मत्ती 22 - मंडयाली नंऊँआं नियम

ब्याह री धामा रा उदाहरण

¹ एता पर यीसू दबारा तिन्हा किन्हें उदाहरणा मन्झ बोल्दा लग्या।

² “स्वर्गा रा राज एस उदाहरणा साहीं आं। एक राजे आपणे मह्ठे रा ब्याह कितेया।

³ होर तिन्हें आपणे सेऊआदार भेजे, ताकि स्यों सादिरे लोका जो ब्याहा री धामा मन्झ सादे, पर तिन्हें आऊंणा नी चाहेया।

⁴ फेरी तिन्हें होर कई सेऊआदार ये बोली किन्हें भेजे कि, सादिरे लोका किन्हें बोला, ‘हांऊँ धाम त्यार करी चुकिरा, होर मेरे बोल्ह्द होर पाली रे पसु धामा रे कठे काटी जाई चुकिरे, होर सभ कुछ त्यार आ, ब्याह री धामा मन्झ आऊआ।’

⁵ पर तिन्हें ब्याह मन्झ आऊंणा नी चाहेया। होर कोई आपणी डोहर्रिया जो चली गया, कोई आपणे व्यापारा जो चली गये।

⁶ होर बाकि बचिरे लोके राजे रे सेऊआदार पकड़े होर तिन्हारी बेज्जती किती होर स्यों मारी दिते।

⁷ तेबे राजे ये सुणेया ता राजे जो गुस्सा आया, होर तिन्हें आपणी सेना भेजी किन्हें तिन्हा हत्यारे रा नास करी दितेया, होर तिन्हारे गांऊँ फूकी दिते।

⁸ तेबे राजे आपणे बाकि सेऊआदार किन्हें बोल्या, ‘ब्याहा रा धामा ता त्यार आ, पर सादिरे रे लोक लायक नी ठैहरे।

⁹ इधी कठे चौराहे पर जाऊआ, होर जितने लोक तुस्सा जो मिले, सभी जो ब्याह री धामा मन्झ सादा।’

¹⁰ तेबे तिन्हें सेऊआदार सड़का पर जाई किन्हें बुरे लोक, खरे लोक, जितने लोक मिले, सभ कठ किते, होर ब्याहा रा घर प्रौह्णे किन्हें भर्ही गया।”

¹¹ “जेबे राजा प्रौह्णे जो देखणे रे कठे अंदर आया, ता तिन्हें तेथी एक माह्णुं देख्या, जिन्हें स्यों कपड़े नी पैहनीरे थे जेह्ड़े ब्याह मन्झ आईरे प्रौह्णेया जो पैन्ह्णे रे कठे दितरे थे।

¹² राजे तेस ले पूछेया, ‘हे दोस्त; तू ब्याहा रे कपड़े पैहने बगैर एथी किधियो आईरा?’ होर से चुप रेहा होर कुछ नी बोल्या।

¹³ तेबे राजे आपणे सेऊआदारा किन्हें बोल्या, ‘एसरे हाथ पैर बान्ही किन्हें एस जो बाहर नह्यारे मन्झ सट्टी देआ, तेथी रोणा होर दांत पिसणा हुणा।’

¹⁴ क्यूंकि सादे गईरे ता बौह्त ऐं पर चुणिरे थोह्ड़े ऐं।”

महाराजे जो कर देणा

¹⁵ तेबे फरीसी लोके जाई किन्हें आपु मन्झ सलाह किती कि, तेस जो किहाँ गल्ला मन्झ फसाए।

¹⁶ होर तिन्हें राजा हेरोदेसा रा साथ देणे वाल़े लोका साउगी आपणे कुछ चेले तेस वाले ये बोलणे रे कठे भेजे कि, “हे गुरु, आस्से जाणहां ऐं कि, तू सच्चा आ, होर परमेसरा री गल्ला सच्चाई किन्हें स्खाहां, होर केसी री परवाह नी करदा। क्यूंकि तू माह्णुं रा मुंह देखी किन्हें गल्ला नी करदा।

¹⁷ इधी कठे तू आस्सा जो दस कि तू क्या समझ्हा, महाराजे जो कर देणा ठीक आ कि नी?”

¹⁸ यीसूए तिन्हारी दुस्टता जाणी किन्हें बोल्या, “हे पाखंडियो, मुंजो किधियो परखदे लगिरे?

¹⁹ चुंगी देणे रा रोम देसा रा सिक्का मुंजो दसा।” तेबे स्यों तेस वाले एक सिक्का लई आये, जेसरी कीमत एक ध्याड़े री मजदूरी रे बराबर ई।

²⁰ यीसूए तिन्हा किन्हें बोल्या, “ये सिक्के मन्झ रूप होर नांऊँ केसरा?”

