प्रकासना री गल्ला 16 - मंडयाली नंऊँआं नियम

पैहला डोंगें

¹ फेरी मैं मन्दरा ले केसी जो उच्ची अवाजा मन्झ तिन्हा सात स्वर्गदूता किन्हें ये बोल्दे हुए सुणेया कि, “जाऊआ, होर परमेसरा रा गुस्सा जो सात डोंगें मन्झ आ, तिन्हो धरती पर दली देआ।”

² इधी कठे पैहले स्वर्गदूते जाई किन्हें आपणा डोंगें मन्झ ले परमेसरा रे गुस्से जो धरती पर दली दितेया। होर जिन्हा लोके पर राक्सा री छाप लगिरी थी, होर जो तेसरी मूर्ति री अराधना करहा ऐं थे, तिन्हारे सरीर मन्झ भयानक फोड़े निकले, जो बौह्त पीड़ा दे थे।

दूजा डोंगा

³ दूजे स्वर्गदूते जाई किन्हें आपणे डोंगें मन्झ ले परमेसरा रे गुस्से जो समुद्रा पर दली दितेया। होर झटपट समुद्रा रा पाणी मरिरे माह्णुं रे खूना साहीं बदली गया, होर एता री वजहा ले समुद्रा रा हर एक जानवर मरी गया।

त्रीजा डोंगा

⁴ होर त्रीजे स्वर्गदूते जाई किन्हें आपणे डोंगें मन्झ ले परमेसरा रे गुस्से जो दराऊआ होर पाणी रे सोते पर दली दितेया। होर स्यों खूना मन्झ बधली गये।

⁵ होर मैं तेस स्वर्गदूता जो, जेस जो सारे पाणी पर हक आ, तेस जो परमेसरा किन्हें ये बोल्दे सुणेया कि, “हे पवित्र परमेसर, तू जो था, होर जो हाया, तैं संसारा जो ये सजा देई किन्हें बिलकुल सही न्याय कितिरा।

⁶ क्यूंकि तिन्हें परमेसरा रे पवित्र लोका रा, होर तेरे नबिया रा खून बहाई किन्हें स्यों मारी दिते। इधी कठे तैं ऐबे तिन्हा जो खून पीणे जो दे, क्यूंकि स्यों एता रे लायक ऐं।”

⁷ दबारा मैं तेस बेदी मन्झा केसी जो ये बोलदे हुए सुणा कि, “हां, हे सर्वसक्तिमान प्रभु परमेसर, जो सजा तैं इन्हा लोका जो दिती, से बिलकुल सच्ची होर सही ई।”

चौथा डोंगा

⁸ होर चौथे स्वर्गदूते जाई किन्हें आपणे डोंगें मन्झ ले परमेसरा रे गुस्से जो सूरजा पर दली दितेया। होर सूरजा जो आपणी डरोणी होर भयानक गर्मी किन्हें माह्णुंआं जो फुखी किन्हें जख्मी करणे री सक्ति दिती।

⁹ होर माह्णुं सूरजा रे तेज गर्मी किन्हें फुखी गये। तेबे तिन्हें आपणे बुरी कामा जो छाडी किन्हें होर परमेसरा री महिमा करणे रे बजाय स्यों परमेसरा री निंदा करदे लगे। क्यूंकि तिन्हा कैहरा जो भेजणे रा हक सिर्फ परमेसरा वाले आ।

पान्जुआ डोंगा

¹⁰ होर पान्जुए स्वर्गदूते जाई किन्हें आपणे डोंगें मन्झ ले परमेसरा रे गुस्से जो तेस राक्सा री राज्य पर दली दितेया, होर तेसरे राज्य मन्झ न्हयारा छाई गया। होर लोक बड़ी पीड़ा रे मारे आपणी-आपणी जीभ चाब्दे लगे।

¹¹ होर आपणी पीड़ा होर फोड़े री वजहा ले तिन्हें परमेसरा री निंदा किती, जो स्वर्गा मन्झ रैहया। हालांकि ऐबे तिन्हारी हालत इतनी खराब थी, फेरी भी तिन्हें आपणे बुरे काम करणा नी छाडे।

