मत्ती 4 - मंडयाली नंऊँआं नियम

सैताना रे ज्रीए यीसू री परखणी

¹ तेबे पवित्र आत्मा यीसू जो बियाबान जगहा मन्झ लई गया ताकि सैताना ले तेसरी परखणी हो।

² से चाली ध्याड़े, होर चाली रात, बगैर खाधे पिते रैहया, बादा मन्झ तेस जो भूख लगी।

³ तेबे परखणे वाल़े सैताने तेस वाले आई किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे इन्हा पात्थरा जो रोटी बणने रा हुक्म दे ताकि तू खाई सके।”

⁴ यीसूए जवाब दितेया, “पवित्र सास्त्र मन्झ लिखिरा कि: ‘माह्णुं सिर्फ रोटीया ले ई नी, पर हर एक बचना ले जो परमेसरा रे मुंहा ले निकल्हा जिउंदा रैंह्णां।’”

⁵ तेबे सैताने यीसू पवित्र सैहरा यरुस्लेम मन्झ लई जाई किन्हें मन्दरा री चोटी पर खड़ा करी दितेया।

⁶ होर तिन्हें यीसू किन्हें बोल्या, “अगर तू परमेसरा रा मह्ठा आ, ता एतो साबित करणे रे कठे आपणे आपा जो एथी ले हेठा जो सट्टी दे होर तुजो चोट नी लगणी क्यूंकि, परमेसरे पवित्र सास्त्र मन्झ ये लिखिरा कि: ‘तेस तेरे बारे मन्झ आपणे स्वर्गदूता जो हुक्म देणा, होर तेस तुस्से हाथो-हाथ चकी लैणे; केते एह्ड़ा नी हो कि तेरे पैरा जो पात्थरा किन्हें चोट लगे।’”

⁷ यीसूए तेस किन्हें बोल्या, “पवित्र सास्त्र मन्झ ये भी लिखिरा आ कि, ‘तू प्रभु आपणे परमेसरा री परखणी मत कर।’”

⁸ फेरी सैतान तेस जो एक उचे प्हाड़ा पर लई गया होर तेस जो सारे संसारा रे सारे राज होर तिन्हारी सान दसी।

⁹ तेबे सैताने यीसू किन्हें बोल्या, “कि अगर तू मुंहा रे भारे पई किन्हें मेरी अराधना करहे, ता मां ये सब कुछ तुजो देई देणा।”

¹⁰ तेबे यीसूए तेस किन्हें बोल्या, “हे सैतान दूर हुई जा, क्यूंकि पवित्र सास्त्र मन्झ लिखिरा कि: ‘तू प्रभु आपणे परमेसरा री अराधना कर, होर सिर्फ तेसरी सेऊआ कर।’”

¹¹ तेबे सैतान तेस वाले ले चली गया, होर स्वर्गदूत आई किन्हें तेसरी सेऊआ करदे लगे।

गलील जिल्ले मन्झ यीसू री सेऊआ

¹² जेबे यीसूए ये सुणेया कि यहून्ना बपतिस्मा देणे वाल़ा गिरफ्तार करी लितिरा। ता से यहूदी जिल्ले जो छाडी किन्हें फेरी गलील जिल्ले जो चली गया।

¹³ होर यीसू पैहले नासरत गांऊँआं जो गया होर तेथी ले कफरनहूम सैहरा मन्झ जाई किन्हें रैहंदा लग्या, जो गलील समुद्रा रे बाढे पर आ, जेथी जबूलून होर नप्ताली गोत्रा रे लोक रैंहयां ऐं थे।

¹⁴ ताकि जेह्ड़ा जे यसायाह नबी रे ज्रीए बोल्या गईरा था, से पूरा हो।

¹⁵ “जबूलून होर नप्ताली गोत्रा रे ईलाके मन्झ रैहणे वाले लोक, जेह्ड़े गलील समुद्रा रे बाढे मन्झ, यरदन दराऊआ रे पारा, यानि गलील जिल्ले मन्झ रैहणे वाले गैर-यहूदी लोक।

¹⁶ जो लोक नह्यारे मन्झ रहें थे तिन्हें बडी ज्योति देखी; होर जो लोक तेस जगहा मन्झ रहें थे, जेथी हमेसा मौता रा खतरा हुंहाँ था, तिन्हा पर प्रयासा चमक्या।”

¹⁷ तेस टैमा ले यीसूए प्रचार करणा होर ये बोलणा सुर्हू कितेया कि, “पाप करणा छाडी देआ क्यूंकि स्वर्गा रा राज नेडे आई गईरा।”

पैहले चेले रा सादेया जाणा

¹⁸ तिन्हें गलील समुद्रा रे बाढे फिरदे हुए समौन जो, जेस्जो जे पतरस बी बोल्हा ऐं, होर तेसरे भाई अन्द्रियासा जो समुद्रा मन्झ जाल पांदे देख्या, क्यूंकि स्यों मछी पकड़ने वाल़े थे।

¹⁹ होर यीसूए तिन्हा किन्हें बोल्या, “मेरे चेले बणा, होर आऊआ मां तुस्से स्खाणे कि चेले किहाँ बनाणे।”

²⁰ होर स्यों झटपट जाल छाडी किन्हें तेसरे चेले बणने रे कठे तेस साउगी चली पये।

²¹ फेरी तिन्हें थोह्ड़ा अगे जाई किन्हें, जब्दी रे मह्ठे याकूब होर तेसरे भाई यहून्ना जो तेसरे बापू साउगी किस्तिया पर जाल ठीक करदे देख्या; होर तिन्हें स्यों भी सादे।

²² स्यों झटपट आपणा बापू होर किस्ती जो छाडी किन्हें यीसू साउगी चली गये।

यीसू रे ज्रीए ब्मारा जो ठीक करणा

²³ होर यीसू सारे गलील जिल्ले मन्झ फिरदा हुआ तिन्हारी यहूदी सभा मन्झ उपदेस देंदा होर परमेसरा रे राजा री खुसी री खबर प्रचार करदा, होर लोका जो हर किस्मा री ब्मारी होर कमजोरी जो दूर करदा रैहया।

²⁴ होर गलील जिल्ले रे उत्तरा रे सीरिया ईलाके तक तेसरा नांऊँ फैल्ही गया; होर लोक सभ ब्मार माह्णुंआं जो जेह्ड़े कई किस्मा री ब्मारिया होर दुःखा मन्झ जकड़ीरे थे, होर जिन्हा मन्झ दुस्टात्मा थी होर मिर्गी वाल़े होर अध्रन्गा रे ब्मार जो तेस वाले लई आये होर तिन्हें स्यों सभ ठीक करेया किते।

²⁵ होर गलील जिल्ले, दिकापुलिस (दस सैहर), यरुस्लेम सैहर, यहूदिया ईलाके, होर यरदन दराऊआ रे पारा वखा री एक बडी भीड़ तेसरे साउगी चली पई।