मरकुस 13 - मंडयाली नंऊँआं नियम

मन्दरा रे विनासा रे बारे मन्झ दसणा

¹ जेबे यीसू होर तेसरे चेले मन्दरा ले निकल्या करहा था, ता तेसरे चेले मन्झा ले एकिये तेस किन्हें बोल्या, “हे गुरू, देख, केह्ड़े-केह्ड़े पात्थर लगीरे होर केह्ड़ी बांकी कोठिया बणीरी!”

² यीसूए तेस किन्हें बोल्या, “हां यूं कोठिया नौखी ई पर एता मन्झ एक पात्थर भी नी बचणा: क्यूंकि एक-एक पात्थर ढाली दितेया जाणा होर सभ कुछ नास हुई जाणा।”

यीसू रे दबारा वापस आऊणें रा चिन्ह

³ जेबे यीसू मन्दरा रे साम्हणें वाले जैतूना रे प्हाड़ा पर कल्हे बैठीरा था, तेबे पतरसे, याकूबे, यहून्ने होर अन्द्रियासे जाई किन्हें तेस ले पूछेया,

⁴ कि “आस्सा जो दस कि ये गल्ला कधी हूणीं? होर जेबे ये गल्ला पूरी हूणीं तेस टैमा रा क्या चिन्ह हूंणां।”

⁵ यीसू तिन्हा किन्हें बोल्दा लग्या, “चतन्न रैहया कि कोई तुस्सा जो ना भरमाए।

⁶ क्यूंकि बौह्त लोका मेरे हका मन्झ आऊंणा, होर तिन्हा बोलणा कि, ‘हांऊँ मसीह आ,’ होर तिन्हा बौह्त लोक भरमाणे।

⁷ होर जेबे तुस्से लड़ाई, होर लड़ाईया री गल्ला सुणघे, ता डरदे देख्या; क्यूंकि इन्हारा हूंणां जरूरी आ, पर तेस टैम अंत नी हूंणां।

⁸ क्यूंकि एक जातिया दूजी जाति रे बरखलाफ, होर एक राज्या दूजे राज्या रे बरखलाफ लड़ाई करणी, होर कई जगहा पर हिलण हूंणे, होर अकाल पौऊणे, ये ता सिर्फ पीड़ा री सुरूआत ई जिहां बच्चे रे जन्मा रे टैम एक जनाने जो कस्ट हुंहाँ। पर एता ले बी ज्यादा कस्ट हल्ली आऊणें बाकि ऐं।”

⁹ “पर तुस्से आपणे बारे मन्झ चतन्न रैहया, क्यूंकि लोका मेरे चेले हूंणे री वजहा ले तुस्से गांऊँआं रे पंचायता मन्झ सौंपणे, होर तुस्से यहूदी सभा मन्झ मारे पिटे जाणे; होर हाकमा होर राजे रे अगे सज़ा रे कठे खड़े हूंणां पौऊणा, ताकि तुस्से मेरे बारे मन्झ गुआही देई सको।

¹⁰ पर जरूरी आ कि पैहले खुसी री खबर सब जातिया रे लोका मन्झ प्रचार कितेया जाए।

¹¹ जेबे तिन्हा तुस्से बंदी बनाई कर लई जाणे, ता पैहले ले फिकर नी करणी कि आस्सा क्या बोलणा। पर जो कुछ बोलणा हून्घा, से तुस्सा जो तेस ई टैम दसी दितेया जाणा। क्यूंकि बोलणे वाल़े तुस्से नी ऐे, पर पवित्र आत्मा ई।”

¹² “होर कई भाईया-बैहणीया आपणे विस्वासी भाई बैहण, होर कई माऊ-बापू आपणे बाल बच्चे रे खिलाफ हुई किन्हें स्यों मुकाई देणे, होर बाल बच्चेया भी आपणे माऊ-बापू धोखे किन्हें मुकाई देणे।

¹³ होर तुस्से मेरे पर विस्वास रख्हा ऐं इधी कठे सभी लोका तुस्सा किन्हें बैर करणा। पर जो आपणे मरणे रे टैमा तक मेरे पर विस्वास करघा, तेसरा ई उद्धार हूंणां।”

आखरी ध्याड़े मन्झ संकटा री सुर्हूआत

¹⁴ “पढ़ने वाले एस चेतावनी पर ध्यान दे, जेह्ड़ा दानियेल नबिये दसेया कि जेस ध्याड़े तुस्से तेस मन्दरा मन्झ दुस्ट चीज खड़ीरे देखो जेथी जे तेस जो नी हूंणां चहिए होर जेसरी वजहा ले लोका मन्दर छाडी देणा तेबे यहूदिया ईलाके रे लोक प्हाड़ा पर भगी जाए।

¹⁵ जो लोक घरा री छता पर हो, स्यों आपणे घरा ले कुछ समान लेणे रे कठे टैम बर्बाद नी करहे होर ना अंदर जाए।

