प्रकासना री गल्ला 11 - मंडयाली नंऊँआं नियम

दो गुआह

¹ फेरी मुंजो नापणे रे कठे एक छटी दिती, होर परमेसरे मुंजो हुक्म दितेया होर बोल्या, “जा, मेरे मन्दर होर बेदी जो नाप, होर जो लोक मेरी अराधना तेथी करहे तिन्हो गिण।

² होर मन्दरा रा बाहरले आंघणा जो मत नाप। क्यूंकि से तिन्हा लोका रे कठे देई दितिरा जो मेरे पर विस्वास नी करदे, होर तिन्हा मेरे पवित्र सैहरा पर ब्याली म्हीने तक राज करणा।

³ होर तेस टैम मां आपणे दो गुआहा जो ये हक देणा कि, एक हजार दो सौ साठ ध्याड़े तक भविस्यवाणी करहे, होर तिन्हा टाट रे कपड़े पैन्ह्णे।”

⁴ ये दो गुआह सेई ऐं जिन्हों बौह्त पैहले जैतूना रे दो डाल होर दो दीऊदानी रे रूपा मन्झ दसीरे थे, जो परमेसरा रे साम्हणें खड़े रैंहयां ऐं। से धरती पर रैहणे वाल़ेया रा प्रभु आ।

⁵ होर अगर कोई दुसमण तिन्हारा नुकसान करणा चाहे, ता तिन्हारे मुंहा ले निकली आगा स्यों फुखी देणे।

⁶ परमेसरे तिन्हा जो हक दितिरा कि जेबे स्यों भविस्यवाणी करहे ता बरखा जो रोकी सके। तिन्हो एस गल्ला रा भी हक दितिरा कि स्यों पाणी जो खूना साहीं लाल बणाई सके, होर धरती पर सभ किस्मा री भयानक विपति भेजी सके। जेबे-जेबे स्यों चाहे तेबे-तेबे स्यों एह्ड़ा करी सके।

⁷ होर जेबे इन्हा दुहींया आपणी गुआही देई बैठणा, ता तेस राक्सा तेस डुगहे गड्ढे ले निकल्ना, तेस इन्हा दुहीं साउगी लड़ी किन्हें स्यों हराई देणे होर स्यों मारी देणे।

⁸ होर मरणे रे बाद तिन्हारी ल्हास तेस महान (यरुस्लेम) सैहरा रे रस्ते मन्झ पई रैहणा, जेथी प्रभु यीसू जो क्रूसा प्रयाल्हे चढ़ाईरा था। से सैहर सदोम सैहरा होर मिस्र देसा रा प्रतीक आ, क्यूंकि एथी रैहणे वाले लोक यरुस्लेम सैहरा मन्झ रैहणे वाले लोका साहीं बुरे।

⁹ होर लग-लग देसा रे लोका, होर हर कुला रे लोका, होर जातिया रे लोका, होर लग-लग भासा बोलणे वाले लोका, तिन्हा दुहीं गुआहा री ल्हासा जो साढे तीन ध्याड़े तक देख्दे रैहणा, पर केसी जो भी तिन्हारी ल्हासा जो दबाणे नी देणा।

¹⁰ होर धरती पर रैहणे वाले, तिन्हारे मरणे ले खुस होर मग्न हूंणां; तिन्हा धाम मनाणी, होर एक दूजे जो तोफे देणे। क्यूंकि स्यों दुहें नबी मरी बैठीरे, जिन्हें लगातार धरती रे रैहणे वाल़ेया जो कैहर बरसाई किन्हें स्ताईरा था।

¹¹ होर साढे तीन ध्याड़े ले बाद परमेसरा री वखा ले जिन्दगी रा साह तिन्हा मन्झ समाई गया, होर स्यों आपणे पैरा रे भारे खड़े हुई गये। होर जिन्हें लोके स्यों दबारा जिउंदे देखेया से डरी गये।

¹² होर तेता ले बाद तिन्हें स्वर्गा ले एक बडी भारी अवाज जो ये बोलदे हुए सुणेया कि, “एथी ऊपर आऊआ!” ये सुणी किन्हें स्यों बादला पर सुआर हुई किन्हें आपणे दुस्मणा रे देख्दे-देख्दे स्वर्गा री वखा जो चली गये।

¹³ फेरी ठीक तेस ई टैम यरुस्लेम सैहरा मन्झ एक बड़ा हिलण हुआ, होर सैहरा रे घरा रा एक तिहाई हिस्सा ढली गया। होर तेस हिलणा ले सात हजार माह्णुं मरी गये, होर बाकि जितने लोक बचिरे थे स्यों डरी किन्हें चिंगदे लगे, होर स्वर्गा रे परमेसरा री महानता रे कठे तेसरी बढ़ाई करदे लगे।

¹⁴ ये दूजी कैहर खत्म हुई गया, होर ऐबे भी एक होर कैहर आ जो जल्दी आऊणें वाल़ा।

सातुवीं तुरही

¹⁵ होर जेबे सातुऐ स्वर्गदूते तुरही बजाई, ता मैं स्वर्गा मन्झ बौह्त भारी अवाज सुणी। होर तेस अवाजा ये बोल्या कि, “आस्सा रा प्रभु परमेसर होर तेसरा चुणिरा मसीह पुरे संसारा मन्झ राज करणे रा हक मिलिरा, होर आस्सा रे परमेसरा जुग-जुग राज करणा।”

¹⁶ तेबे चौबी अगुवे, जो परमेसरा रे साम्हणें आपणी-आपणी राजगद्दी पर बैठिरे थे, तिन्हें परमेसरा रे पैरा पर पई किन्हें तेसरी अराधना किती।

¹⁷ होर ये बोल्दे लगे, “हे सर्वसक्तिमान प्रभु परमेसर, जो था, होर जो हाया, आस्से तेरा धन्यावाद करहा ऐं, कि तैं ऐबे आपणी बड़ी सामर्थ दसीरी, होर संसारा मन्झ राज करणा सुर्हू कितिरा।

¹⁸ होर तेरे पर विस्वास नी करणे वाले लोक गुस्से किन्हें भर्ही गई, से टैम आई गईरा कि, तू आपणा गुस्सा जाहिर करहे, होर मरिरे लोका रा न्याय करहे, होर ऐबे से टैम भी आई गईरा कि तू आपणे नबिया जो जिन्हें तेरी सेऊआ किती, होर जो तेरा डर मन्हें, होर जो लोक आपणे आपा जो छोटा समझे, होर जो आपणे आपा जो बडा समझे, तिन्हो भी तिन्हारा इनाम दे। होर साउगी-साउगी जो लोक धरती पर विपति लेई किन्हें आईरे, तिन्हारा नास करी दे।”

¹⁹ होर परमेसरा रा मन्दर जो स्वर्गा मन्झ आ, से खोल्ही दितेया, होर तेसरे मन्दरा मन्झ वाचा रा सन्दूक सुझ्या। होर बिजलिया री चमक होर बादला री गड़गड़ाहट री अवाजा होर हिलण हुए, होर बौह्त ज्यादा सुणाटा री भरमार हुई।