मरकुस 10 - मंडयाली नंऊँआं नियम

तलाका रे बारे मन्झ यीसू रा उपदेस

¹ फेरी यीसूए कफरनहूम सैहरा ले निकली किन्हें यहूदिया ईलाके रा बन्ना पार करी किन्हें यरदन दराऊआ रे पारली तरफ आया। होर भीड़ तेस वाले दबारा कठी हुई गयी, होर से हमेसा साहीं तिन्हा जो उपदेस देंदा लग्या।

² तेबे फरीसी लोक तेस वाले आई किन्हें तेसरी परखणी करणे रे कठे तेस ले पूछेया, “क्या मूसा री व्यवस्था रे मताबक ये ठीक आ कि मर्ध आपणी लाड़ी जो तलाक देई सक्हा?”

³ यीसूए तिन्हा ले पूछेया, “कि मूसे तुस्सा जो क्या हुक्म दितिरा?”

⁴ तिन्हें जवाब दितेया, “मूसे बोल्या की त्याग पत्र देई किन्हें आपणी लाड़ी जो छाडी सक्हा ऐं।”

⁵ यीसूए तिन्हा किन्हें बोल्या कि, “तुस्से जिद्दी ऐं, एस वजहा ले मूसे नबिये तुस्सा रे कठे ये हुक्म लिख्या।”

⁶ “पर सृस्टी रे सुर्हूआता, ले ई परमेसरे ‘मर्ध होर जन्नाने करी किन्हें तिन्हा जो बणाया।’

⁷ ‘एता कठे माह्णुंआं आपणे माऊ-बापू ले लग हुई किन्हें आपणी लाड़ी रे साउगी रैहणां।

⁸ होर तिन्हा दुंहींया एक हूंणां।’ इधी कठे स्यों ऐबे दो नी, पर एक हूंणे।

⁹ इधी कठे जेस जो परमेसरे जोड़िरा हो, तेस जो माह्णुं लग नी करहे।”

¹⁰ जेबे से बादा मन्झ घरा चेले साउगी कल्हा था एता रे बारे मन्झ तेस ले दबारा पूछेया।

¹¹ तिन्हें तिन्हा किन्हें बोल्या, “जो कोई आपणी लाड़ी जो तलाक देई किन्हें दूजी किन्हें ब्याह करहे, ता से तेस्सा पैहली रे बरखलाफ व्यभिचार करहा।

¹² होर अगर ज्नाने आपणे लाड़े जो तलाक देई किन्हें दूजे किन्हें ब्याह करही, ता से भी व्यभिचार करहा ई।”

बच्चेया जो आसरीवाद

¹³ फेरी लोक बच्चेया जो यीसू वाले ल्याउंदे लगे, ताकि से तिन्हा पर हाथ रखी किन्हें तिन्हा जो आसरीवाद दे, पर चेले तिन्हा माऊ-बापू जो बक्के।

¹⁴ जेबे यीसू ये देखी किन्हें आपणे चेले किन्हें गुस्सा हुई गया होर तिन्हा किन्हें बोल्या, “बच्चेया जो मेरे वाले आऊणें देआ होर इन्हा जो नांह नी करा, क्यूंकि परमेसरा रा राज एह्ड़े लोका रा आ जो बच्चे साहीं नम्र ऐं।

¹⁵ हांऊँ तुस्सा किन्हें सच्च बोल्हा कि, जो कोई परमेसरा रे राजा जो बच्चेया साहीं ग्रैहण करा, तेस तेता मन्झ दाखल हूंणां।”

¹⁶ होर यीसूए बच्चे गोदा मन्झ लये, होर तिन्हा पर हाथ रखी किन्हें तिन्हा जो आसरीवाद दितेया।

परमेसरा रे राजा मन्झ अमीरा रा दाखल हूंणां

¹⁷ जेबे यीसूए आपणे चेले साउगी यरुस्लेम वखा जो जाणे रे कठे आपणा सफर सुर्हू कितेया, ता एक माह्णुं तेस वाले दौड़ी किन्हें आया, होर तेसरे अगे घुटणे टेकी किन्हें तेस ले पूछेया? “हे खरे गुरु, अनंत जिन्दगी पाणे रे कठे हांऊँ क्या करूं?”

¹⁸ यीसूए तेस किन्हें बोल्या, “तू मुंजो खरा कि बोल्हा? परमेसरा जो छाडी किन्हें कोई खरा नी आ।

¹⁹ पर तू हुक्मा जो ता जाणहां, ‘हत्या नी करणा, व्यभिचार नी करणा, चोरी नी करणा, झूठी गुआही नी देणा, धोखा नी देणा, होर आपणे माऊ बापू री इज्जत करणी।’”

²⁰ तिन्हें तेस किन्हें बोल्या, “हे गुरु, इन्हा सभी गल्ला जो ता हांऊँ बचपना ले ई मन्नदा आईरा। क्या मुन्जो कुछ होर भी करणा पऊणा?”

