मरकुस 6 - मंडयाली नंऊँआं नियम

नासरत गांऊँआं मन्झ यीसू री बेज्जती

¹ होर यीसू कफरनहूम सैहरा ले निकली किन्हें आपणे नासरता गांऊँआं मन्झ आया, होर तेसरे चेले तेसरे साउगी चली पये।

² होर अरामा रे ध्याड़े से यहूदी सभा मन्झ उपदेस देंदा लग्या; होर बौह्त लोक सुणी किन्हें हरान हुई गये होर बोल्दे लगे, “एस जो ये गल्ला केथी ले आई? होर ये केह्ड़ा ज्ञान आ जो एस माह्णुं जो दितिरा? होर केह्ड़े सामर्था रे काम एसरे ज्रीए ले हुंहाँ ऐं?

³ फेरी तिन्हें यीसू रा मजाक डूआया, आस्से एस जो जाणहां ऐं कि ये सेई तरखाण आ। जो मरियमा रा मह्ठा आ, होर याकूब, योसेस, यहूदा होर समौन एसरे भाई ऐे होर तेसरी बैहणीया एथी आस्सा रे बीच भरा रैंहयां ईं।” इधी कठे तिन्हें यीसू री गल्ला पर विस्वास नी कितेया।

⁴ यीसूए तिन्हा किन्हें बोल्या, “नबी आपणा गांऊँ होर रिस्तेदार होर आपणे घरा जो छाडी किन्हें हर जगहा इज्जत पांहा।”

⁵ होर से नासरत गांऊँआं मन्झ कोई होर सामर्था रे काम नी करी सकेया, सिर्फ थोड़े बौह्त ब्मार छुहे होर स्यों ठीक किते।

⁶ होर से हरान हुई गया क्यूंकि तिन्हें तेस पर विस्वास नी कितेया। यीसू होर तेसरे चेले गांऊँआं मन्झ उपदेस देंदे लगे।

बारा चेले रा भेज्या जाणा

⁷ होर यीसूए तिन्हा बारा चेले जो आपणे वाले सादी किन्हें तिन्हा जो दो-दो करी किन्हें भेज्दा लग्या; होर तिन्हा जो दुस्टात्मा जो काढणे रा हक दितेया।

⁸ होर तिन्हें चेलेया जो हुक्म दितेया, “पैंडे रे कठे सिर्फ डंडे जो लेया; ना ता रोटी, ना झोला, होर ना बटुऐ मन्झ ढब्बे।

⁹ जूते ता पैन्ही सक्हा ऐं पर दो-दो कुरते देख्या लैन्दे।”

¹⁰ होर यीसूए तिन्हा किन्हें बोल्या, “जेबे तुस्से केसी गांऊँआं मन्झ जान्घे, होर कोई तुस्सा जो आपणे घरा सादे, ता तेस घरा मन्झ ई रहुआ, जेबे तक कि तुस्से तेस गांऊँआं जो छाडी नी देंघे।

¹¹ जेस गांऊँआं रे लोके तुस्से आपणे घरा नी सादे, होर तुस्सा री नी सुणी, तेथी ले चलदे ई तुस्से आपणे पैरा री धूड़ा जो झाड़ी देआ, ताकि तिन्हारे बरखलाफ ये गुआही हो।”

¹² होर चेले जाई किन्हें प्रचार करदे लगे कि, पाप करणा छाडी देआ।

¹³ होर तिन्हें बौह्त लोका ले दुस्टात्मा काढी, होर बौह्त बीमार लोका पर जैतूना रा तेल मली किन्हें स्यों ठीक किते।

यहून्ना बपतिस्मा देणे वाल़े री हत्या

¹⁴ होर हेरोदेस राजे यीसू रे बारे सुणेया, क्यूंकि तेसरा नांऊँ फैल्ही गईरा था, होर हेरोदेसे बोल्या कि ये, “यहून्ना बपतिस्मा देणे वाल़ा मरिरे मन्झा ले जिउंदा हुई गईरा, इधी कठे यीसू ले सामर्था रे काम हुंहाँ ऐं।”

