मत्ती 23 - मंडयाली नंऊँआं नियम

व्यवस्था स्खाणे वाल़े होर फरीसी लोका ले चतन्न

¹ यीसूए भीड़ा रे लोका होर आपणे चेले किन्हें बोल्या,

² “व्यवस्था स्खाणे वाल़े होर फरीसी लोक मूसा री व्यवस्था जो हका किन्हें स्खाणे रे कठे माहिर ये;

³ इधी कठे स्यों तुस्सा किन्हें जो कुछ बोले तेह्ड़ा ई करेया, होर मन्या। पर तिन्हा साहीं काम देख्या करदे, क्यूंकि स्यों बोल्हा ऐं ता जरुर ऐं पर करदे नी।

⁴ स्यों आपणे कई किस्मा रे हुकमा जो माह्णुंआं रे खऊये पर रख्हा ऐं जो तिन्हारे कठे गर्के बजना साहीं आ। पर स्यों आपु तेता जो मनणे रे कठे कोसिस भी नी करदे।

⁵ स्यों आपणे सारे काम लोका जो दसणे रे कठे करहा ऐ: स्यों आपणे ताबीज (स्यों पट्टिया पर पवित्र सास्त्र जो लिखी किन्हें आपणे माथे होर बाहिंयां पर बान्हा ऐं थे) चौड़े करहा ऐं, होर आपणे कपड़े री झालरा बडी करहा ऐं।

⁶ होर धामा मन्झ खास-खास जगहा, होर यहूदी सभा मन्झ खास-खास आसना मन्झ बैठणा पसंद करहा ऐं।

⁷ होर बजारा मन्झ नमस्कार होर माह्णुं रे बीचा मन्झ गुरु बणना तिन्हा जो खरा लग्हा।

⁸ पर, तुस्से गुरु देख्या बणदे, क्यूंकि तुस्सा रा एक ई गुरु आ: होर तुस्से सारे भाई बैहण एक ऐं।

⁹ होर धरती पर केसी जो आपणा बापू (लोक धार्मिक अगुवे जो होर महान गुरुआ जो बापू बोल्हा ऐं थे) देख्या बोल्दे, क्यूंकि तुस्सा रा एक ई बापू आ, होर जो स्वर्गा मन्झ परमेसर आ से ही तुस्सा रा आत्मिक बापू आ।

¹⁰ होर तुस्से माल्क भी देख्या कैहलांदे, क्यूंकि मसीह तुस्सा रा एक ई माल्क आ।

¹¹ जो तुस्सा मन्झ बडा हो, से तुस्सा रा सेवक बणे।

¹² जो कोई आपणे आपा जो बडा बणाहंगा, से छोटा कितेया जाणां। होर जो कोई आपणे आपा जो छोटा बणान्घा, से बडा कितेया जाणा।”

व्यवस्था स्खाणे वाल़े होर फरीसी लोका रे पाखंड

¹³ हे व्यवस्था स्खाणे वाल़े होर फरीसी लोको तुस्से पाखंडी ऐं, तुस्सा जो बौह्त सजा मिलणी! तुस्से माह्णुं रे कठे स्वर्गा रे राजे रे दुराजे बन्द करहा ऐं। तुस्से ना ता आपु ई तेस मन्झ दाखल हुंहाँ ऐं, होर ना तेस मन्झ होरी जो दाखल हूंणां देहां ऐं।

¹⁴ हे पाखंडी व्यवस्था स्खाणे वाल़े होर फरीसी लोको, तुस्सा जो बौह्त सजा मिलणी! तुस्से विधवा जो ठगी किन्हें तिन्हारे घर-बार होर जायदाद आपणे कठे लई लैहां ऐं, होर दिखावे रे कठे बड़ी देरा तक प्रार्थना करदे रैंहयां ऐं। इधी कठे परमेसरा तुस्सा जो सजा देणी।

