प्रकासना री गल्ला 1 - मंडयाली नंऊँआं नियम

¹ एस कताबा मन्झ स्यों गल्ला ई जेसरा प्रकासन परमेसरे यीसू मसीह जो दितिरा। ताकि से आपणे सेऊआदारा जो स्यों लुख्ही री गल्ला जिन्हारा जल्दी हूंणा बौह्त जरूरी आ दसी सके। तेबे यीसूए आपणे स्वर्गदूता जो भेजेया कि, से इन्हा गल्ला जो तेसरे सेऊआदार यहून्ना जो दसी सके।

² यहून्ने से सभ कुछ लिख्या जो तिन्हें देखेया, यानि से खबर जेहड़ी परमेसरा ले आई, होर से सभ कुछ जो यीसू मसीहे बोल्या।

³ धन्य ऐं से, जो एस भविस्यवाणी जो पढ़ी किन्हें दूजेया जो सुणाहें, होर स्यों भी धन्य ऐं, जो सुणहां ऐं, होर एता मन्झ लिखिरी गल्ला जो मन्हां ऐं, क्यूंकि ये गल्ला बौह्त जल्दी हूंणे वाली।

सातो कलीसिया जो यहून्ना रा नमस्कार

⁴ हांऊँ यहून्ना एस चिठ्ठी जो लिखी करहा। हांऊँ ये चिठ्ठी सात कलीसिया रे तुस्सा विस्वासी लोका जो लिखी करहा, जो आसिया रे ईलाके मन्झ रैहया ई। हांऊँ प्रार्थना करहा कि परमेसर, होर सात आत्मा, तुस्सा जो आपणा अनुग्रह होर सांति देंदी रहे। ये परमेसर से ई आ, जो था, होर जो हाया, होर जो आऊणें वाल्आ आ। होर सात आत्मा स्यों ई जो परमेसरा री राजगद्दी रे साम्हणें रैहीं।

⁵ हांऊँ प्रार्थना करहा कि यीसू मसीह भी तुस्सा जो आपणा अनुग्रह होर सांति देंदा रहे, जेसरी गल्ला भरोसे रे लायक ई। सेई आ, जो मरणे रे बाद जिउंदा हुआ, होर एस संसारा रे राजेया रा हाकम आ। से आस्सा किन्हें प्यार करहा, होर तिन्हें आपणी मौता रे ज्रीए आस्से पापा ले छुड़ाये।

⁶ होर एस वजहा ले आस्से याजका रा एक परिवार बणी गईरे, जो आपणे परमेसर तेसरे बापू री सेऊआ करहे, होर तिन्हें आस्से एह्ड़े लोक बणाये जिन्हारा राजा परमेसर आ। इधी कठे यीसू मसीह जो महिमा होर सामर्थ जुग-जुग मिल्दी रहे। आमीन।

⁷ सुणा, से बादला साउगी आऊणें वाल़ा आ। होर हर एकी माह्णुं से देखणा, बल्की जिन्हें जे से क्रूसा प्रयाल्हे भाले किन्हें कोती किन्हें मारी दितिरा था, तिन्हा भी से वापस आऊंदे हुए देखणा। होर धरती रे सारी जातिया रे लोका से देखणा, ता तिन्हा छाती पिटी-पिटी किन्हें रोणा। हां ये गल्ला पक्का हूणीं! आमीन।

⁸ प्रभु परमेसर बोल्हा कि, “हांऊँ अल्फा होर ओमेगा यानि सुर्हूआत होर अंत हांऊँ ई आं। हांऊँ ई सर्वसक्तिमान आ, जो था, होर जो हाया, होर जो आऊणें वाल़ा आ।”