¹⁵ होर होरी लोके बोल्या, “ये ता एलिय्याह नबी आ।” पर दूजे बोल्या कि, “ये कोई नबी आ, या ता महान पुराणे नबिया साहीं एक नबी आ।”

¹⁶ हेरोदेस राजे ये सुणी किन्हें बोल्या, “जेस यहून्ना बपतिस्मा देणे वाल़े रा मूंड मैं काटी दितिरा था, से जिउंदा हुई गईरा।”

¹⁷ क्यूंकि हेरोदेस राजे आप्हुए यहून्ना पकड़ाई किन्हें जेल्हा मन्झ पाई दितिरा था, तिन्हें आपणे भाई फिलिप्पुसा री लाड़ी हेरोदियासा री वजहा ले, जेस्सा किन्हें जे तिन्हें ब्याह करी लईरा था, एह्ड़ा कितेया।

¹⁸ क्यूंकि यहून्ना हेरोदेस राजे किन्हें बोल्दा रैंहयां था कि, “तेरा भाई हल्ली जिन्दा आ होर तेसरी लाड़ी रखणा मूसा री व्यवस्था रे बरखलाप आ।”

¹⁹ इधी कठे हेरोदियास यहून्ना किन्हें नफरत करहा ई थी होर ये चाहीं थी कि, तेस जो मुकाई दे, पर एह्ड़ा नी हुई सकेया।

²⁰ हेरोदेस राजा यहून्ना बपतिस्मा देणे वाल़े ले डरा था क्यूंकि से धर्मी होर पवित्र माह्णुं था, होर तेस जो बचाहां था, होर तेसरी गल्ला सुणी किन्हें बौह्त डरी जाहाँ था, फेरी भी से तेसरी गल्ला खुसी किन्हें सुणहां था।

²¹ होर ठीक मौका आऊणें पर, जेबे हेरोदेस राजे आपणे जन्म ध्याड़े पर आपणे प्रधाना होर सेनापतिया, होर गलील जिल्ले रे बडे लोका रे कठे बडी धाम दिती।

²² होर हेरोदियासा री मह्ठी अंदर आई, होर नाची किन्हें हेरोदेस राजे होर तेस साउगी बैठणे वाले लोक खुस किते। तेबे राजे मह्ठी किन्हें बोल्या, “तू जो चाहे मेरे ले मांग मां तुजो देणा।”

²³ होर तिन्हें कसम खाध्ही कि, “मां आपणे आधे राज तक जो कुछ तू मेरे ले मान्घगी तुजो देई देणा।”

²⁴ तेस्से बाहर जाई किन्हें आपणी माऊआ ले पूछेया कि, “हांऊँ क्या मांगू?” तेस्से बोल्या, “यहून्ना बपतिस्मा देणे वाल़े रा मूंड मांग।”

²⁵ से झटपट राजे वाले अंदर आई, होर तेस ले अर्ज किती, “हांऊँ चाहीं कि, तू ऐबे ई यहून्ना रा मूंड एक थाली मन्झ मंगवाई दे।”

²⁶ तेबे राजा जेह्ड़ी गल तिन्हें तेस्सा मह्ठी किन्हें बोलिरी थे तेस गला ले से बौह्त दुःखी हुआ, पर आपणी कसमा री वजहा ले होर साउगी बैठी किन्हें खाणे वाले री वजहा ले, से तेस्सा जो टाल्ली नी सकेया।

²⁷ होर राजे झटपट एक स्पाही जो हुक्म दितेया कि तेसरा मूंड काटी किन्हें लई आऊआ।

²⁸ तिन्हें जेल्हा मन्झ जाई किन्हें तेसरा मूंड काटेया, होर एक थाली मन्झ रखी किन्हें लई आया होर तेस्सा मह्ठी जो दितेया, होर मह्ठीऐ आपणी माऊआ जो दितेया।

