मरकुस 14 - मंडयाली नंऊँआं नियम

यीसू जो पकड़ने री योजना

¹ दो ध्याड़े ले बाद फसह रा साजा होर अस्जेह्ड़ी रोटी रा साजा हूंणे वाल़ा था। होर मुख्य याजके होर तेबे व्यवस्था स्खाणे वाल़े एस गल्ला री ताका मन्झ थे कि यीसू जो धोखे किन्हें पकड़े होर मारी दे।

² पर स्यों बोल्हा ऐं थे कि, “साजे रे ध्याड़े नी पकड़णा, केते एह्ड़ा नी हो कि हाल्ला पई जाए।”

यीसू पर कीमती खुस्बूदार इत्रा रा दलणा

³ जेबे यीसू बैतनिय्याह गांऊँआं मन्झ समौन जेसरा यीसूए पैहले कोढ़ ठीक कितिरा था तेसरे घरा खाणा खांदे बैठिरा था। तेबे एक ज्नाने संगमरमरा रे भांडे मन्झ कीमती खुस्बूदार इत्र लई किन्हें आई, होर भांडा तोड़ी किन्हें इत्र तेसरे मूंडा पर दलेया।

⁴ पर कुछ लोक जो तेथी बैठिरे थे स्यों चिढ़ी किन्हें आपणे मना मन्झ बोल्दे लगे, “एस इत्रा री इतनी बरबादी किधियो किती?

⁵ क्यूंकि एस इत्रा री कीमत जो एक साला री कमाई रे बराबर ई एता जो बेची किन्हें गरीबा मन्झ बांडी सक्हा ऐं थे।” होर स्यों तेस्सा ज्नाने जो प्रुआच्दे लगे।

⁶ यीसूए बोल्या, “एस्सा जो छाडी देऊआ; एस्से मेरे साउगी खरा कितेया, तुस्से एस्सा जो किधियो परेसान करेया करहा ऐं?

⁷ गरीब ता तुस्सा साउगी हमेसा रैहणे होर तुस्से जेबे चाहो तेबे तिन्हा किन्हें भलाई करी सक्हा ऐं; पर मां तुस्सा साउगी हमेसा नी रैहणां।

⁸ जो कुछ से करी सकी, तेस्से कितेया; तेस्से मेरे मरणे ले पैहले ई मेरे सरीरा पर इत्र मली किन्हें मेरी दफनाणे री त्यारी करी दिती।

⁹ हांऊँ तुस्सा किन्हें सच्च बोल्हा कि, सारे संसारा मन्झ जेथी केथी मसीह री खुसी री खबर प्रचार किती जाणी, तेथी तेस्सा रे एस कामा री गल्ला तेस्सा री यादा मन्झ बोली जाणी।”

यहूदा इस्करयोति रा धोखा देणा

¹⁰ तेबे यहूदा इस्करयोति जो बारा चेलेया मन्झा ले एक था, मुख्य याजका वाले गया, ताकि से यीसू जो धोखे किन्हे पकड़ने रे कठे तिन्हारी मदद करहे।

¹¹ स्यों ये सुणी किन्हें बौह्त खुस हुए होर यहूदा जो ढब्बे देणे रा वादा कितेया, होर से ये मौका तोप्दा लग्या कि किहाँ हांऊँ यीसू जो पकड़वाऊं?

चेले साउगी फसहा रे साजे री आखरी खाणा

¹² अस्जेह्ड़ी रोटी रे साजे रे पैहले ध्याड़े, जेस मन्झ फसहा रे छेलू रा बलिदान करहा ऐं थे, यीसू रे चेले तेस ले पूछेया, “आस्से फसहा रे साजे रा खाणा केथी त्यार करहे?”