²¹ तिन्हें यीसू किन्हें बोल्या, “ये रूप होर नांऊँ महाराजे रा।” तेबे यीसूए तिन्हा किन्हें बोल्या, “जो महाराजे रा आ, से महाराजे जो देआ, होर जो परमेसरा रा आ, से परमेसरा जो देआ।”

²² ये सुणी किन्हें स्यों हरान हुए, होर स्यों तेस जो छाडी किन्हें चली गये।

जी उठणा होर ब्याह

²³ तेस ई ध्याड़े, कुछ सदूकी लोक बोल्हा ऐं कि मरणे वाल़े रा जी उठणा नी हुंदा, स्यों यीसू वाले आये, होर तिन्हें तेस ले पूछेया कि,

²⁴ “हे गुरु, मूसे नबिये बोलिरा था कि, अगर केसी रा भाई बगैर बच्चे मरी जाए, होर तेसरी लाड़ी पीछे रही जाए, ता तेसरा भाई तेसरी लाड़ी किन्हें ब्याह करी ले होर आपणे भाई रे कठे बच्चे पैदा करहे।

²⁵ उदाहरणा रे कठे, सात भाई थे, पैहला भाई ब्याह करी किन्हें मरी गया, होर बच्चे नी हूंणे री वजहा ले तेसरे भाईये तेसरी लाड़ी किन्हें ब्याह करी लेया।

²⁶ इंहां ईं दूजे होर त्रीजे भाईये भी कितेया, होर साता रे सात भाईया तक एह्ड़ा ई हुआ।

²⁷ सभी ले बादा मन्झ से ज्नाने भी मरी गई।

²⁸ मरिरे मन्झा ले जी उठणा ले बाद, से जन्नानी तिन्हा साता भाईया मन्झा ले केसरी लाड़ी हूणीं?”

²⁹ यीसूए तिन्हा जो जवाब दितेया कि, “तुस्से पवित्र सास्त्र होर परमेसरा री सामर्थ नी जाणदे, होर ये ही तुस्सा री गलती ई।

³⁰ क्यूंकि जिउंदे हूंणे पर ब्याह सादी नी हूणीं, पर तिन्हा स्वर्गा मन्झ परमेसरा रे स्वर्गदूता साहीं हूंणां।

³¹ पर मरिरे मन्झा ले जिउंदे हूंणे रे बारे मन्झ क्या तुस्से ये बचन नी पढ़ेया जो परमेसरे तुस्सा किन्हें बोल्या।

³² कि हांऊँ अब्राहमा रा परमेसर, होर इसहाका रा परमेसर, होर याकूबा रा परमेसर आ? से मरिरे या रा परमेसर नी आ, पर जिउंदेया रा परमेसर आ।”

³³ ये सुणी किन्हें लोक तेसरे उपदेसा ले हरान हुए।

सभी ले बडा हुक्म

³⁴ जेबे फरीसी लोके सुणेया कि, यीसूए सदूकी लोका रा मुंह बन्द करी दितेया; ता स्यों कठे हुये।

³⁵ होर तिन्हा मन्झा ले एकी व्यवस्था स्खाणे वाल़े परखणे रे कठे, तेस ले पूछेया।

³⁶ “हे गुरु, मूसा री व्यवस्था मन्झ कुण जे हुक्म बडा आ?”

³⁷ यीसूए तेस किन्हें बोल्या, “तू परमेसर आपणे प्रभु साउगी आपणे सारे मन होर आपणे सारे प्राण होर आपणे सारी बुद्धि किन्हें प्यार रख।

³⁸ बडा होर खास हुक्म ता येई आ।

³⁹ होर तेस साहीं ये दूजा हुक्म भी हाया कि, तू आपणे पड़ोसी किन्हें आपणे साहीं प्यार रख।

⁴⁰ येई दो हुक्म सारी मूसा री व्यवस्था होर नबिया रा आधार आ।”

मसीह केसरा मह्ठा?

⁴¹ जेबे फरीसी लोक कठे थे, यीसूए तिन्हा ले पूछेया कि,

⁴² “मसीह रे बारे मन्झ तुस्से क्या समझ्हा ऐं? से केसरा मह्ठा?” तिन्हें तेस किन्हें बोल्या, “राजा दाऊदा रा मह्ठा।”

⁴³ तिन्हें तिन्हा ले पूछेया, “ता राजा दाऊदे आत्मा मन्झ हुई किन्हें तेस जो प्रभु कि बोल्हा आ कि,

⁴⁴ ‘प्रभुए, मेरे प्रभु किन्हें बोल्या, मेरे सीधी तरफ बैठ, जेबे तक कि हांऊँ तेरे सभ दुस्मणा जो हराई नी दूं। तेबे तक तू मेरी सीधी तरफ बैठिरे रैह होर आदर पा।’

⁴⁵ जेबे राजा दाऊद तेस जो प्रभु बोल्हा, ता से तेसरा मह्ठा किहाँ बणेयां?”

⁴⁶ कोई भी तेसरे जवाबा मन्झ एक भी गल नी बोली सकेया, पर तेस ध्याड़े ले केसी जो तेस ले कुछ होर पूछणे री हिम्मत नी हुई।