²¹ यीसू तेस वखा जो देख्दा लगया होर यीसू जो तेस पर बौह्त प्यार आया, होर तेस किन्हें बोल्या, “तेरे अंदर एक गल्ला री कमी ई, जा जो कुछ तेरा आ तेता जो बेची किन्हें गरीबा जो दे फेरी आई किन्हें मेरा चेला बण, होर तुजो स्वर्गा मन्झ धन मिलणा।”

²² एस गल्ला ले तेसरे चेहरे पर दुआसी छाई गयी, होर से दुःखी हुई किन्हें चली गया, क्यूंकि से बौह्त अमीर था होर आपणी जायदाद नी बेचणा चाहन्दा था।

²³ यीसूए चारो तरफ देखी किन्हें आपणे चेले किन्हें बोल्या, “अमीरा रा परमेसरा रे राजा मन्झ दाखल हूंणां बौह्त कठण आ!”

²⁴ चेले तेसरी गल्ला ले बौह्त हरान हुए। एता पर यीसूए दबारा तिन्हा जो जवाब दितेया, “हे भाईयो, जो धन दौलता पर भरोसा रख्हा ऐं, तिन्हारे कठे परमेसरा रे राजा मन्झ दाखल हूंणां बौह्त कठण आ!

²⁵ ऊंटा रा सुई रे नाके मन्झा ले निकल्ना असान हुई सक्हा पर परमेसरा रे राजा मन्झ अमीरा रा दाखल हूंणां बौह्त कठण आ।”

²⁶ चेले बौह्त ई हरान हुई किन्हें आपु मन्झ बोल्दे लगे जे अमीरा रा परमेसरा रे राजा मन्झ दाखल हूंणां बौह्त कठण आ “ता फेरी केसरा उद्धार हुई सक्हा?”

²⁷ यीसूए तिन्हा जो देखी किन्हें बोल्या, “माह्णुंआं ले ता ये हुई नी सक्दा, पर परमेसरा ले हुई सक्हा; क्यूंकि परमेसरा ले सभ कुछ हुई सक्हा।”

²⁸ पतरस तेस किन्हें बोल्दा लग्या कि, “देख, आस्से ता सभ कुछ छाडी किन्हें तेरे चेले बणी गईरे ता आस्सा जो क्या मिलणा?”

²⁹ यीसूए बोल्या, हांऊँ तुस्सा किन्हें सच्च बोल्हा कि, “जिन्हें जे मेरे होर मेरे खुसी री खबरा रे कठे घर-बार या भाई-बैहण या माऊ-बापू या बाल बच्चे या जमीन छाडिरी हो,

³⁰ तिन्हा जो एस युगा मन्झ घर-बार होर भाई-बैहण होर माऊ, बाल-बच्चे होर जमीन, सौ गुणा वापस मिलणे। हलांकि मेरे चेले हूंणे री वजहा ले एस संसारा मन्झ रैहन्दे हुए स्यों स्ताए जाणे, आऊणें वाले युगा मन्झ तिन्हा जो अनंत जिन्दगी मिलणी।

³¹ पर बौह्त जो ऐबे खास हुन्घे तिन्हा बादा मन्झ खास नी हूंणां होर जो ऐबे खास नी ऐं तिन्हा बादा खास हूंणां।”

आपणी मौता रे बारे मन्झ यीसू रा त्रीजी बारी दसणा

³² यीसू, चेले होर दूजे लोक यरुस्लेम सैहरा जो जांदे लगिरे थे। जेबे स्यों पैंडे मन्झ थे, यीसू तिन्हारे अगे-अगे जाया करहा था: चेले हरान हुंदे लगे होर जो लोक तेसरे पीछे चल्या करहा ऐं थे, स्यों डरदे लगे। तेबे यीसू तिन्हा बारा चेले जो लग लई गया, फेरी से तिन्हा किन्हें आपणे मरणे रे बारे मन्झ गल्ला करदा लग्या।

³³ “आस्से यरुस्लेम सैहर जो जाहें, होर तेथी हांऊँ माह्णुं रा मह्ठा मुख्य याजको होर व्यवस्था स्खाणे वाल़ेया रे हाथा पकड़वाया जाणा। होर तिन्हा मुंजो मौता री सजा देणी होर अन्यजाति लोका रे हाथा मन्झ पकड़ाई देणा।

³⁴ होर तिन्हा मेरा मजाक डूआणा, होर मेरे पर थूकणा, होर मुन्जो कोड़े मारणे, होर हांऊँ मुकाई देणा, होर मां त्रीजे ध्याड़े जिउंदे हुई जाणा।”

याकूब होर यहून्ना री अर्ज

³⁵ तेबे जब्दी रे मह्ठे याकूब होर यहून्ना तेस वाले आई किन्हें बोल्दे लगे, “हे गुरु, आस्से ये चाहें कि, जो आस्से तेरे ले मांगे, सेई तू आस्सा रे कठे कर।”

³⁶ होर यीसूए तिन्हा किन्हें बोल्या, “तुस्से क्या चाहें कि हांऊँ तुस्सा रे कठे करूं?”