¹³ यीसूए आपणे चेले मन्झा ले दुंहीं जो ये बोली किन्हें भेज्या कि, “यरुस्लेम रे सैहरा मन्झ जाऊआ, होर एक माह्णुं पाणी रा घड़ा ल्याउंदे हुए तुस्सा जो मिलणा, तेसरे पीछे चली जाया।

¹⁴ होर से जेस घरा मन्झ जाए तेस घरा रे माल्का किन्हें बोल्या: ‘आस्सा रा गुरू बोल्हा कि, प्रौह्णे रा कमरा जेथी जे मां आपणे चेलेया साउगी फसहा रे साजे रा खाणा-खाणा, से केथी आ?’

¹⁵ तेस तुस्सा जो एक सजा सजाईरा, होर त्यार कितिरा बडा कमरा दसी देणा, तेथी आस्सा रे कठे खाणे री त्यारी करा।”

¹⁶ होर दो चेले निकली किन्हें सैहरा मन्झ आई गये होर जेह्ड़ा यीसूए तिन्हा किन्हें बोलिरा था, तेह्ड़ा ई पाया, होर तिन्हें फसहा रे साजे रे खाणे री त्यारी किती।

¹⁷ जेबे सांझ हुई, ता यीसू आपणे बारा चेलेया तेस साउगी त्यार कितरे हुए कमरे मन्झ आया।

¹⁸ होर जेबे स्यों बैठी किन्हें खाणा खांदे ही लगिरे थे, ता यीसूए बोल्या, “हांऊँ तुस्सा किन्हें सच्च -सच्च बोल्हा कि, तुस्सा मन्झा ले ऐकीया, जो मेरे साउगी खाणा खाया करहा, हांऊँ पकड़वाणा।”

¹⁹ स्यों दुआस हुई गये, होर स्यों एक-एक करी किन्हें यीसू ले पूछदे लगे, “क्या से हांऊँ आं?”

²⁰ यीसूए तिन्हा किन्हें बोल्या, “से बारा चेले मन्झा ले एक आ, जो मेरे साउगी बैठी किन्हें डोंगें मन्झ रोटी डुबान्दा लगीरा।

²¹ क्यूंकि हांऊँ माह्णुं रे मह्ठे रा मरणा ता पक्का आ, जेह्ड़ा नबिये मेरे बारे पवित्र सास्त्रा मन्झ लिखिरा आ। पर जेस हांऊँ पकड़वाणा तेस कठे ये कितना ड्राऊणा हुणा! होर अगर तेस माह्णुं रा जन्म नी हुन्दा ता तेसरे कठे खरा हुन्दा।”

प्रभु-भोज

²² होर जेबे स्यों खाया करहा ऐं थे ता यीसूए रोटी लई, होर परमेसरा रा धन्यावाद करी किन्हें तोड़ी, होर तिन्हा जो दिती, होर बोल्या, “लऊआ, ये मेरा सरीर आ।”

²³ फेरी तिन्हें अंगूरा रे रसा रा डोंगा लई किन्हें परमेसरा रा धन्यावाद कितेया, होर तिन्हा जो दितेया; होर तिन्हें सभिऐ तेता मन्झा ले पितेया।

²⁴ होर यीसूए तिन्हा किन्हें बोल्या, “ये वाचा रा मेरा से खून आ। होर कई लोका रे पापा रे उद्धारा रे कठे बहाया जाहाँ।”

²⁵ “हांऊँ तुस्सा किन्हें सच्च बोल्हा, ऐबे मां ये अंगूरा रा रस कधी नी पीणा, जेबे तक परमेसरा रे राजा मन्झ नंऊँआं नी पिंऊँ।”

²⁶ फेरी स्यों भजन गाई किन्हें जैतूना रे प्हाड़ा पर चली गये।

पतरसा रा मुखरी जाणे री भविस्यवाणी

²⁷ जेबे स्यों जैतूना रे प्हाड़ा पर जाया करहा ऐं थे तेबे यीसूए तिन्हा किन्हें बोल्या, “आज राती तुस्सा सभिया हांऊँ छाडी देणा होर भगी जाणा,” क्यूंकि पवित्र सास्त्रा मन्झ मेरे बारे मन्झ परमेसरे बोलिरा कि: “‘मां परमेसरा रा पुहाल मारी देणा, होर भेडा ओरे-परे बिखरी जाणी।’

