प्रकासना री गल्ला 14 - मंडयाली नंऊँआं नियम

छेलू होर 144,000 लोक

¹ तेता बाद मैं कुछ होर देख्या, से छेलू सिय्योना रे प्हाड़ा पर खड़ीरा आ। होर तेस साउगी एक लाख चुताली हज़ार लोक थे, जिन्हारे माथे पर छेलू रा होर तेसरे बापू रा नांऊँ लिखिरा था।

² होर मैं स्वर्गा ले एक एह्ड़ी भारी अवाज सुणही, जो पाणी री बौह्त धारा होर बडी गर्जना रे साहीं थी। होर जो अवाज मैं सुणी, से एह्ड़ी थी, जिहां जे वीणा बजाणे वाल़ा वीणा बजाहां ऐं।

³ होर स्यों एक लाख चुताली हज़ार लोक राजगद्दी रे होर चारो प्राणिया रे होर चौबी अगुवो रे साम्हणें खड़ी किन्हें, स्यों एक नंऊँआं गाणा गाया करहा ऐं थे, जो कोई ये गाणा नी सीखी सक्दा था। होर इन्हा लोका जो परमेसरे संसारा मन्झ रैहणे वाले लोका मन्झ ले मुले लई किन्हें छुड़ाईरे थे।

⁴ ये स्यों लोक ऐं, जिन्हारी जिन्दगी पवित्र ई। तिन्हा मर्धा साहीं जिन्हें कधी कोसी जन्नानी साउगी व्यभिचार नी कितेया, तिहां ही तिन्हें छेलु रे अलावा केसी होरी री अराधना नी कितिरी हो। जेथी केथी से छेलु जाहाँ, स्यों तेसरे पीछे चली जाहें। येई लोक ऐं जिन्हा जो परमेसरे धरती पर रैहणे वाले माह्णुंआं मन्झा ले मुले लई किन्हें छुड़ाईरे। जिहां किसान आपणी पैहली फसल परमेसरा जो चढ़ा, तिहां ही ये लोक भी परमेसरा रे कठे होर छेलु रे कठे पैहली भेंट रे कठे चढ़ाई रे।

⁵ होर तिन्हारे मुंहा ले कधी झूठ नी निकल्या, स्यों बेकसूर ऐं।

तीन स्वर्गदूत

⁶ फेरी मैं एक होर स्वर्गदूता जो आसमाना पर बौह्त गास उडदे हुए देख्या। होर तेस वाले धरती रे रैह्णे वाले लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका जो सुणाणे रे कठे अनंतकाला री खुसी री खबर थी।

⁷ होर तिन्हें उच्ची अवाजा मन्झ बोल्या, “परमेसरा ले डरा, होर तेसरी महिमा करा; क्यूंकि ऐबे टैम आई गईरा कि से संसारा रे लोका रा न्याय करहे। होर तेसरी अराधना करा, क्यूंकि तिन्हें स्वर्ग होर धरती होर समुद्र होर पाणी रे सोते रचिरे।”

⁸ होर एता ले बाद एक होर दूजा स्वर्गदूत ये बोल्दा हुआ पैहले स्वर्गदूता रे पीछे आया कि, “खत्म हुई गया, से बाबेल सैहर खत्म हुई गया, तिन्हें सभ देसा रे लोका जो आपणा बणीरा सराब पयाया यानि तिन्हें सारे माह्णुंआं ले बुरे काम कुराये। क्यूंकि तिन्हें लोका जो मूर्ति पूजा करणा सखाया।”

^9-10 फेरी त्रिजा स्वर्गदूत तिन्हा दुहीं स्वर्गदूता रे पीछे ले आया होर तिन्हें उच्ची अवाज किन्हें बोल्या, “जो कोई तेस राक्सा री होर तेसरी मूर्ति री अराधना करदा हो, होर आपणे माथे या आपणे हाथा पर तेसरी छाप ल्गाई हो, तिन्हो परमेसरा बौह्त बड़ी सजा देणी। ये एह्ड़ा हूंणा जिहां कि तिन्हें नीट सराब पितिरी हो जो परमेसरे आपु तेस डोंगें मन्झ पाईरा जो तेसरे गुस्से जो दसा। परमेसरा लोका तिन्हा जो आपणे पवित्र स्वर्गदूता होर छेलू रे साम्हणें जल्दे हुए गन्धका किन्हें बौह्त ज्यादा पीड़ा देणी।