³⁷ तिन्हें तेस किन्हें बोल्या, “आस्सा जो ऐं हक दे कि जेबे तुध महिमा मन्झ आऊंणा ता आस्से तेरे साउगी बैठे, एक ओरली वखा जो होर दूजा परली वखा जो।”

³⁸ यीसूए तिन्हा किन्हें बोल्या, “तुस्से नी जाणदे कि, क्या मान्घ्हा ऐं? जो दुखा रा डोंगा हांऊँ पीणे वाल़ा आ; क्या तुस्से पी सक्हा ऐं होर मौता रा बपतिस्मा जे मा लेणा क्या तुस्से लई सक्हा ऐं?”

³⁹ तिन्हें तेस किन्हें बोल्या, “आस्सा ले हुई सक्हा।” यीसूए तिन्हा किन्हें बोल्या, “जो दुखा रा डोंगा हांऊँ पीणे वाल़ा आ, तुस्सा भी पीणा; होर जो मौता रा बपतिस्मा हांऊँ लैणे वाल़ा आ, से तुस्सा भी लैणा।

⁴⁰ पर मुन्जो ये बोलणे रा हक नी आ कि मेरे ओरली वखा जो परली वखा जो केस बैठणा, परमेसरे आपणे चुणिरे लोका रे कठे तेह्ड़ी जगहा त्यार कितिरी।”

⁴¹ ये सुणी किन्हें, दसा रे दस चेले तिन्हा दुंहीं भाईया याकूब होर यहून्ना पर गुस्सा हुए।

⁴² होर यीसूए स्यों सभ आपु वाले सादे, होर तिन्हा किन्हें बोल्या, “तुस्से जाणहां ऐं कि, जो अन्यजाति लोका रे हाकम समझे जाहें, स्यों तिन्हा पर राज करहा ऐं। होर जो बडे ऐं, स्यों तिन्हा पर हक जताहें।

⁴³ पर तुस्सा मन्झ एह्ड़ा नी आ, जो कोई तुस्सा मन्झ बडा हूंणां चाहां से तुस्सा रा सेऊआदार बणे।

⁴⁴ होर तुस्सा मन्झ जो कोई मुखिया बणना चाहे, तेस जो सभिरा गुलाम बणना जरूरी आ।

⁴⁵ क्यूंकि हांऊँ माह्णुं रा मह्ठा इधी कठे नी आईरा कि, मेरी सेऊआ किती जाए, पर इधी कठे आईरा कि, हांऊँ आपु दूजे री सेऊआ करूं, होर कईया रे छुटकारे रे कठे आपणी जान देऊँ।”

काणे बरतिमाई रा ठीक हूंणां

⁴⁶ होर यीसू होर तेसरे चेले यरुस्लेम सैहरा वखा जो सफर करदे हुए ऐबे यरीहो सैहरा मन्झ आये। तेबे स्यों होर एक बडी भीड़ यरीहो छाडी किन्हें जाया करहा ई थी, ता तिमाई रा मह्ठा बरतिमाई नांऊँआं रा एक काणा भिखारी, सड़का रे बाढे बैठिरा था।

⁴⁷ जेबे काणे भिखारिये ये सुणेया कि नासरता रा यीसू तेथी ले हुई किन्हें जाया करहा; से हाका पाई किन्हें बोल्दा लग्या, “हे राजा दाऊदा रे मह्ठे (यीसू राजा दाऊदा रे बंसा रा था) यीसू मेरे पर दया कर।”

⁴⁸ कई लोके से प्रुआचेया कि से चुपचाप रह, पर से होर ज्यादा चिंगदा लग्या कि, “हे राजा दाऊदा रे मह्ठे, मेरे पर दया कर।”

⁴⁹ तेबे यीसू रुक्या होर बोल्या, एस जो मेरे वाले ल्याउआ, “होर लोके तेस काणे जो सादी किन्हें तेस किन्हें बोल्या, हिम्मत कर, उठ खड़ा हुई जा, यीसू तुजो सादेया करहा।”

⁵⁰ जेह्ड़ा चोगा तिन्हें ढकिरा था तेस जो सट्टी किन्हें एकदम उठेया होर यीसू वाले आई गया।

⁵¹ होर यीसूए तेस किन्हें बोल्या, “तू क्या चाहां कि हांऊँ तेरे कठे करूं?” होर काणे तेस किन्हें बोल्या, “हे गुरु, हांऊँ बस इतना चाहां कि हांऊँ देख्दा लगी जाऊं।”

⁵² यीसूए तेस किन्हें बोल्या, “चली जा, ते विस्वास कितेया इधी कठे तू ठीक हुआ।” होर से झटपट देख्दा लग्या, होर से यीसू साउगी पैंडे मन्झ चली पया।