²⁸ पर जिउंदे हूंणे ले बाद मां तुस्सा ले पैहले ई गलील जिल्ले मन्झ ई किन्हें तुस्सा साउगी मिलणा।”

²⁹ पतरसे तेस किन्हें बोल्या, “अगर सभ तुस्सा जो छाडी देह्ंगे तेबे भी मां तुस्से नी छाडणे।”

³⁰ यीसूए तेस किन्हें बोल्या, “हांऊँ तुध किन्हें सच्च बोल्हा कि, आज राती ई कुकड़ा रे दो बारी बांग देणे ले पैहले, तुध त्राय बारी मुखरी जाणा।”

³¹ पर तिन्हें होर जोर देई किन्हें बोल्या, “अगर मुंजो तेरे साउगी मरणा भी पहूंगा, तेबे बी मां तेरी नांह कधी नी करणी।” होर सभी चेले भी एह्ड़ा बोल्या।

गतसमनी बगीचे मन्झ प्रार्थना

³² फेरी यीसू होर चेले गतसमनी बगीचे मन्झ आये; होर तिन्हें आपणे चेले किन्हें बोल्या, जेबे तक हांऊँ प्रार्थना करूं, तुस्से एथी बैठी रैहया।

³³ होर से पतरस होर याकूब होर यहून्ना जो आपु साउगी लई गया; होर से बौह्त ज्यादा दुःखी होर परेसान हुन्दा लग्या,

³⁴ होर यीसूए तिन्हा किन्हें बोल्या, “मेरा मन बौह्त दुआस आ, एथी तक कि मुंजो एह्ड़ा लगी करहा कि हांऊँ मरणे वाल़ा आ: तुस्से एथी रूका, होर मेरे साउगी जागदे रहूआ।”

³⁵ होर से थोह्ड़ा अगे जे चली गया, होर जमीना पर मुंहा रे भारे झुकी किन्हें प्रार्थना करदा लग्या कि, अगर हुई सके ता दुखा रा ये टैम मेरे वाले ले हट्टाई दे।

³⁶ होर बोल्या, “बापू, हे मेरे बाबू, तेरे ले सभ कुछ हुई सक्हा; एस दुखा रा डोंगें जो मेरे वाले ले हट्टाई दे: तेबे भी जेह्ड़ा हांऊँ चाहां तेह्ड़ा नी, पर जो तू चाहां तेह्ड़ा ई हो।”

³⁷ होर यीसूए दबारा वापस आई किन्हें स्यों तीनो चेले सुत्तिरे देखे, होर पतरसा किन्हें बोल्या, “हे समौन, तू सोया करहा? क्या तू एक घंटे भी जागी नी सकेया?

³⁸ जागदे होर प्रार्थना करदे रैहया ताकि जेबे तुस्सा री परखणी हो तेबे तुस्से परखणी रा मुकाबला करी सको। तुस्सा रा मन ता परखणी रा मुकाबला करणे कठे त्यार आ, पर सरीर कमजोर आ।”

³⁹ फेरी यीसू दबारा वापस चली गया, होर पैहले साहीं किन्हें प्रार्थना किती।

⁴⁰ होर यीसूए दबारा वापस आई किन्हें स्यों तीनो चेले सुत्तिरे देखे, क्यूंकि स्यों बौह्त निंद्रा मन्झ थे कि स्यों आपणी हाखिया नी घुआड़ी सके; जेबे यीसूए स्यों आई किन्हें जगाए ता स्यों सर्मिन्दा हुई गये होर स्यों समझी नी पाए कि यीसू जो क्या जवाब दे।

⁴¹ यीसू त्रीजी बारी दबारा वापस आया होर तिन्हा किन्हें बोल्या, “तुस्से हल्ली भी सौंदे होर अराम करदे लगिरे, बस भतेरा हुआ, टैम आई गया; हांऊँ माह्णुं रा मह्ठा पापिया रे हाथा पकड़वाया जाहाँ।

⁴² ऊठा, चला! देखा, मेरा पकड़वाणे वाल़ा नेडे आई गईरा!”