¹⁵ “हे पाखंडी व्यवस्था स्खाणे वाल़े होर फरीसी लोको तुस्सा जो बौह्त सजा मिलणी! तुस्से एक आदमी जो आपणे पन्था मन्झ ल्याऊणे रे कठे समुद्र होर धरती जो पार करी किन्हें दूर-दूर चली जाहें, होर जेबे से तेस पन्था मन्झ आई जाहाँ, ता तुस्से तेस जो आपणे ले दो गुणा नरका रे भागी बणाई देहां ऐं।”

¹⁶ “हे काणे अगुवो, तुस्सा जो बौह्त सजा मिलणी, जो बोल्हा ऐं कि अगर कोई मन्दरा री कसम खाये ता कुछ नी आ, पर अगर कोई मन्दरा रे सोने री कसम खाए ता तेस कस्मा जो मनणा जरूरी आ।

¹⁷ हे नर्क्कलेयो, होर काणेयो, कुण बडा आ, सोना या से मन्दर जेस ले सोना पवित्र हुंहाँ?

¹⁸ फेरी बोल्हा ऐं कि अगर कोई बेदी री कसम खाए ता कुछ नी आ, पर जो भेंट बेदी पर ई, अगर कोई तेता री कसम खाए ता से आपणी कस्मा किन्हें बन्धी गया।

¹⁹ हे काणेयो, कुण बडा आ भेंट या बेदी, जेस ले भेंट पवित्र हुंहाँ ईं?

²⁰ इधी कठे जो बेदी री कसम खांहां, से तेस्सा बेदी री, होर तेता पर रखिरी चीजा री कसम खांहां।

²¹ होर जो मन्दरा री कसम खांहां, से मन्दरा री होर मन्दरा मन्झ रैहणे वाली चीजा री भी कसम खांहां।

²² होर जो स्वर्गा री कसम खांहां, से परमेसरा री राजगद्दी री होर तेता पर बैठणे वाल़े परमेसरा री भी कसम खांहां।”

²³ “हे पाखंडी व्यवस्था स्खाणे वाल़े, होर फरीसी लोको, तुस्सा जो बौह्त सजा मिलणी! तुस्से पदीने होर सूम्फ होर जीरे रा दस्वांस देहां ऐं। पर तुस्से मूसा री व्यवस्था री जरूरी गल्ला जिहां कि न्याय, दया होर विस्वास छाडी दितिरा। करणा ता एह्ड़ा चहिए था, तुस्सा जो दस्वांस ता देंदे रेहणा चहिए, पर तुस्से व्यवस्था री जरूरी गल्ला जो भी नजरअंदाज करी दे।

²⁴ हे काणे अगुवो, तुस्से पाणी पींदे टैमा बड़े ध्याना किन्हें मच्छरा जो ता छाणी देहां ऐं केतकी तुस्से तेता जो निगली नी लो, पर परमेसरा री व्यवस्था री जरूरी गल्ला जो टाल्ई देहां ऐं जो तुस्सा रे कठे ऊंटा जो निगल्ने रे बराबर आ।”

²⁵ “हे पाखंडी व्यवस्था स्खाणे वाल़े, होर फरीसी लोको, तुस्सा जो बौह्त सजा मिलणी! तुस्से तिन्हा भांडेया साहीं ऐ, जो बाहरा ले साफ होर अंदरा ले गंदे। तुस्से लोका साम्हणें आपणे आपा जो ता धर्मी दस्हा ऐं, पर तुस्सा रा मन न्ह्यारे मन्झ आ, होर आपणे आपु पर काबू नी रखदे।

²⁶ हे काणे फरीसी लोको, पैहले कौली होर थालू अंदरा ले मांजा ताकि स्यों बाहरा ले भी साफ हो।”

²⁷ “हे पाखंडी व्यवस्था स्खाणे वाल़े लोको, होर फरीसी लोको, तुस्सा जो बौह्त सजा मिलणी! तुस्से चुना कितरी कब्रा साहीं ऐं जो ऊपरा ले ता खरे सुझ्हा ऐं, पर अंदरा ले मरिरे रे हाड़के किन्हें होर सभ किस्मा री गंदगी किन्हें भर्हिरे।

