फिलिप्पियो 1 - मंडयाली नंऊँआं नियमनमस्कार 1 हांऊँ पौलुस, तिमिथियुस साउगी ये चिठ्ठी लिखी करहा, होर आस्से यीसू मसीह रे सेऊआदार ऐं। हांऊँ ये चिठ्ठी फिलिप्पी सैहरा मन्झ रैहणे वाले परमेसरा रे पवित्र लोका रे कठे होर कलीसिया रे अगुवे होर सेऊआदारा रे नांऊँ लिख्या करहा। 2 हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे। पौलुसा री प्रार्थना होर धन्यावाद 3 हांऊँ जेबे-जेबे तुस्सा जो याद करहा, तेबे-तेबे हांऊँ आपणे परमेसर रा धन्यावाद करहा। 4 होर खुसी साउगी आपणी हर एक प्रार्थना मन्झ तुस्सा सभी रे कठे हमेसा परमेसरा ले सहायता री अर्ज करहा। 5 इधी कठे कि, तुस्से पैहले ध्याड़े ले जेबे तुस्से खुसी री खबर पर विस्वास कितेया था ता आजा तक खुसी री खबर फैलाणे मन्झ मेरे साथी रहे। 6 होर मुंजो एस गल्ला रा भरोसा आ कि, जेस परमेसरे तुस्सा मन्झ खरा काम सुर्हू कितिरा, तेस ई से काम यीसू मसीह रे दबारा वापस आऊणें रे ध्याड़े तक पूरा करणा। 7 तुस्सा रे बारे मन्झ मेरा एह्ड़ा सोचना ठीक ई आ; क्यूंकि तुस्से सभी रे कठे मेरे मना मन्झ बौह्त खास जगहा ई। होर ऐबे जेबे हांऊँ जेल्हा मन्झ आ, होर तेबे जेबे हांऊँ खुसी री खबरा रा बचाव करणे होर एसरी सच्चाई जो जाहिर करणे रे कठे अजाद था, इन्हा दुहीं हालता मन्झ तुस्से सभ मेरे साउगी परमेसरा रे अनुग्रह जो बांडा ऐं थे। 8 क्यूंकि परमेसर मेरा गुआह आ; कि हांऊँ मसीह यीसू रे प्यारा साहीं तुस्सा सभी जो देखणे कितना चाहां। 9 होर हांऊँ ये प्रार्थना करहा कि, तुस्सा मन्झ सच्चाई रा ज्ञान होर सही फैसला लेणे री समझ बढ़दी रहे, होर एक दूजे किन्हें तुस्सा रा प्यार भी ज्यादा ले ज्यादा बढ़दे जाए। 10 ताकि तुस्से खरी गल्ला जो चुणी सको होर मसीह रे दबारा वापस आऊणें रे ध्याड़े तक हर बुरी गल्ला ले दूर होर बेकसूर बणी किन्हें रैंहयां। 11 होर परमेसर री महिमा होर बड़ाई रे कठे तेस धार्मिकता रे भले कामा ले भरी जाऊआ, जो सिर्फ यीसू मसीह रे ज्रीए ही फला ऐं। पौलुस जेल्हा मन्झ होर खुसी री खबरा री बढ़ौतरी 12 हे भाईयो होर बैहणो, हांऊँ चाहां कि, तुस्से ये जाणी लो कि, जो कुछ मेरे पर बीतिरा, तेसरी वजहा ले खुसी री खबरा फैलाणे मन्झ मेरी मदद हुईरी। 13 एथी तक कि महाराजे रे राजमहला री सारी पलटन होर बाकि लोका ये जाणी गईरे कि, मसीह रा सेऊआदार हूंणे री वजहा ले हांऊँ जेल्हा मन्झ आ। 14 मेरे जेल्हा मन्झ हूंणे री वजहा ले प्रभु मन्झ बौह्त सारे विस्वासी भाई बैहणा जो होंसला मिलिरा। स्यों प्रभु पर विस्वास रखी किन्हें पैहले ले ज्यादा हिम्मता साउगी निधड़क हुई किन्हें परमेसरा रा बचन सुणां ऐ। 15 ये सच्च आ की कुछ लोक मसीह रा प्रचार इधी कठे करहा ऐं क्यूंकि स्यों आस्सा ले हीर्ख रखे होर लड़ाई करहे, पर कुछ लोक खरी इरादे ले मसीहा रा प्रचार करहा ऐं। 16 जो लोक खरी इरादे ले प्रचार करहे स्यों मसीह किन्हें प्यार करहे, होर जाणहां ऐं कि मुंजो मसीह रे खुसी री खबरा रा बचाव करणे री वजहा ले जेल्हा मन्झ पाईरा। 