मरकुस 7 - मंडयाली नंऊँआं नियम

बापदादेया रे रूआज

¹ तेबे फरीसी लोक होर कुछ व्यवस्था स्खाणे वाल़े जो यरुस्लेम सैहरा ले आईरे थे, स्यों यीसू रे चहुँ वखा जो कठे हुए।

² होर तिन्हें यीसू रे चेलेया जो बापदादेया रे रुआजा रे बरखलाफ बगैर हाथ धोये रोटी खांदे देख्या था।

³ क्यूंकि फरीसी लोक होर सब यहूदी लोक, आपणे बापदादेया रे रूआजा पर नी मन्नदे, होर जेबे तक ठीक ढंगा किन्हें हाथ नी धोई लैंदे तेबे तक खाणा नी खांदे।

⁴ होर बजारा ले आई किन्हें, जेबे तक स्यों रुआजा रे मताबक आपणे हाथ नी धोई लैंदे थे, तेबे तक स्यों खाणा नी खांदे थे; होर बी बौह्त सारी गल्ला थी, जिन्हारा पालण स्यों रुआजा रे मताबक करहा ऐं थे, जिहां कौलिया, लोटे होर ताम्बे रे भांडे जो धोणा-मांजणा।

⁵ इधी कठे तिन्हें फरीसी लोके होर व्यवस्था स्खाणे वाल़े ये तेस ले पूछेया कि, “तेरे चेले किधियो बापदादेया रे रूआजा पर नी चल्दे, होर बगैर हाथ धोये रोटी खाहें।”

⁶ यीसूए तिन्हा किन्हें बोल्या कि, “यसायाह नबिये तुस्सा रे पाखंडा रे बारे मन्झ बिलकुल ठीक भविस्यवाणी कितिरी, जेह्ड़ा लिखिरा कि, ‘ये लोक आपणे सब्दा किन्हें ता मेरा आदर करहा ऐं, पर तिन्हारा मन मेरे ले बौहत दूर आ।

⁷ होर स्यों बेकार मेरी अराधना करहा ऐं, क्यूंकि स्यों माह्णुंआं रे बणाईरे रुआजा जो परमेसरा रे हुक्म बोली किन्हें लोका जो स्खाहें।’”

⁸ क्यूंकि तुस्से परमेसरा रे हुक्मा जो टाल्ली किन्हें माह्णुंआं रे रूआजा जो मन्हां ऐं।

⁹ होर यीसूए तिन्हा किन्हें बोल्या, “तुस्से बौह्त खरे तरीके किन्हें जाणहां ऐं कि किहाँ तुस्से परमेसरा रे हुकमा जो टाल्हा ऐं! ताकि तुस्से आपणे रूआजा जो मनी सको।

¹⁰ क्यूंकि मूसे नबिये बोलिरा कि, ‘आपणे माऊ-बापू री इज्जत करा’ होर ‘जो कोई आपणे माऊ-बापू जो बुरा बोले, से मारी दितेया जाणा।’

¹¹ पर तुस्से बोल्हा ऐं कि, अगर कोई आपणे माऊ-बापू किन्हें बोले कि, ‘जो कुछ मदद हांऊँ तुस्सा जो देई सक्हा था, से परमेसरा जो भेंट चढ़ाणे रा वादा कितिरा।’

¹² होर तुस्से तेस जो आपणे माऊ-बापू री कुछ सेऊआ नी करणे देंदे।

¹³ एस तरहा तुस्से आपणे रूआजा किन्हें परमेसरा रा वचन टाल्ली देहां ऐं, होर एह्ड़े-एह्ड़े बौह्त सारे काम करहा ऐं।”

माह्णुं जो गन्दा करणे वाली गल्ला

¹⁴ होर यीसूए लोका जो आपणे वाले सादी किन्हें तिन्हा किन्हें बोल्या, “तुस्से सभ मेरी सुणा, होर समझा।

¹⁵ एह्ड़ी कोई चीज नी ई जो माह्णुं जो बाहरा ले अंदर जाई किन्हें गन्दा करही; पर जो चीजा माह्णुं रे मना रे बाहर निकला ई, स्यों ई तेस जो गन्दा करहा ई।”

¹⁶ होर यीसूए बोल्या, “जो मेरी गल्ला सुणदा लगीरा, से बड़े ध्याना किन्हें सुणें।”

¹⁷ फेरी जेबे से भीड़ा जो छाडी किन्हें चेलेया साउगी घरा अंदर गया, ता तेसरे चेले एस उदाहरणा रे बारे मन्झ तेस ले पूछेया।

¹⁸ यीसूए तिन्हा ले पूछेया, “क्या तुस्से भी एह्ड़े नासमझ ऐं? क्या तुस्से नी समझ्दे? कि जो चीज बाहरा ले माह्णुं रे अंदर जाहीं, से तेस जो गन्दा नी करी सक्दी?