यीसू रा धोखे किन्हें पकड़वाया जाणा

⁴³ यीसू एह्ड़ा बोल्या ई करहा था कि, यहूदा इस्करयोति, जो बारा चेले मन्झा ले एक था, आपणे साउगी मुख्य याजक होर व्यवस्था स्खाणे वाल़े होर यहूदी मुखिये री तरफा ले एक बडी भीड़ तलवारा होर डंडे लई किन्हें झटपट आई पुज्ही।

⁴⁴ होर तेसरे पकड़वाणे वाले यहूदे तिन्हा जो ये चिन्ह दस्सीरा था कि, जेस जो हांऊँ गले लगाऊं, सेई यीसू हूंणां, तेस जो पकड़ी किन्हें स्पाहीया री निगरानी मन्झ लई जाया।

⁴⁵ होर तिन्हें झटपट यीसू वाले जाई किन्हें बोल्या, “हे गुरु!” होर यहूदे यीसू गले लगाया।

⁴⁶ तेबे तिन्हें तेस जो पकड़ी किन्हें गिरफ्तार करी लया।

⁴⁷ होर यीसू रे चेलेया मन्झा ले एकिये तलवार काढी होर बडे याजका रे नौकरा पर चलाई, होर तेसरा कान टुकी दितेया।

⁴⁸ यीसूए तिन्हा किन्हें बोल्या, “क्या तुस्से डाकू समझी किन्हें मुंजो पकड़णे रे कठे तलवारा होर डंडे लई किन्हें निकली रे?

⁴⁹ हांऊँ ता हर रोज मन्दरा मन्झ तुस्सा साउगी रही किन्हें उपदेस देहां था, होर तेबे तुस्से हांऊँ नी पकड़ेया: पर ये इधी कठे हुआ कि पवित्र सास्त्रा री गल्ला पूरी हुई जाए।”

⁵⁰ होर सभ गल्ला जो देखी किन्हें चेले यीसू जो छाडी किन्हें भगी गये।

⁵¹ होर एक जुआन आपणे नांगे सरीरा पर चादर ढखी किन्हें यीसू रे पीछे-पीछे चल्लीरा था; होर लोके तेस जो पकड़णा चाहेया।

⁵² पर से चादर छाडी किन्हें नांगा भगी गया।

माहसभा रे साम्हणें यीसू

⁵³ फेरी स्यों यीसू जो बडे याजका वाले लई गये; होर सभ मुख्य याजके होर यहूदी मुखिये होर व्यवस्था स्खाणे वाल़े तेस वाले कठे हुई गये।

⁵⁴ पतरस दूरा-दूरा ले ई तेसरे पीछे-पीछे बडे याजका रे आंघणा रे अंदर तक गया, होर पैहरेदारा साउगी बैठी किन्हें आग तफ्दा लग्या।

⁵⁵ मुख्य याजक होर सारी माहसभा यीसू जो मारणे रे कठे तेसरे बरखलाफ गुआही री तलासा मन्झ थे, पर नी पाई सके।

⁵⁶ क्यूंकि बौह्त सारे लोक तेसरे बरखलाफ झूठी गुआही देआ करहा ऐं थे, पर तिन्हा लोका री गुआही इतनी मजबूत नी थी कि यीसू पर दोस लगी सके।

⁵⁷ पर कुछ लोके उठी किन्हें तेसरे बरखलाफ झूठी गुआही देंदे लगे

⁵⁸ कि “आस्से यीसू जो बोल्दे सुणीरा कि, ‘मां ये हाथा रा बणाईरा मन्दर ढाई देणा, होर तीन ध्याड़े मन्झ होर दूजा मन्दर बणाई देणा जो हाथा ले नी बणीरा हो।’”

⁵⁹ पर एस गल्ला पर भी तिन्हारी गुआही एक बराबर नी थी।

⁶⁰ तेबे बडे याजके बीचा मन्झ खड़ी किन्हें यीसू ले पूछेया; कि “तू कोई जवाब नी देंदा? ये लोक तेरे बरखलाफ गुआही देआ करहा ऐं?”