¹¹ होर तिन्हा जो पीड़ा देणे वाली आगी रा धुँआ जुग-जुग आसमाना वखा जो उठ्दा रैहणां। होर जो लोक तेस राक्सा होर तेसरी मूर्ति री जो तेस साहीं, अराधना करहा ऐं, होर जिन्हें लोके तेस राक्सा रे नांऊँआं री छाप आपणे सरीरा गास लगाई री हो, तिन्हा जो राती ध्याड़ी तेस पीड़ा ले चैन नी मिलणा।”

¹² क्यूंकि ये सारी गल्ला हूंणे वाली, इधी कठे परमेसरा रे पवित्र लोका जो धीरज रखणा चहिए। ये स्यों लोक ऐं जो परमेसरा रे हुक्मा जो मन्हां ऐं, होर यीसू मसीह पर विस्वास रख्हा ऐं।

¹³ होर मैं दबारा स्वर्गा ले केसी जो मेरे किन्हें ग्लांदे करदे हुए सुणेया कि इन्हा गल्ला जो लिख। ऐबे ले लेई किन्हें प्रभु पर विस्वास रखी किन्हें मरणे वाले लोक धन्य ऐं। तेबे पवित्र आत्मे एस गल्ला ले राजी हुई किन्हें बोल्या, “हां ये गल सच्च ई। स्यों लोक धन्य ऐं, क्यूंकि तिन्हा आपणी मैहनता किन्हें अराम पाणा, होर जो तिन्हें कितिरा तेता रे बदले तिन्हों इनाम मिलणा।”

धरती रे फसला री कटणी

¹⁴ तेता बाद मैं कुछ होर देख्या कि एक साफ बादल आ। होर तेस बादला पर माह्णुं साहीं सूझणे वाल़ा कोई बैठिरा था, तेसरे मूंडा पर सोने रा ताज रखिरा, होर तेसरे हाथा मन्झ तेज दराटी ई।

¹⁵ तेस टैम एक होर स्वर्गदूत यानि चौथा स्वर्गदूत भी मन्दरा मन्झा ले निकली किन्हें आया। तिन्हें बादला पर बैठिरे माह्णुं जो चिंगी किन्हें बोल्या, “धरती री कटाई रा टैम आई गईरा, क्यूंकि फसल पक्की चुकीरी। इधी कठे आपणी दराटी चलाई किन्हें फसला जो काटी दे।”

¹⁶ इधी कठे से माह्णुं जो बादला पर बैठीरा था, तिन्हें धरती पर आपणी दराटी चलाई, होर सारी धरती री फसल काटी दिती।

¹⁷ फेरी एक होर स्वर्गदूत यानि पान्जुआ स्वर्गदूत तेस मन्दरा मन्झा ले निकल्या, जो स्वर्गा मन्झ आ, होर तेस वाले भी तेज दराटी थी।

¹⁸ फेरी तेता ले बाद एक होर स्वर्गदूत यानि छठुआं स्वर्गदूत आया, जेस वाले बेदी पर धूपदानी भ्खाणे रा हक था। तिन्हें स्वर्गदूते दूजे स्वर्गदूता जो जेसरे हाथा मन्झ तेज दराटी थी, तिन्हें तेस किन्हें चिंगी किन्हें बोल्या, “धरती रे अंगूरा रे गुच्छे जो काटी ले, क्यूंकि अंगूर पक्की चुकिरे।”

^19-20 होर तिन्हें स्वर्गदूते धरती रे अंगूरा रे गुच्छे पर आपणी दराटी चलाई, होर धरती रे अंगूर रे गुच्छे काटी किन्हें कट्ठे किते, फेरी अंगूरा रा रस काढणे रे कठे स्यों रसा रे गड्ढे मन्झ पाई दिते। एता रा मतलब ये आ कि परमेसरा बौह्त भारी सजा देणी। अंगूरा सैहरा रे बाहर रसा रे गड्ढे रौंदेया गया। होर जेथी तक खूना री गल ई से इतने डुगहे मन्झ धारा साहीं बही गया कि से घोड़े री ल्गामा तक पूजे। होर कोई तीन सौ किलोमीटरा री दुरी तक बही गया।