¹⁹ क्यूंकि से तेसरे मना मन्झ नी, पर पेटा मन्झ जाहीं, होर संडासा ले हुई किन्हें बाहर निकली जाहीं?” ये बोली किन्हें तिन्हें सब खाणे जो सुद्ध ठैहराया।

²⁰ फेरी तिन्हें बोल्या, “जो माह्णुं रे मना मन्झा ले निकल्हा, सेई माह्णुं जो गन्दा करहा।

²¹ क्यूंकि माह्णुं रे मना मन्झा ले, बुरी-बुरी सोच, व्यभिचार करणा, चोरी करणा, खून करणा, नजायज रिस्ते रखणा,

²² लालच करणा, दुस्टता, धोखा देणा, लुचपन, बैर-भाव, बदनामी करणा, बडयाई करणा होर नर्क्कले बणना, जेह्ड़ा ही निकल्हा।

²³ होर ये सब बुरी गल्ला अंदरा ले ई निकल्हा ई होर माह्णुं जो गन्दा करहा ई।”

सरुफिनिकी देसा री ज्नाने रा विस्वास

²⁴ यीसू होर तेसरे चेले गलीला जो छाडी किन्हें सुर होर सैदा सैहरा रे ओरले-परले ईलाके मन्झ आया। होर एक घरा मन्झ गया, होर चाहां था कि भीड़ा रे लोका जो ये पता नी चले, पर से ल्हुखी नी सकेया।

²⁵ यीसू रे बारे मन्झ सुणी किन्हें एक जन्नाने झटपट आई जेस्सा री छोटी मह्ठी मन्झ जे दुस्टात्मा थी, होर आई किन्हें तेसरे पैरा पर पई गई।

²⁶ ये ज्नाने यूनान देसा री थी होर सुरूफिनिकी देसा मन्झ रैहणे वाली थी; होर तेस्से तेस ले अर्ज किती कि, मेरी मह्ठी मन्झा ले दुस्टात्मा काढी दे।

²⁷ यीसूए तेस्सा रे विस्वासा जो परखणे रे कठे बोल्या कि, “पैहले मेरे बच्चेया जो यहूदी लोका जो पेट भरी किन्हें रजणे ता दे, क्यूंकि बच्चेया री रोटी लई किन्हें कुत्ते रे अगे नी रखदे।” (यहूदी लोक दूजी जातिया रे लोका जो कुत्ते साहीं समझ्हा ऐं थे)

²⁸ पर तेस्से यीसू जो जवाब दितेया कि, “सच्च आ प्रभु, कुत्ते भी ता मेजा थाले पईरे बच्चेया री रोटी रे टुकड़े खाई लैहां ऐं।”

²⁹ होर यीसूए तेस्सा किन्हें बोल्या क्यूंकि, “तेरे विस्वास रा पता तेरे बोलणे ले लगी गया, तू चली जा; दुस्टात्मा तेरी बेटी मन्झा ले निकली गयी।”

³⁰ होर तेस्से आपणे घरा आई किन्हें देख्या कि मह्ठी मांजे पर लेटिरी होर दुस्टात्मा तेस्सा मन्झा ले निकली गईरी ई।

टऊणें होर हकले माह्णुं रा ठीक हूंणां

³¹ यीसू होर तेसरे चेले फेरी से सुर होर सैदा सैहरा ले निकली किन्हें दिकापुलिस ईलाके ले हुई किन्हें गलील समुद्रा पर पुज्हेया।

³² होर लोके एक टौणे जो, जो हकलाहां भी था, तेस वाले आई किन्हें तेस ले अर्ज किती कि, एस जो छुही किन्हें ठीक कर।

³³ तेबे से तेस्जो भीड़ा ले लग लई गया, होर आपणी गुठिया तेसरे काना मन्झ पाई, होर आपणी गुठिया पर थूक लगाई किन्हें तेस माह्णुं री जीभ छुही।

³⁴ होर स्वर्गा वखा देखी किन्हें आह भरी, होर तिन्हें आपणी भासा मन्झ बोल्या, “इप्फत्तह!” यानि “खुल्ही जा!”

³⁵ होर से ढंगा किन्हें सुणदा लगेया, होर से ढंगा के बोल्दा लग्या।

³⁶ तेबे यीसूए लोका जो बोल्या खबरदार तुस्से केसी किन्हें देख्या बोल्दे; पर जितनी तिन्हा जो नांह किती तितना ज्यादा स्यों गल्ला करदे लगे।

³⁷ होर स्यों बौह्त ई हरान हुई किन्हें बोल्दे लगे, “जो कुछ यीसू करहा ऐं था से खरा करहा था; से टौणें जो सुणने री होर टाटे जो बोलणे री ताकत देहां।”