प्रकासना री गल्ला 12 - मंडयाली नंऊँआं नियम

ज्नाने होर अजगर

¹ फेरी जेबे ये सभ कुछ हुई गया, ता आसमाना मन्झ एक बौह्त बड़ा चिन्ह सुझ्या। क्यूंकि एक ज्नाने, जो सूरज साहीं चमकणे वाले कपड़े पैन्ही रखी थी, होर चांद तेस्सा रे पैरा हेठ था। होर तेस्से आपणे मूंडा पर बारा तारे वाल़ा एक ताज पैन्ही रा था।

² होर से गर्भवती थी, होर तेस्सा रा बच्चा जणने रा टैम आई गईरा था। होर बच्चा जणने री पीड़ा री वजहा ले से चिंगी करहा ई थी।

³ एक होर चिन्ह आसमाना मन्झ सुझ्या, होर एक लाल रंगा रा एक बडा अजगर जो की सैतान आ सूझेया। जेसरे सात मूंड होर दस सींग थे, होर हर एक मूंडा पर एक-एक ताज था।

⁴ होर तेसरी पूंछे आसमाना रे तारे रा एक तिहाई हिस्सा खिंजी किन्हें धरती पर डयाई दितेया। होर अजगर तेस्सा ज्नाने रे साम्हणें खड़ा हुई गया, ताकि अजगर बच्चे जो जणदे ही निगली ले।

⁵ तेस्से एक मह्ठे जो जन्म दितेया, पर अजगर तेस जो निगली नी सकेया। क्यूंकि से बच्चा अचानक परमेसरा वाले तेसरी राजगद्दी रे साम्हणें चक्की किन्हें पुजाई दितेया। से मह्ठा लोहे री छटी किन्हें सभ देसा रे लोका पर राज करणा।

⁶ होर से ज्नाने तेस बियाबान जंगला मन्झ भगी गई, जो जगहा परमेसरे तेस्सा रे कठे त्यार कितिरी थी कि, से तेथी एक हज़ार दो सौ साठ ध्याड़े तक पली सके।

अजगरा रा स्वर्गा ले बाहर सटणा

⁷ फेरी स्वर्गा मन्झ युद्ध हुआ। मीकाईल जो स्वर्गदूता रा प्रधान था, होर तेसरे संगी स्वर्गदूत अजगरा किन्हें लड़े, होर अजगरा रे दूता किन्हें तिन्हा किन्हें भी लड़े।

⁸ पर अजगर जीती नी सकेया, होर इधी कठे अजगर होर तेसरे दूत स्वर्गा ले काढी दिते।

⁹ होर स्यों धरती पर डयाई दिते। होर से बडा अजगर, सेई पुराणा सांप, जेस जो जे सैतान बोल्हा ऐं। सेई आ जो सारे संसारा रे लोका जो भड़काहां।

¹⁰ फेरी मैं स्वर्गा मन्झा ले ये बड़ी अवाज जो ये बोलदे हुए सुणेया कि, “ऐबे आस्सा रे परमेसरा आपणे लोका रा उद्धार करणा! तेस आपणी सामर्था रे ज्रीए राजेया साहीं राज करणा! होर तेसरा मसीहा संसारा रे गास आपणा हक रखणा! क्यूंकि आस्सा रे संगी सेऊआदारा पर राती ध्याड़ी दोस लगाणे वाल़ा सैतान ऐबे परमेसरा रे साम्हणें नी खड़ी सकदा। क्यूंकि से स्वर्गा ले हेठा जो सट्टी दितेया गया!

¹¹ आस्सा रे विस्वासी लोके सैताने जो हराई दितिरा। तिन्हें छेलू रे खूना रे ज्रीए जो तिन्हारे पापा री माफी रे कठे बहाई दितिरा था। होर तिन्हारी एस गुआही री वजहा ले कि ये छेलू ही तिन्हारा प्रभु आ, तिन्हें से हराई दितेया। भले ही तिन्हों आपणे प्राण देणे पये, पर स्यों आपणी गुआही ले पीछे नी हटे।

¹² इधी कठे हे स्वर्गो होर स्वर्गा रे रैह्णे वालेयो, खुस हो। पर धरती, होर समुद्रा पर रैहणे वाले लोका पर बड़े भयानक कैहर आऊणें! क्यूंकि सैतान बौह्त गुस्से हुई किन्हें तुस्सा वाले आई उतरीरा, क्यूंकि से जाणहां कि ऐबे तेस वाले थोह्ड़ा टैम रही गईरा कि से कुछ काम करहे।”

ज्नाने जो सताणा

¹³ होर जेबे अजगरो ये समझ आया कि, हांऊँ धरती पर डयाई दितिरा, ता तेस्सा ज्नाने जो जेस्सा रे जे मह्ठा हुईरा था, तेस्सा रे पीछे पई गया।

¹⁴ परमेसरे तेस्सा ज्नाने जो बड़े ईल्लणा रे दो फान्ख दिते, ताकि से उडी किन्हें बियाबान जंगला मन्झ उडी किन्हें चली जाये, जो जगहा परमेसरे तेस्सा रे कठे त्यार कितिरी थी। तेथी तेस्सा जो साढ़े तीन साला तक पाल्या, ताकि अजगर तेस्सा वाले नी आई सके।

¹⁵ होर अजगरे आपणे मुंहा ले नदी साहीं पाणी काढेया, होर तेस्सा ज्नाने वखा जो दलेया, ताकि से तेस नदी रे पाणी मन्झ बही किन्हें डूबी जाए।

¹⁶ पर धरती ऐं तेस्सा जन्नाने री मदद किती। होर धरती ऐं आपणा मुंह खोल्ही किन्हें तेस नदी जो, जो अजगरे आपणे मुंहा ले बहाई थी, सोखी लिती।

¹⁷ होर एस वजहा ले अजगर तेस्सा ज्नाने पर गुस्सा हुआ, होर तेस जन्नाने रे बाकि संताना साउगी युद्ध करणे जो निकल्या, यानि तिन्हा लोका साउगी जो परमेसरा रे हुक्म मन्हां ऐं, होर जो लोक यीसू री प्रभु हूंणे री गुआही दे।

¹⁸ तेबे से अजगर समुद्रा रे कनारे पर जाई किन्हें खड़ा हुई गया।