मत्ती 18 - मंडयाली नंऊँआं नियम

स्वर्गा रे राजा मन्झ बडा कुणहां?

¹ तेस ई टैम चेले यीसू वाले आई किन्हें पुछदे लगे कि, “स्वर्गा रे राजा मन्झ बडा कुणहां?”

² एता पर यीसूए एक बच्चा आपणे वाले सादेया होर तिन्हारे बीचा मन्झ खड़ा करी दितेया।

³ होर तिन्हें बोल्या, “हांऊँ तुस्सा किन्हें सच्च बोल्हा, अगर तुस्से नी बधल्गे होर एस बच्चे साहीं नम्र नी बणघे, ता स्वर्गा रे राजा मन्झ तुस्सा दाखल नी करी पाणा।

⁴ जो कोई आपणे आपा जो एस बच्चे साहीं नम्र करघा, तेस स्वर्गा रे राजा मन्झ बडे हूंणां।

⁵ होर जो कोई मेरे साउगी प्यार रखी किन्हें एक एह्ड़े बच्चे जो अपनाहां, से मुंजो अपनाहां।”

पाप करणे री परखणी

⁶ “जो कोई इन्हा छोटे मन्झा ले जो मेरे पर विस्वास करहा ऐं, तिन्हा मन्झ केसी एकी ले भी पाप कुराये ता तेसरे कठे खरा आ कि एक बड़ा चक्की रा पाट तेसरे गला मन्झ टांग्या जाए होर तेस जो समुद्रा मन्झ सट्टी दितेया जाए।

⁷ संसारा रे कठे ये डरावणी गल ई कि लोका आपणा विस्वास खोई देणा! एह्ड़ा ता हमेसा हुन्दा रैंह्णां; पर तिन्हा लोका जो बौह्त सजा मिलणी! जिन्हां माह्णुंआं री वजहा ले लोका आपणा विस्वास खोई देणा।”

⁸ “अगर तेरा हाथ या पैर तेरे ले पाप कुराणे जो त्यार हुई जाए ता तिन्हा किन्हें पाप करणा बंद करी दे एथी तक कि अगर तुजो आपणे हाथ पैर काटणे पई जाए ता तिन्हा जो तू काटी दे। ताकि तू पाप नी करहे, दो हाथ या दो पैर रैहन्दे हुए तूजो अनंत नरका मन्झ पाणे ले ता तेरे कठे ये खरा आ कि, तू टूण्डा या लंगड़ा हुई किन्हें अनंत जिन्दगी मन्झ दाखल करहे होर परमेसरा साउगी रहे।

⁹ होर अगर तेरी हाख तुजो पाप कुराणे जो त्यार हुई जाए ता तेस हाखिया ले पाप करणा बंद करी दे, होर तुजो से हाख काढणी भी पई जाए ता तू एह्ड़ा ई कर। दो हाखिया हुंदे हुए तूजो नरका री आगा मन्झ पाए जाणे ले ता ये खरा आ कि तू काणा हुई किन्हें अनंत जिन्दगी मन्झ दाखल करहे।”

ल्हुखी री भेडा रा उदाहरण

¹⁰ “देखा, तुस्से इन्हा छोटे बच्चे मन्झा ले केसी जो बेकार देख्या जाणदे; क्यूंकि हांऊँ तुस्सा किन्हें सच्च बोल्हा कि, स्वर्गा मन्झ तिन्हारे स्वर्गदूत मेरे स्वर्गीय बापू रे साम्हणें हमेसा हाजिर रैंहयां ऐं।

¹¹ क्यूंकि हांऊँ माह्णुंआं रा मह्ठा भटकिरे लोका जो बचाणे रे कठे आईरा।

¹² तुस्से क्या समझ्हा ऐं? अगर केसी माह्णुं री सौ भेडा हो, होर तिन्हा मन्झा ले एक गुआई जाए, ता क्या तेस तिन्हा नड़िनूऐं जो प्हाड़ा पर छाडी किन्हें, तेस से गुआई री भेड नी तोप्णी?

¹³ होर अगर से गुआई री भेड तेस जो मिली जाए, ता हांऊँ तुस्सा किन्हें सच्च बोल्हा कि, तेस तिन्हा नड़िनूऐं भेडा रे कठे जो भटकीरी नी थी इतना खुस नी हूंणां, जितना कि एस्सा भेडा रे कठे खुस हूंणां।

¹⁴ एह्ड़ा ई तुस्सा रे बापू री जो स्वर्गा मन्झ आ, ये इच्छा नी ई कि, इन्हा छोटे मन्झा ले एक भी नास हो।”

कलीसिया रे लोका री गलतिया रा सुधार

¹⁵ “अगर तेरा विस्वासी भाई तेरे बरखलाफ गुनाह करहे, ता जा होर कल्हे जे गलबात करी किन्हें तेस जो समझाई दे; अगर से तेरी सुणी किन्हें आपणे पापा जो मनी ले ता तैं आपणा भाई वापस जीती लेया।

¹⁶ होर अगर से तेरी नी सुणे, ता एक दो जणा जो आपणे साउगी लई जा, क्यूंकि मूसा री व्यवस्था रे मताबक हर एक सिकायत दो या तीन गुआहा रे ज्रीए सच्च साबित हूणा चहिए।

