प्रकासना री गल्ला 13 - मंडयाली नंऊँआं नियम

समुद्र मन्झ ले निकले दो राक्स

¹ होर मैं एक राक्स जो समुद्रा मन्झा ले निकल्दे हुए देख्या। जेसरे दस सींग होर सात मूंड थे, होर हर एक मूंडा पर एक-एक ताज था। होर तेसरे हर एक मूंडा पर परमेसरा रे नांऊँ लिखिरे थे, जेस जो बोलणे रा हक तेस जो नी था।

² जो राक्स मैं देख्या, तेसरा सरीर चीते साहीं था, होर तेसरे पैर भालू साहीं थे, होर तेसरा मुंह सेरा साहीं था। होर तिन्हें अजगरे आपणी सामर्थ एस राक्सा जो देई दिती, होर तेस जो धरती पर राज करणे रा हक देई दितेया।

³ होर मैं राक्सा रे मूंडा मन्झा ले एकी पर एडी भारी चोट लगिरी देखी, जेता ले से मरी सक्हा था। पर तेसरी से जान लेवा चोट ठीक हुई गई, होर सारी धरती रे लोक तेस राक्सा जो देखी किन्हें हरान हुई गये, होर तेस जो मनदे लगे।

⁴ होर स्यों राक्सा री अराधना करदे लगे, होर बोलदे लगे कि, “एस राक्सा साहीं कुणहां? कुणहां तेस किन्हें लड़ी सक्हा?” होर लोक अजगरा री भी अराधना करदे लगे, क्यूंकि तिन्हें ही राक्सा जो राज करणे रे कठे आपणा हक दितिरा था।

⁵ होर आपणे बारे मन्झ बडयाई करी किन्हें परमेसरा री निंदा करणे रे कठे रा हक तेस राक्सा जो देई दितेया। होर तेस जो ब्याली म्हीने तक काम करणे रा हक दितेया।

⁶ होर तिन्हें राक्से परमेसरा रा नांऊँ होर तेसरे रैह्णे री जगहा यानि स्वर्गा होर तिन्हा सभी लोका री जो स्वर्गा मन्झ रैहयां ऐं, निंदा करणी सुर्हू करी दिती।

⁷ होर तेस राक्सा जो ये हक दितेया कि, से परमेसरा रे पवित्र लोका किन्हें लड़े, होर तिन्हा पर जीत पाए। होर लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका, पर तेस जो हक दितेया।

⁸ होर धरती रे सभ रैहणे वाले लोका तेसरी राक्सा री अराधना करणी, यानि स्यों सारे लोक जिन्हारे नांऊँ संसारा री सुर्हूआता ले लेई किन्हें छेलू री जिन्दगी री कताबा मन्झ नी लिखी गईरे। छेलू ई आ जो मारी दितिरा था।

⁹ जो मेरी गल्ला सुणदा लगीरा से बड़े ध्याना किन्हें सुणें।

¹⁰ जेस जो बंदी हूंणे रे कठे नियुक्त कितिरा तेस कैदा मन्झ पऊणा, होर जो लोक इधी कठे नियुक्त कितिरे कि स्यों तलवारा किन्हें दूजेया जो मारे, तिन्हा तलवारा किन्हें मारने। इधी कठे परमेसरा रे पवित्र लोका जो धीरज रखी किन्हें दुःख सैहणा, होर तेस पर विस्वास करदे रेहणा।

धरती मन्झ ले निकल्या राक्स

¹¹ फेरी मैं एक होर राक्सा जो धरती मन्झा ले निकल्दे देख्या। होर तेसरे छेलू साहीं दो सींग थे, पर जेबे से बोली करहा था, ता तेसरी अवाज अजगरा साहीं थी।

¹² तिन्हें तेस हका रा इस्तेमाल कितेया, जो तेस जो पैहले राक्से दितिरा था, जेसरी जे जान लेवा चोट ठीक हुई गईरी थी। होर तिन्हें धरती पर रैहणे वाले सभ लोका पर दबाब पाया ई कि स्यों लोक तेस पैहले राक्सा री अराधना करहे।

¹³ होर दूजे राक्से बौह्त बड़े चिन्ह दसीरे थे, एथी तक कि सभ माह्णुं रे साम्हणें स्वर्गा ले धरती पर आग बरसाहां था।

¹⁴ होर पैहले राक्सा जो दूजे राक्सा रे साम्हणें ये सारे चिन्हा दसणे रा हक दितिरा था। होर इन्हा चिन्हा रे ज्रीए से धरती पर रैह्णे वाले सभ लोका जो भड़काई करहा था। तिन्हें आदेस दितिरा था कि स्यों पैहले राक्सा री मूर्ति बणाए, जेस जो तलवारा किन्हें चोट लगीरी थी पर ऐबे से ठीक हुई गईरा था।

¹⁵ होर दूजे राक्सा जो ये भी हक दितिरा कि से पैहले राक्सा री मूर्ति मन्झ साह पाई दे, ताकि राक्सा री मूर्ति बोलदी लगे। होर जितने लोक तेस मूर्ति री अराधना नी करहे, तिन्हा जो मारी दे।

¹⁶ होर जितने छोटे-बड़े अमीर-गरीब, अजाद-गुलाम लोक ऐं, सभी रे सीधे हाथा या तिन्हारे माथे पर एक-एक छाप लगा दे।

¹⁷ ताकि जेस पर ये छाप लगिरी हो, सेई लेण देण करी सके। ये छाप पैहले राक्सा रा नांऊँ या से अंक था, जो तेसरे नांऊँआ जो दस्हा।

¹⁸ एस अंका जो समझणे रे कठे ज्ञाना री जरूरत ई, होर जेस मन्झ ज्ञान हो से एस गल्ला जो समझी सका कि राक्सा रे अंका रा मतलब क्या। क्यूंकि ये एक माह्णुं रा नाऊँ आ, होर ये अंक छेह सौ छयाट आ।