17 होर जो लोक मसीह रा प्रचार हीर्ख होर लड़ाई री वजहा ले करहा ऐं, स्यों खरे इरादे ले नी पर आपणे मतलबा कठे मसीहा रा प्रचार करहा ऐं। स्यों जेल्हा मन्झ भी मेरी कठे परेसानिया जो बढ़ाहें। 18 तेबे क्या हुआ? सिर्फ ये हुआ कि हर तरहा ले, चाहे बुरे इरादे ले, चाहे सच्चे इरादे ले, मसीह री खुसी री खबरा रा प्रचार हुंहाँ। एता ले मुंजो खुसी मिल्हा ई, होर खुसी मिल्दी ई रैहणी। 19 क्यूंकि हांऊँ ये जाणहां कि, तुस्सा री प्रार्थना होर यीसू मसीह रे ज्रीए भेजिरी पवित्र आत्मा री सहायता ले एस कैद मन्झ रेहणा मेरे कठे भलाई री वजहा ई। जिन्दा रैहणा मसीह री बड़ाई 20 मेरे दिला री आस होर सभी ले बड़ी इच्छा ता येई कि, केसी गल्ला मन्झ हांऊँ सर्मिन्दा नी होऊं। पर हमेसा निधड़क हुई किन्हें मसीह रे बारे मन्झ प्रचार करु जिहां हांऊँ पैहले करहा था। चाहे हांऊँ जिउंदा रहूं या मरी जाऊं मेरी जिन्दगी रे ज्रीए मसीह री बढ़ाई हमेसा करदा रैहणा। 21 क्यूंकि हांऊँ जिउंदा रहूँ ता मसीह रे कठे, होर मरणा मेरे कठे होर भी खरा। 22 अगर मेरे जिउंदे रैंहणें ले ही मसीह रा काम हुई सका, तेबे हांऊँ नी जाणदा कि मुंजो क्या चुणणा चहिए। 23 हांऊँ दुंहीं फैसले रे बीचा मन्झ लटकीरा; इच्छा ता ये करहा ई कि हांऊँ ये दुनिया छाडी किन्हें मसीह वाले चला जाऊं, क्यूंकि मेरे कठे ये ज्यादा खरा हूंणां। 24 पर तुस्सा री मददा रे कठे जिउंदे रैंह्णां होर भी ज्यादा जरूरी आ। 25 होर इधी कठे कि मुंजो एस गल्ला रा भरोसा आ, हांऊँ जाणहां कि मां जिउंदा रैंह्णां, बल्की तुस्सा सभी साउगी रैंह्णां, ताकि प्रभु मन्झ मजबूत रैहणें होर तेस मन्झ खुस रैहणें मन्झ हांऊँ तुस्सा री मदद करी सकूं। 26 जेबे मां तुस्सा वाले दबारा वापस आऊंणा तेबे जो काम मेरे ज्रीए प्रभु करेया करहा तेसरी वजहा ले मसीह यीसू पर बडयाई करणे रा तुस्सा वाले होर भी वजहा हूंणे। मसीह रे कठे दुःख सैहणा 27 बस इतना करा कि तुस्सा री जिन्दगी मसीह रे खुसी री खबरा रे लायक हुई सके। चाहे हांऊँ आई किन्हें तुस्सा जो देखूं, चाहे नी भी आऊँ, तुस्सा रे बारे मन्झ ये सुणूं कि, तुस्से एक ई इरादे ले, होर एक मन हुई किन्हें खुसी री खबरा रे विस्वासा रे कठे बड़ी मैहनत करहा ऐं। 28 होर केसी गल्ला मन्झ व्रोधिया ले नी डरा; ये तिन्हारे कठे ता विनासा रा होर तुस्सा रे कठे उद्धारा रा साफ सबूत आ; होर ये परमेसरा री तरफा ले आ। 29 क्यूंकि मसीह री वजहा ले तुस्सा पर ये अनुग्रह हुईरा कि ना सिर्फ तेस पर विस्वास करा पर तेसरे कठे दुःख भी सहन करा। 30 तुस्से मुंजो फिल्लिपी सैहरा मन्झ भी कस्ट सहन करदे हुए देखीरा होर ऐबे भी मेरे दुखा रे बारे मन्झ सुणे जो मुंजो जेल्हा मन्झ हुआ। ऐबे तुस्सा जो भी मेरे साहीं कस्ट सहन करणा पऊणा। |
This work is licensed under Creative Commons Attribution-ShareAlike 4.0 License.