²⁹ ये सुणी किन्हें यहून्ना बपतिस्मा देणे वाल़े रे चेले आये, होर तेसरी ल्हास चकी किन्हें डुआरा मन्झ रखी दिती।

चेलेया रा वापस आऊंणा होर अराम करणा

³⁰ आपणी सेऊआ ले बाद बारा चुणिरे चेले यीसू वाले आये, जो कुछ तिन्हें कितेया, होर स्खाया था, सब तेस जो दसी दितेया।

³¹ यीसूए तिन्हा किन्हें बोल्या, “आस्से केसी सुनसान जगहा मन्झ चल्हा ऐं, होर थोह्ड़ा अराम करी ले।” यीसूए ये तिन्हा किन्हें इधी कठे बोल्या क्यूंकि बौह्त लोक आया जाया करहा ऐं थे, होर तिन्हा जो खाणे रा मौका भी नी मिल्दा था।

³² इधी कठे स्यों किस्तिया पर चढ़ी किन्हें सुनसान जगहा जो चली गये ताकि स्यों कल्हे रही सके।

पांज हज़ार मर्धा जो खाणा खुआणा

³³ होर कई लोके स्यों तेथी जांदे हुए देखी लये होर तिन्हें ये भी पछ्याणी लया कि स्यों कुणहें, होर गांऊँआं रे बौह्त लोक कठे हुई किन्हें पैदल दौड़े होर यीसू होर तेसरे चेले ले पैहले पूजी गये।

³⁴ होर तिन्हें किस्ती ले उतरी किन्हें एक बौह्त बडी भीड़ देखी, होर तेस जो लोका पर तरस आई। क्यूंकि स्यों तिन्हा भेडा साहीं थे, जिन्हारा जे कोई रखवाला नी हुन्दा, होर से तिन्हा जो परमेसरा रे राज्या री बौह्त सारी गल्ला स्खान्दा लग्या।

³⁵ जेबे जे ध्याड़ा ढली गया, ता तेसरे चेले तेस वाले आई किन्हें बोल्दे लगे, “ये एक सुनसान जगहा ई, होर ध्याड़ा भी बौह्त ज्यादा ढली गईरा।

³⁶ तिन्हा जो भेजी दे कि, स्यों चारो तरफा रे गांऊँआं होर बस्ती मन्झ जाई किन्हें, आपणे कठे कुछ खाणे जो लई आये।”

³⁷ यीसूए तिन्हा जो जवाब दितेया कि, “तुस्से ई इन्हा जो खाणा देआ” तिन्हें तेस किन्हें बोल्या, “क्या इन्हा लोका रे कठे खाणा खरीदणे रे कठे दो सौ ध्याड़े री मजदूरी नी लगणी?”

³⁸ यीसूए तिन्हा किन्हें बोल्या, “जाई किन्हें देखा तुस्सा वाले कितनी रोटिया ई?” तिन्हें पता करी किन्हें बोल्या, “पांज रोटिया होर दो मछिया।”

³⁹ तेबे यीसूए तिन्हा जो हुक्म दितेया कि, सभी लोका जो हरे घाहा प्रयाल्हे घीढ़ी मन्झ बठ्याली देआ।

⁴⁰ स्यों सौ-सौ होर पन्ज्याह-पन्ज्याहा री घीढ़ी मन्झ बैठी गये।

⁴¹ होर तिन्हें तिन्हा पांज रोटिया जो होर दो मछिया जो लई किन्हें, स्वर्गा वखा देखी किन्हें परमेसरा रा धन्यावाद कितेया होर रोटिया तोड़ी-तोड़ी किन्हें चेले जो देंदा गया। ताकि स्यों लोका जो खाणा बांडी सके, होर तिन्हें दो मछिया भी तिन्हा मन्झ बांडी दिती।

