प्रकासना री गल्ला 15 - मंडयाली नंऊँआं नियम

कैहरा ले भरिरे सात सोने रे डोंगें

¹ होर जेबे एह्ड़ा हुआ तेता ले बाद मैं आसमाना पर एक लग जे चिन्ह देख्या, जो बौह्त डरोणा होर नौखा था। सात स्वर्गदूत सात प्रकारा री लग कैहर जो लेई जाई करहा ऐं थे। क्यूंकि ये कैहर आखरी ऐं, होर इन्हारे पूरे हूंणे पर परमेसरा रा गुस्सा सांत जाणा।

² फेरी मुंजो सीसे साहीं चमकदा हुआ एक समुद्र सूझेया, जेस मन्झ आग मिलिरी हो। होर मैं स्यों लोक भी देखे जिन्हों ये राक्स हराई नी सकेया। तिन्हें लोके राक्सा री होर तेसरी मूर्ति री अराधना नी कितिरी थी, होर जिन्हा पर राक्सा रे नांऊँआं रे अंका री छाप भी नी लगिरी थी। स्यों भी तेस सीसे रे समुद्रा रे कनारे पर खड़ी गये, होर तिन्हारे हाथा मन्झ परमेसरा री दितिरी वीणा थी।

³ होर तिन्हें परमेसरा रे सेऊआदार मूसा साहीं गाणा गाया, होर से गाणा छेलू बारे मन्झ था। होर स्यों इंहां गांदे लगिरे थे कि, “हे सर्वसक्तिमान प्रभु परमेसर, तेरे काम बडे होर नौखे ऐं, तू जो देस-देसा रे लोका रा राजा, तेरे हर काम धर्मा रे, होर सच्चे।”

⁴ “हे प्रभु, सभ लोक तेरी इज्जत करहे, होर तेरे नांऊँआं री महिमा करहे, क्यूंकि तू ई पवित्र परमेसर आ। होर सब देसा रे लोका तेरे वाले आऊहें, होर तेरी अराधना करहे, क्यूंकि तेरे धर्मा रे काम सभ लोका पर जाहिर हुई गईरे।”

⁵ होर इन्हा लोका रे गाणा गाणे रे बाद मैं देख्या कि, स्वर्गा मन्झ जो मन्दर आ से खुलीरा, जो तेस तम्बू साहीं आ जेस जो इस्राएली लोक चाली साला तक बियाबान जगंला मन्झ आपणे साउगी लेई किन्हें चले थे।

^6-7 होर तेता ले बाद स्यों सात स्वर्गदूत जो आखरी रे सात कैहर लेई किन्हें आऊणें वाले थे, स्यों मन्दरा रे बाहर निकले। तिन्हें चमकणे वाले चिटे कपड़े पैहनी रखिरे थे, होर तिन्हारी छाती पर सोने रा पट्टा बझिरा था। फेरी चारो प्राणिया मन्झा ले एकिये तिन्हा सात स्वर्गदूता जो एक-एक सोने रे डोंगा दितेया, जो जुग-जुग रे कठे जिउंदे परमेसरा रे गुस्से ले भरीरा थे।

⁸ परमेसरा री महिमा होर तेसरी सामर्था ले आऊणें वाले धुंएँ किन्हें मन्दर भरी गया। होर जेबे तक स्यों सात कैहर जो सात स्वर्गदूत लेई किन्हें आईरे थे, स्यों खत्म नी हुआ, तेबे तक मन्दरा मन्झ कोई भी जाई नी सकेया।