¹⁷ अगर से तिन्हारी भी नी सुणे, ता कलीसिया किन्हें बोली दे, पर अगर से कलीसिया री भी नी सुणे, ता तू तेसके एह्ड़ा व्यवहार करा जिहां तुस्से गैर-यहूदी होर चुंगी लैणे वाल़ा साहीं करहे।”

रोकणा होर मौका देणा

¹⁸ “हांऊँ तुस्सा किन्हें सच्च बोल्हा, जो कुछ तुस्से धरती पर बानघे, तेस स्वर्गा मन्झ बझी जाणा होर जो कुछ तुस्से धरती पर खोल्घे, तेस स्वर्गा मन्झ खुल्ही जाणा।

¹⁹ फेरी हांऊँ तुस्सा किन्हें बोल्हा, अगर तुस्सा मन्झा ले दो जण धरती पर केसी गल्ला जो एक मन हुई किन्हें मांगे, ता से मेरे बापू री तरफा ले जो स्वर्गा मन्झ आ तिन्हारे कठे हुई जाणी।

²⁰ क्यूंकि जेथी केथी दो या तीन लोक मेरे चेले हूंणे रे नाते कठे हुंहाँ ऐं तेथी हांऊँ तिन्हारे बीचा मन्झ हुंहाँ।”

माफ नी करणे वाल़े सेऊआदारा रा उदाहरण

²¹ तेबे पतरसे नेडे आई किन्हें, यीसू किन्हें बोल्या, “हे प्रभु, अगर मेरा विस्वासी भाई गुनांह करदा रहे, ता हांऊँ कितनी बारी तेस जो माफ करूं, क्या सात बारी?”

²² यीसूए तेस किन्हें बोल्या, “हांऊँ तुध किन्हें ये नी बोल्दा कि, सात बारी, पर साता ले सत्तर गुणा तक तेस जो माफ करा।

²³ इधी कठे स्वर्गा रा राज एस उदाहरणा साहीं आं। एक राजा था जिन्हें आपणे सेऊआदारा ले लेखा लैणा चाहेया।

²⁴ जेबे से लेखा लैंदा लग्या, ता एक जण तेसरे साम्हणें ल्यान्देया जेस पर दस हजार तोड़े रा कर्ज था, जो से सेऊआदार कधी भी नी देई सक्दा था।

²⁵ जेब्की चूकाणे रे कठे तेस वाले कुछ नी था, ता तेसरे राजे ये हुक्म दितेया कि ये होर एसरी लाड़ी होर एसरे बाल बच्चे होर एसरा सभ कुछ बेची दितेया जाए, होर से कर्जा चुकाई दितेया जाए।”

²⁶ “तेबे तेसरे सेऊआदारे तेसरे पैरा पर पई किन्हें तेस ले अर्ज किती, होर बोल्या हे राजे, सब्र रख, मां सब कुछ चुकाई देणा।

²⁷ तेबे सेऊआदारा रे राजे तेस पर तरस खाधी होर से छाडी दितेया, होर तेसरा कर्जा माफ करी दितेया।

²⁸ पर जेबे से सेऊआदार बाहर निकल्या, ता तेसरे संगी सेऊआदारा मन्झा ले एक तेस जो मिल्या, जो तेसरा सौ ध्याड़े री मजदूरी रा कर्जदार था; तिन्हें से पकड़ेया होर तेसरा गला घुटेया, होर बोल्या, ‘जो कुछ तैं लईरा से मुंजो वापस देई दे।’

²⁹ एस्सा गल्ला पर तेसरा संगी सेऊआदार झुकी किन्हें, तेस ले अर्ज करदा लग्या कि, सब्र रख मां सभ चुकाई देणा।

³⁰ पर से नी मन्या, पर तिन्हें जाई किन्हें से जेल्हा मन्झ पाई दितेया; ताकि जेबे तक से कर्जा नी चुकाए, तेबे तक से तेथी रहे।

³¹ तेसरे संगी सेऊआदार ये देखी किन्हें बौह्त दुआस हुए, होर तिन्हें जाई किन्हें आपणे राजे जो पूरा हाल दसी दितेया।”

³² “तेबे तेसरे राजे तेस जो सादी किन्हें तेस किन्हें बोल्या, ‘हे दुस्ट सेऊआदार,’ तैं मेरे ले बिनती किती, होर मैं तेरा पूरा कर्जा माफ करी दितेया?

³³ इधी कठे जिहां मैं तेरे पर दया किती, होर तेरा कर्ज माफ कितेया तिहां ईं तुजो भी आपणे संगी सेऊआदारा पर दया करी किन्हें तेसरा कर्ज माफ करणा चहिए था।

³⁴ होर राजे गुस्से मन्झ आई किन्हें तेस सेऊआदारा जो सजा देणे वाल़े रे हाथा मन्झ सौंपी दितेया, ताकि जेबे तक से सारा कर्जा चुकाई नी दे, तेबे तक से तेथी रहे।”

³⁵ “इंहां ईं अगर तुस्सा मन्झा ले हर एक आपणे विस्वासी भाई रे पाप मना ले माफ नी करघे, ता मेरे बापू जो स्वर्गा मन्झ आ, तेस तुस्सा साउगी भी एह्ड़ा ही करणा।”