⁶¹ पर से चुपचाप रैहया, होर कुछ जवाब नी दितेया। बडे याजके दबारा तेस ले पूछेया, “क्या तू तेस धन्य परमेसरा रा मह्ठा मसीह आ?”

⁶² यीसूए बोल्या, “हां, हांऊँ आं! होर हांऊँ माह्णुं रा मह्ठा तुस्सा सर्वसक्तिमान परमेसरा री सीधी वखा जो बैठीरे देखणा, होर आसमाना रे बादला साउगी आऊंदे देखणा।”

⁶³ यीसू जेबे एह्ड़ा बोल्दा लगीरा था ता ये सुणी किन्हें तेबे बडे याजके आपणा चोगा छेकी किन्हें बोल्या, “ऐबे आस्सा जो होर गुआहा रा क्या काम आ?”

⁶⁴ “तुस्से सब यीसू जो परमेसरा री निंदा करदे हुए सुणी करहा ऐं; तुस्सा रा क्या विचार आ?” तिन्हें सभिए बोल्या, ये मौता री सजा रे लायक आ।

⁶⁵ तेबे कुछ तेस पर थुकदे लगे, होर तेसरा मुंह ढकदे होर तेस जो मुक्के मारी किन्हें, तेस किन्हें बोल्दे लगे, “लोक तुजो नबी बोल्हा ऐं ऐबे अंदाजा लगाई किन्हे बोल तुजो कुण मारेया करहा!” होर पैहरेदारे यीसू जो पकड़ी किन्हें चांडे मारे।

पतरसा रा मुखरी जाणा

⁶⁶ जेबे पतरस हेठ आंघणा मन्झ था, ता बडे याजका री नौकराणिया मन्झा ले एक तेथी आई।

⁶⁷ तेस्से पतरसा जो आग तफदे देख्या होर तेस जो ध्याना किन्हें देखी के बोलदी लगी, “तू भी तेस नासरता रे यीसू साउगी था।”

⁶⁸ से मुखरी गया, होर बोल्या, “ना हांऊँ तेस जो जाणहां होर ना मेरी समझा मन्झ आया करहा कि तू क्या बोल्या करहा ई?” फेरी से बाहर दुराजे री चोखटा वाले गया; होर तेभे ई कुकड़े बांग दिती।

⁶⁹ जेबे नौकराणिये पतरसा जो तेथी खड़ीरे देख्या तेबे से लोका साउगी बोल्दी लगी कि, “ये भी यीसू रे लोका मन्झा ले एक आ।”

⁷⁰ पर पतरस दबारा मुखरी गया। होर कुछ टैमा बाद कुछ लोक जो ओरे परे खड़ीरे थे तिन्हें पतरसा किन्हें बोल्या, “पक्का तू यीसू रे साउगी रैह्णे वाल़ेया मन्झा ले एक आ; क्यूंकि तुस्सा री गला ले लग्या करहा कि तू भी गलील जिल्ले रा आ।”

⁷¹ पतरसे बोल्या हांऊँ कसम खाई किन्हें बोल्हा कि, “हांऊँ तेस माह्णुं जो नी जाणदा, जेसरे बारे मन्झ जे तुस्से गल्ला करेया करहा ऐं।”

⁷² होर तिहां ईं दूजी बारी कुकड़े बांग दिती, पतरसा जो यीसू री बोलिरी ये गल याद आई कि, “कुकड़ा रे दो बार बांग देणे ले पैहले तुध त्राय बारी मेरी नांह करणी।” से तेसरी ये गल्ला सोची किन्हें बड़ा भारी रोंदा लग्या।