²⁸ इंहां ईं तुस्से भी तिन्हा कब्रा साहीं ऐं, जेबे लोक तुस्सा जो देख्हा ऐं, स्यों सोच्हा ऐं कि तुस्से धर्मी ऐं, पर अंदरा ले तुस्से पाखंडी होर परमेसरा रे हुक्म नी मनणे रा पाप करहा ऐं।”

व्यवस्था स्खाणे वाल़े होर फरीसी लोका पर सजा री भविस्यवाणी

²⁹ “हे पाखंडी व्यवस्था स्खाणे वाल़ेओ, होर फरीसी लोको, तुस्सा जो बौह्त सजा मिलणी, तुस्से नबिया री कब्र स्जाहें जिन्हा जो तुस्सा रे बापदादे मारी दितरा था होर धार्मिक लोका जो सम्मान देणे रे कठे कब्र बणाहें।

³⁰ होर बोल्हा ऐं कि, अगर आस्से आपणे बापदादा रे टैमा मन्झ हुन्दे ता नबिया रा खून करणे मन्झ तिन्हारे साझीदार नी हुन्दे।

³¹ एता ले ता तुस्से आपणे खिलाफ ई गुआही देहां ऐं कि, होर तुस्से तिन्हारे बंस ऐं जिन्हें जे नबिया री हत्या कितरी।

³² होर हांऊँ जाणा कि तुस्से आपणे बापदादा रे पापा रा घड़े भरी देणे।

³³ तुस्से लोक जैहर्ले कीड़े रे बच्चे साहीं ऐं, तुस्सा नरका रे दण्डा ले नी बचणा।

³⁴ इधी कठे मां तुस्सा वाले नबी होर बुद्धिमान होर व्यवस्था स्खाणे वाल़े भेजणे। होर तुस्सा तिन्हा मन्झा ले कुछ लोक मारी देणे, होर दूजे लोक क्रूसा प्रयाल्हे चढ़ाणें। होर कुछ लोका जो आपणी यहूदी सभा मन्झ कोड़े मारणे, होर एक गांऊँआं ले दूजे गांऊँआं तक तिन्हारा पीछा करदे रैंह्णां।

³⁵ ताकि धर्मी माह्णुं हाबिला ले लई किन्हें बिरिक्याहा रे मह्ठे जकरयाह नबी तक, जेस जो तुस्से मन्दरा होर बेदी रे बीचा मन्झ मारी दितिरा था। होर जितने धर्मी लोका रा खून धरती पर बहाया गईरा, तुस्सा तिन्हारी मौता रे जिम्मेदार खुद हूंणां।

³⁶ हांऊँ तुस्सा किन्हें सच्च बोल्हा, ये सारी खूना री सजा एस्सा पीढ़ी रे लोका पर आई जाणी।”

यीसू रा यरुस्लेम सैहरा रे कठे रोणा

³⁷ “हे यरुस्लेम सैहर रे लोको, हे यरुस्लेम सैहर रे लोको! तुस्से पैहल्के नबी मारी दिते, होर जो तुस्सा वाले भेजे गये, तिन्हा जो पत्थरवाह कितेया। कितनी बारी मैं चाहेया कि जिहां कुकड़ी आपणे बच्चे जो आपणे फान्खा हेठ कट्ठा करहा ई, तिहां ईं हांऊँ भी तेरे लोका जो बचाऊं, पर तुस्से एह्ड़ा नी चाहेया।

³⁸ तुस्सा रा घर तुस्सा रे कठे पूरी तरहा ले उजड़ी जाणा।

³⁹ इधी कठे हांऊँ तुस्सा किन्हें बोल्हा कि, ऐबे ले जेबे तक तुस्सा नी बोलणा कि, धन्य आ से, जो प्रभु रे हका ले आहूँआं, तेबे तक तुस्सा हांऊँ दबारा नी देखणा।”