मसीहा रा दर्सन

⁹ हांऊँ यहून्ना तुस्सा रा विस्वासी भाई आ। यीसू मसीह साउगी एक हूंणे री वजहा ले हांऊँ दुःख सहन करहा, जिहां तुस्से भी करहे। हांऊँ परमेसरा रे राज्जा रा, जिहां कि तुस्से भी ऐ। होर मुंजो भी धीरज रखणा चहिए, जिहां कि तुस्से भी रखे। परमेसरा रे बचना रा प्रचार, होर मसीह रे सच्चे उपदेसा जो सुनाणे री वजहा ले कैदी बणाई किन्हें हांऊँ पतमुस टापू जो भेजी दितेया।

¹⁰ तुआरा रे ध्याड़ा, जो प्रभु रा ध्याड़ा पवित्र आत्मा मेरे पर आई गई, होर मैं आपणे पीछे ले तुरही रे बाजे साहीं एक बड़ी भारी अवाज सुणी।

¹¹ होर तेस अवाजे मेरे किन्हें बोल्या, “जो कुछ तू देख्हा, तेस जो कताबा मन्झ लिखी किन्हें सात कलीसिया जो भेजी दे, इफिसुस सैहरा, स्मुरना, पिरगमुन, थुआतिरा, सरदीस, फिलेदेलफिया, लौदिकिया सैहरा मन्झ ई।”

¹² होर मैं पीछे मुंह फेरी किन्हें देखेया कि कुण मेरे किन्हें बोलदा लगीरा। जेबे मैं पीछे मुड़ी किन्हें देखेया ता मैं सोने री सात दीऊदानिया देखी।

¹³ होर तेस्सा दीऊदानी रे बीचा मन्झ मैं माह्णुं साहीं सूझणे वाल़ा कोई देख्या। तिन्हें पैरा तक एक लम्बा चोगा पैहनी रा था, होर तिन्हें छाती पर सोने रा पट्टा बान्हिरा था।

¹⁴ तेसरे मूंडा रे बाल चिटी ऊना साहीं, होर बर्फा साहीं चिटे थे। होर तेसरी हाखिया आगी री लपटा साहीं चमकी करहा ई थी।

¹⁵ होर तेसरे पैर भट्टी मन्झ तपाए गईरे बढ़िया कांसे साहीं चमकी करहे थे। होर तेसरी अवाज तेज चलने वाली लैहरा री अवाज साहीं बड़ी भारी थी।

¹⁶ होर तेसरे सीधे हाथा मन्झ सात तारे थे, होर तेसरे मुंहा ले एक तेज दोधारी तलवार बाहर निकल्या करहा ई थी। होर तेसरा मुंह एह्ड़ा चमक्या करहा था, जेह्ड़ा सूरज भरी धूपा रे टैमा मन्झ चमक्हा।

¹⁷ होर जेबे मैं से देख्या, ता हांऊँ झटपट तेसरे पैरा पर पई गया होर मरिरे साहीं हुई गया। पर तिन्हें मेरे पर आपणा सीधा हाथ रखी किन्हें ये बोल्या कि, “डर मत, हांऊँ ही पैहला होर हांऊँ ही आखरी आ,

¹⁸ होर हांऊँ ही आ, जो हमेसा रे कठे जिउंदा आ। हांऊँ मरी गईरा था, पर ऐबे जिउंदा हुई गईरा, होर जुग-जुग जिउंदा रेहणा। होर मौत होर पताल लोका री चाबिया मेरे वाले ई।”

¹⁹ “इधी कठे जो कुछ तू देख्या करहा, यानि जो ऐबे गल्ला हुआ करहा ईं, होर जो गल्ला आऊणें वाले ध्याड़े मन्झ पक्का हूंणे वाली, इन्हा दुहीं गल्ला जो तू कताबा मन्झ लिखी ले।”

²⁰ इन्हा सात तारे रा जो तैं मेरे सीधे हाथा मन्झ देखिरे थे, होर तिन्हा सात सोने री दीऊदानिया एक गहरा मतलब आ, जो ऐबे मां तुस्सा जो दसणा, जो पैहले कधी भी जाहिर नी कितिरा था। स्यों सात तारे सात कलीसिया रे दूत ऐं, होर स्यों सात सोने री दीऊदानिया सात कलीसिया ई।