⁴² होर सभ खाई किन्हें रजी गये।

⁴³ होर खाणे ले बाद बी रोटी होर मछिया बची गई। होर चेले बचिरी रोटिया होर मछिया किन्हें भर्हिरी बारा छड़ोल्लू चक्के।

⁴⁴ जिन्हें जे रोटिया खाध्ही, स्यों पांज हज़ार मर्ध थे। (पर तिन्हें ज्नानिया होर बच्चे नी गिणीरे थे)

यीसू रा पाणी पर चलणा

⁴⁵ तेबे यीसूए झटपट आपणे चेले किस्तिया पर चढ़ाये, ताकि स्यों तेस ले पैहले गलील समुद्रा रे पारली तरफ बैतसैदा गांऊँआं जो चली जाए, जेबे तक कि से लोका जो भेजी नी दे।

⁴⁶ होर तिन्हा जो भेजणे ले बाद यीसू प्हाड़ा पर प्रार्थना करणे रे कठे चली गया।

⁴⁷ होर जेबे सांझ हुई, ता किस्ती समुद्रा रे बीचा मन्झ थी, पर यीसू कल्हा ही जमीना पर था।

⁴⁸ होर जेबे यीसूए देख्या कि, चेलेयो किस्ती च्लांदे-च्लांदे बौह्त मुस्कल हुएआ करहा ई थी, क्यूंकि बागरा रा असर तिन्हा पर भारी था, भ्यागा तीन बजे रे करीब से समुद्रा पर चली किन्हें तिन्हा वाले आया; होर यीसू तिन्हा ले अगे निकलणा चाहां था।

⁴⁹ पर तिन्हें तेस जो समुद्रा पर चल्दे देखी किन्हें समझ्या कि, से भूत आ, होर चिंगा पान्दे लगे, क्यूंकि सभ तेस जो देखी किन्हें डरी गईरे थे।

⁵⁰ पर झटपट तिन्हा किन्हें गल्ला किती होर बोल्या, “हिम्मत रखा: हांऊँ यीसू आ; डरा मत।”

⁵¹ तेबे से तिन्हा वाले किस्तिया पर आया, बागर रुकी गई, स्यों बौह्त हरान हुई गये।

⁵² हलांकि तिन्हें यीसू जो रोटी होर मछि जो बढ़ान्दे हुए देखी लईरा था होर स्यों ये सभ देखी किन्हें भी यीसू री सक्ति जो नी समझी पाए, तिन्हारे मन सख्त हुई गईरे थे तेभे ता स्यों ठीक ढंगा किन्हें नी समझी सके।

गन्नेसरेत ईलाके मन्झ ब्मारा रा ठीक हूंणां

⁵³ यीसू होर तेसरे चेले गलील समुद्रा जो पार करी किन्हें गन्नेसरत ईलाके मन्झ पूजे, होर किस्ती जो बाढे बान्ही दितेया।

⁵⁴ होर जेबे स्यों किस्ती ले उतरे, ता लोके यीसू झटपट पछयाणी लया।

⁵⁵ ओरले परले सारे ईलाके रे लोक दौड़े, होर सारे ब्मार लोका जो मांजे प्र्याह्ले चकी किन्हें हर जगहा फिरदे रहे, जेथी भी यीसू जाहाँ था स्यों ब्मारा जो तेथी ल्याहूँआं ऐं थे।

⁵⁶ होर जेथी केथी से गांऊँआं, सैहरा, या बस्तिया मन्झ जाहाँ था, ता लोक ब्मारा जो बजारा मन्झ रखी किन्हें तेस ले अर्ज करहा ऐं थे कि से ब्मार लोका जो तेसरे कपड़े रा पल्लू ई छूणे दे। होर जितने तेस जो छुहां ऐं थे, स्यों सब ठीक हुई जाहें थे।