दूत जो ये संदेस लिख कि: हांऊँ ही आ जेस वाले तेज दोधारी तलवार ई। होर हांऊँ तुस्सा किन्हें ये बोल्हा कि:

¹³ हांऊँ ये ता जाणहां कि, तू जेस सैहरा मन्झ रैंहयां, जेथी सैताना रा गढ़ आ। तू मेरे कठे वफादार रैहया, होर तैं कधी मेरे पर विस्वास करणा नी छाडेया। तेबे भी नी जेबे अन्तिपास तुस्सा रे सैहरा मन्झ मारी दितिरा था, जेथी जे सैताना रा वास आ, क्यूंकि से भरोसे रे लायक सेऊआदार था जिन्हें मेरे बारे मन्झ प्रचार कितिरा था।

¹⁴ पर हांऊँ तेरे बरखलाफ ये बोलणा चाहां, क्यूंकि तू कलीसिया मन्झ गलत उपदेस देणे वाल़ा रा विरोध नी करदा, जो पुराणे टैमा रे बिलाम नबी साहीं स्खाये। तिन्हें इस्राएल देसा रे लोका जो पाप कुराणे रे कठे राजा बालाक जो सखाया, जेता री वजहा ले राजे इस्राएली लोका जो मूर्ति रे आगे बलिदान कितिरी चीजा जो खाणा, होर व्यभिचार करणा सखाया।

¹⁵ एस तरीके किन्हें कुछ लोक एह्ड़े ऐं, जो निकुलइया लोका रे उपदेसा जो मन्हां ऐं।

¹⁶ इधी कठे पाप करणा छाडी देआ, नी ता मां तेरे वाले जल्दी आई किन्हें, आपणे मुंहा री तलवार यानि आपणे बचना रे ज्रीए तिन्हा किन्हें लड़ना।

¹⁷ जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा: जो लोक जीत हासिल करहे, तिन्हा जो मां, तेस मन्ने ले देणा, जो ल्कोई किन्हें रखिरा। होर तिन्हा सभी जो मां एक चिटा पात्थर देणा, होर तेस पात्थरा पर एक नंऊँआं नांऊँ लिखी जाणा, जेस नाऊँ जो पाणे वाले रे अलावा होर कोसिया नी जाणना।”

थुआतिरा सैहरा री कलीसिया जो संदेस

¹⁸ फेरी तिन्हें मेरे किन्हें बोल्या, “होर थुआतिरा सैहरा री कलीसिया रे दूत जो ये संदेस लिख कि: हांऊँ ई आ जो परमेसरा रा मह्ठा आ, होर जेसरी हाखिया आगी री लपटा साहीं चमकी करहा ई थी। होर जेसरे पैर भट्टी मन्झ तपाए गईरे बढ़िया कांसे साहीं चमकी करहे थे। होर हांऊँ तुस्सा किन्हें ये बोल्हा कि:

¹⁹ हांऊँ जाणहां कि तू क्या काम करहा, होर ये भी कि तुस्से एक दूजे किन्हें प्यार करहे, होर तुस्सा रा मेरे पर बौह्त मजबूत विस्वास आ। हांऊँ जाणहां कि किहाँ तुस्से एक दूजे री सेऊआ कितिरी, होर ये भी कि तू मेरे पर विस्वास करणे री वजहा ले सबर रखी किन्हें दुःख सहन करा। होर ये भी कि तेरे ऐबे रे काम पैहले ले बढ़ी किन्हें ऐं।

²⁰ पर हांऊँ तेरे बरखलाफ ये बोलणा चाहां कि, तू तेस ज्नाने ईजेबेला जो झूठे उपदेस स्खाणे देहां। से आपणे आपा जो नबण बोल्हा ई, पर से मेरे लोका जो व्यभिचार करणे, होर मूर्ति रे अगे बलिदान कितिरी चीजा जो खाणे रे कठे सखाई किन्हें तिन्हो भरमाहीं।

²¹ मैं तेस्सा जो मौका दितेया कि से पाप करणा छाडी दे, पर से व्यभिचार करणा छाडणा नी चाहन्दी।

²² इधी कठे मां से ब्मार करणी; होर जो लोक तेस्सा साउगी व्यभिचार करहा ऐं, अगर स्यों भी तेस्सा साहीं पाप करणा नी छाडगे ता मां स्यों भी बडे दुःखा मन्झ पाई देणे।

²³ होर मां स्यों सभ लोक मारी देणे जो तेस्सा रे झूठे उपदेसा जो मन्हें। होर तेबे सभी कलीसिया जाणी लैणा कि सभी लोका रे दिला री नीयता जो, होर मना रे बिचारा जो परखणे वाल़ा हांऊँ ई हाया। होर मां तुस्सा मन्झा ले हर एकी जो तुस्सा रे कामा रे मताबक इनाम देणा।”

^24-25 पर तुस्से जो थोहड़े लोक थुआतिरा सैहरा मन्झ बचीरे, सिर्फ तुस्से तेस्सा रे झूठे उपदेसा जो नी मन्नेया। तुस्से तिन्हा गल्ला जो नी सिखेया जिन्हा जो तेस्सा रे लोक “सैताना रे दितिरी गैहरी गल्ला” बोल्हा ऐं। हांऊँ तुस्सा किन्हें बोल्हा कि, हांऊँ तुस्सा जो कोई होर खास हुक्म मनणे जो नी देणा, बस येई कि मेरे वापस आऊणें तक मेरे पर तुस्सा रा जो विस्वास आ, तेता जो मजबूत बणाई किन्हें रखा।

²⁶ जो लोक जीत हासिल करहे, होर मेरे हुकमा जो संसारा रे खत्म हूंणे रे टैमा तक मनदे रैहे, मां तिन्हा जाति-जातिया रे लोका पर राज करणे रा हक देणा।

²⁷ होर मां तिन्हो सेई राज करणे रा हक देणा जो मेरे बापूए मुंजो दितिरा। होर तिन्हारा राज करणा लोहे साहीं हूंणा, जो कधी भी नी टूटदा, होर तिन्हारे दुसमना माटे रे भांडे साहीं चूर-चूर हुई जाणा।

²⁸ होर तिन्हारी जीता जो दसणे रे कठे, मां तिन्हा जो भ्यागा रा तारा भी देणा।

²⁹ जो मेरी गल्ला सुणदा लगीरा से बड़े ध्याना किन्हें सुणें कि आत्मा कलीसिया किन्हें क्या बोल्हा।