फिलिप्पियो 4 - मंडयाली नंऊँआं नियमपौलुसा री सलाह 1 इधी कठे हे लाडले भाईयो होर बैहणो, हांऊँ तुस्सा किन्हें प्यार रखा होर मुंजो तुस्सा लोका किन्हें मिलणे री बढ़ी इच्छा ई। तुस्से लोक मेरे खुसी होर मेरे ताज ऐं, होर तुस्से प्रभु पर आपणे विस्वासा मन्झ मजबूत बणी रहा। 2 हांऊँ युओदिया बैहण होर सुन्तुखे बैहण दुंहीं ले अर्ज करहा कि प्रभु साउगी एक हूंणे री वजहा ले तुस्से एक दूजे किन्हें बैहस करणा छाडी देआ। 3 होर हे सच्चे, सहकर्मी हांऊँ तेरे ले ये अर्ज करहा कि, तू इन्हा दुहीं बैहणा री आपु मन्झा री बैहसा जो सुल्हा करा, क्यूंकि तिन्हें मेरे साउगी खुसी री खबर सुनाणे रे कठे, क्लेमेन्स होर मेरे दूजे सहकर्मी साउगी मैहनत किती। होर ऐबे इन्हा सभीरा नांऊँ जिन्दगी री कताबा मन्झ लिखिरा। हमेसा खुस रैहया 4 प्रभु मन्झ हमेसा खुस रैहया; हांऊँ दबारा बोल्हा, खुस रैहया। 5 सभ लोक तुस्सा रे कोमल व्यवहार जो जाणी जाए; याद रखा कि प्रभु यीसू जल्दी आऊणें वाल़ा आ। 6 केसी भी गल्ला री फिकर नी करा; पर हर एक हालात मन्झ आपणी विनती, प्रार्थना होर अर्ज रे ज्रीए धन्यावादा समेत परमेसरा किन्हें बोल्हा। 7 तेबे सांति देणे वाले परमेसरा, जो माह्णुंआं री समझा ले बाहर आ, तुस्सा रे दिलो होर तुस्सा रे विचारा जो मसीह यीसू मन्झ सुरक्षित रखणा। इन्हा गल्ला पर ध्यान देआ 8 इधी कठे हे भाईयो होर बैहणो, जो-जो गल्ला सच्ची ई, जो-जो गल्ला आदरा रे लायक, होर जो-जो गल्ला ठीक ई, होर जो-जो गल्ला पवित्र ई, होर जो-जो गल्ला बांकी ई, होर जो-जो गल्ला तारीफ रे लायक ई, इधी कठे, जो-जो गल्ला सभी ले उतम होर बढ़ाई रे लायक ई, तिन्हा गल्ला पर तुस्सा रा मन लगेया रहे। 9 जो गल्ला तुस्से मेरे ले सीखी, होर ग्रहण किती, होर सुणी, होर मेरे मन्झ देखी, तिन्हारा पालन करा, तेबे परमेसरा जो सांति देआ, तुस्सा साउगी रैंह्णां। दाना रे कठे धन्यावाद 10 हांऊँ प्रभु मन्झ बौह्त खुस आ कि, तुस्से इतने ध्याड़े ले बाद मुंजो मदद रे रूपा मन्झ पैसे भेजी किन्हें दबारा याद कितेया। पक्का तुस्से सुर्हू ले ही एह्ड़ा करणा चांहे थे, पर तुस्सा जो मौका नी मिल्या। 11 हांऊँ ये गल्ला इधी कठे नी बोल्दा लगिरा कि मुंजो केसी चीज़ा री कमी घटी; क्यूंकि मैं हर हालता मन्झ संतुस्ट रैहणा सीखी लितिरा। 12 हांऊँ कमी घटी मन्झ रैंह्णां भी जाणहां होर बढ़ती मन्झ रैंह्णां भी जाणहां; मैं हर एक गल्ला मन्झ होर हर हलाता मन्झ रजणा होर भूखा रैंह्णां, होर बढ़ना घटना सीखी लईरा। 13 मसीह रे ज्रीए जो मुंजो सक्ति देहां तेता मन्झ हांऊँ सभ कुछ करी सक्हा। 14 तेबे भी तैं भला कितेया कि, तुस्से पैसे री मदद करी किन्हें मेरे दुःखा मन्झ मेरे साझी बणे। 15 होर हे फिलिप्पी सैहरा रे लोको, तुस्से आपु भी जाणहां ऐं कि, जेबे मै तुस्सा जो खुसी री खबरा सुणाई किन्हें मकीदुनिया ईलाके मन्झ चली गया, ता तेबे सिर्फ तुस्सा री कलीसिया रे लोके मददा रे कठे पैसे देई किन्हें मेरी मदद किती। 16 जेबे हांऊँ थिस्सलुनिके सैहरा मन्झ था, तेबे भी तुस्से मेरी ज्रूरत पूरी करणे रे कठे एक बार नी बल्की दो बारी मददा रे कठे पैसे भेजे। 17 हांऊँ ये गल्ला इधी कठे नी लिख्दा लगिरा कि हांऊँ मददा रे कठे पैसे चाहां। पर हांऊँ चाहां कि तुस्सा रा ये भला काम जो तुस्से कितिरा, से तुस्सा रे होर भले कामा मन्झ जुड़ी जाए होर परमेसर इन्हा कामा रे कठे तुस्सा जो इनाम दे। 18 मेरे वाले सभ कुछ हाया, बल्कि ज्रूरत ले भी ज्यादा आ। जो चीजा तुस्से इपफ्रुदीतुस रे हाथा ले भेजिरी थी तिन्हा जो पाई किन्हें हांऊँ रजी गईरा। स्यों मेरे कठे खुसबू देणे वाली भेंट साहीं आ, होर तेस बलिदान साहीं जो याजक परमेसरा रे साम्हणें चढ़ा, जेस जो परमेसर ग्रहण करहा, होर जो परमेसरा खरा लग्हा। 19 होर मेरे बापू परमेसरा भी आपणे तेस धना रे मताबक जो महिमा समेत मसीह यीसू मन्झ ऐं, तुस्सा री हर एक ज्रूरत पूरी करी देणी। 20 आस्सा रे बापू परमेसरा री बढ़ाई जुग-जुग हुन्दी रहे। आमीन। आखरी नमस्कार होर आसीस 21 यीसू मसीह मन्झ हर एक पवित्र लोका जो हांऊँ नमस्कार बोल्हा। जो विस्वासी लोक मेरे साउगी ऐं, स्यों तुस्सा जो नमस्कार बोल्हा ऐं। 22 पवित्र लोक, खास करी किन्हें जो महाराजे रे घराने रे ऐं, तुस्सा जो नमस्कार बोल्हा ऐं। 23 हांऊँ प्रार्थना करहा कि आस्सा रा प्रभु यीसू मसीह तुस्सा जो अनुग्रह देंदा रैहे। |
This work is licensed under Creative Commons Attribution-ShareAlike 4.0 License.