¹⁶ होर जो लोक डोहर्रिया मन्झ हो, से आपणे कपड़े लेणे रे कठे वापस नी आये।

¹⁷ तिन्हा ध्याड़े जो गर्भवती होर दूध प्याणे वाली ज्नानिया हूणीं, तिन्हारे कठे मुंजो बौहत दुःख हुएआ करहा, क्यूंकि तिन्हारे कठे भगणा बौहत मुस्कल हूंणां।

¹⁸ होर प्रार्थना करेया करा कि, ये सब ठंडा रे ध्याड़े मन्झ नी हो।

¹⁹ क्यूंकि स्यों ध्याड़े एह्ड़े दुःखा रे हूंणे कि, जिहां सृस्टी री सुरूआता ले, जेभे ले परमेसरे ये सृस्टी रचीरी, आज तक ना कधी एह्ड़ा हुआ होर ना फेरी दबारा कधी हूंणा।

²⁰ होर अगर प्रभु तिन्हा ध्याड़े जो नी घटान्दा, ता कोई भी प्राणी नी बचदा; पर तिन्हा चुणिरे लोका री वजहा ले, स्यों ध्याड़े घटाये जाणे।

²¹ तेस टैम अगर कोई तुस्सा किन्हें बोले कि, ‘मसीह एथी आ!’ या ‘मसीह तेथी आ!’ ता विस्वास देख्या करदे।

²² क्यूंकि झूठे मसीह होर झूठे नबिया आऊंणा, होर तिन्हा चिन्ह होर चमत्कार दसणे, होर हुई सके ता परमेसरा रे चुणिरे लोक भी भरमाई देणे।

²³ पर तुस्से चतन्न रैहया, देखा, मैं तुस्सा जो ये सभ गल्ला हूंणे रे पैहले ई दसी दीतिरी।”

यीसू रा दबारा आऊंणा

²⁴ “तिन्हा ध्याड़े, ‘तेस दुःखा ले बाद सूरज काला हुई जाणा, होर चांदा भी नी चमकणा,

²⁵ होर आसमाना ले तारे पऊंदे लगणे, होर आसमाना री सक्तिया हिल्लाई जाणी।’

²⁶ तेबे लोका हांऊँ माह्णुं रा मह्ठा बडी सामर्था होर महिमा साउगी बादला मन्झ आऊंदे देखणा।

²⁷ तेस टैम तेस आपणे स्वर्गदूत भेजणे, ताकि स्यों धरती रे हर जगहा ले चुणिरे लोक कठे करहे।”

अंजीरा रे डाला रा उदाहरण

²⁸ “अंजीरा रे डाला ले ये उदाहरण सीखा, जेबे तेसरे पांगे नरम हुई जाहें; होर पातर निकल्दे लग्हा ऐं; ता तुस्से जाणी लैहां ऐं कि, गर्मी रा मौसम नेडे आ।

²⁹ इंहां ईं जेबे तुस्से इन्हा गल्ला जो हुंदे देखो, ता जाणी लया कि, मेरे आऊणें रा टैम नेडे आ, बल्कि बौह्त नेडे आ।

³⁰ हांऊँ तुस्सा किन्हें सच्च बोल्हा कि, ये सभ चीजा हूणे ले पैहले, एस्सा पीढ़िया रा अंत नी हूंणां।

³¹ आसमान होर धरती टली जाणे, पर जो मैं बोली दितेया, से पूरा हुई किन्हें रैहणा।”

त्यार रैहया

³² “तेस ध्याड़े या तेस घड़ी रे बारे मन्झ कोई नी जाणदा, ना स्वर्गदूत होर ना मह्ठा; पर सिर्फ बापू जाणहां।

³³ जागदे होर प्रार्थना करदे रैहया, क्यूंकि तुस्से नी जाणदे कि से टैम केभे आऊंणा।

³⁴ तेसरा आऊंणा तेस माह्णुं साहीं हूंणां, जिहां एक माह्णुं परदेसा जांदे वक्त आपणा घर छाडी जाए। होर आपणे नौकरा जो हक दे, होर हर एकी जो तेसरा काम समझाई दे, होर चौकीदारा जो जागदे रैहणे रा हुक्म दे।

³⁵ इधी कठे जागदे रैहया, क्यूंकि तुस्से नी जाणदे कि घरा रे माल्का केभे आई जाणा, सांझा या आधी राती, या कुकड़ा री बांग देणे रे टैमा या भ्यागा।

³⁶ एह्ड़ा हुई सक्हा कि जेबे तेस अचानक आऊंणा ता हुई सक्हा कि तुस्से त्यार नी हो।

³⁷ होर जो हांऊँ तुस्सा किन्हें बोल्हा, तेह्ड़ा ई सभी किन्हें बोल्हा: जागदे रैहया।”