छठुआं डोंगा

¹² होर छठुहे स्वर्गदूते जाई किन्हें आपणे डोंगें मन्झ ले परमेसरा रे गुस्से जो बडी नदी फरात दराऊआ पर दली दितेया। जेस ले तेसरा पाणी सुक्की गया, होर तेस वजहा ले पूर्व ले आईरे राजा आपणी सेना जो लेई किन्हें तेस दराऊआ जो पार करी पाए।

¹³ तेता ले बाद मैं तीन दुस्टात्मा जो देखेया, जो मिनके रे साहीं सूझी थी। तेता मन्झ ले एक अजगरा रे मुंहा ले निकलेया, होर एक पैहले होर दूजे राक्सा ले मुंहा ले निकलेया, होर एक झूठे भविस्यवाणी करणे वाले रे मुंहा ले निकलेया।

¹⁴ इन्हा दुस्टात्मा जो चिन्ह दसणे रा हक दितिरा था, होर तिन्हें जाई किन्हें धरती पर राज करणे वाले सब लोका जो कठ्ठा कितेया, ताकि स्यों जाई किन्हें सर्वसक्तिमान परमेसरा साउगी तेस बडे ध्याड़े लड़ाई करी सके।

^15-16 दुस्टात्मा राज करणे वाले लोका जो होर तेसरी सेना जो तेस जगहा कठा कितेया, जेस जो इब्रानी भासा मन्झ हर-मगिदोन बोल्या जाहाँ। इधी कठे प्रभु यीसूए बोल्या कि, “एस गल्ला जो सुणा, मां चोरा साहीं अचानक आहूँणा। धन्य आ से माह्णुं जो मेरे आऊणें पर जागदा रैंहयां, होर आपणे कपड़े जो त्यार रखा। तेबे तिन्हा नांगे नी हूंणे होर जेबे लोका रे बीचा मन्झ जाणा, ता एह्ड़ा कुछ भी नी हूंणा जो तिन्हो बेज्जत करहे।”

सातुआ डोंगा

¹⁷ होर सातुवे स्वर्गदूते जाई किन्हें आपणे डोंगें मन्झ ले परमेसरा रे गुस्से जो बागर पर दली दितेया। होर स्वर्गा रे मन्दरा रे अंदर परमेसरा री राजगद्दी वाले ले मुंजो केसी रे बोलणे री अवाज आई कि, “सभ कुछ पूरा हुई गया।”

¹⁸ फेरी बिजलिया चमकी होर गड़गड़ाहटा री अवाज हुई होर बादला री गर्जन हुई, होर एक बडा हिलण हुआ। धरती पर रैहणे वाले लोके, माह्णुं री सुर्हूआता ले लेई किन्हें ऐबे तक कधी नी एह्ड़ा बडा हिलण नी देखीरा था।

¹⁹ होर तेस बडे सैहरा बाबेल रे तीन टुकड़े हुई गये, होर तेसरे ओरले-परले चारों वखा रे सैहर भी पई गये, क्यूंकि परमेसरे बडे बाबेल देसा रे लोका नास करणे रा जो वादा कितिरा था, होर से पूरा कितेया, तिन्हा जो बौह्त बड़ी सजा मिलणी। ये एह्ड़ा हूंणा जिहां कि तिन्हें नीट सराब पितिरी हो, जो परमेसरे आपु तेस डोंगें मन्झ पाईरा जो तेसरे गुस्से जो दसा।

²⁰ होर तेस टैम समुद्रा रे हर एक टापू आपणी जगहा ले झटपट हटी गये, होर प्हाड़ा जो पता तक नी चल्या।

²¹ होर आसमाना ले माह्णुंआं रे प्र्याहले पर पंजाह किलो रे बडे-बडे सुणाट पये, इधी कठे तिन्हें परमेसरा री निंदा किती। क्यूंकि परमेसरा रे ज्रीए भेजिरे कैहरा ले लोका जो बड़ी पीड़ा सहन करणी पहूंआं ईं।