मत्ती 16 - मंडयाली नंऊँआं नियम

फरीसी लोका रे ज्रीए यीसू जो परखणा

¹ होर फरीसी लोक होर सदूकी लोक नेडे आई किन्हें यीसू जो परखणे रे कठे तेस किन्हें बोल्या कि, “आसमाना रा कोई चिन्ह आस्सा जो दस, ताकि आस्सा जो पता लगे कि तू परमेसरे ई भेजिरा।”

² यीसूए तिन्हा जो जवाब दितेया कि, “जेबे सांझ हुंहाँ ईं तुस्से बोल्हा ऐं कि आज मौसम साफ रैंह्णां क्यूंकि आसमान साफ आ।

³ होर भ्याग हुंदे बोल्हा ऐं कि, आज आंधी आऊणीं क्यूंकि आसमान लाल होर धुंधला आ। तुस्से आसमाना रा हाल देखी किन्हें भेद दसी सक्हा ऐं, पर परमेसर जो जमाने मन्झ जो करहा तेता रा भेद करणा कि नी जाणदे?

⁴ एस युगा रे बुरे होर व्यभिचारी लोक चिन्ह तोप्हा ऐं पर जेह्ड़ा योना नबी रे साउगी हुआ एस चिन्हा जो छाडी किन्हें कोई होर चिन्ह तिन्हा नी दितेया जाणा।” होर यीसू तिन्हा जो छाडी किन्हें समुद्रा रे पारली वखा जो चली गया।

फरीसी लोक होर सदूकी लोका रे उपदेस रूपी स्जेड़ा

⁵ होर जेबे यीसू होर चेले समुद्रा रे दूजे बाढे पूजी गये, तेबे चेलेया जो याद आई कि स्यों रोटी ल्याऊणा भूली गईरे थे।

⁶ यीसूए तिन्हा किन्हें बोल्या, “फरीसी लोक होर सदूकी लोका रे स्जेड़े ले चतन्न रैहया।”

⁷ चेले आपु मन्झ सोच विचार करदे लगे कि, “आस्सा वाले सभी रे कठे रोटिया नी हाई इधी कठे यीसूए एह्ड़ा बोल्या।”

⁸ ये जाणी किन्हें यीसूए तिन्हा किन्हें बोल्या, “हे कम विस्वास रखणे वाल़े लोको, तुस्से रोटिया रे बारे मन्झ सोच विचार किधियो करेया करहा ऐं कि तुस्सा वाले रोटी नी हाई?

⁹ क्या हल्ली तक तुस्से जाणदे होर समझ्दे नी ऐं? जेबे मैं पांज हज़ार लोका रे कठे पांज रोटिया तोड़ी थी ता तुस्से बचीरे रोटिया रे कितने छड़ोल्लू भरी किन्हें चक्के थे?

¹⁰ होर जेबे मैं चार हज़ार लोका रे कठे सात रोटिया तोड़ी, ता तुस्से बचीरे रोटिया रे कितने छड़ोल्लू चक्के?

¹¹ तुस्से कि नी समझ्दे कि मैं तुस्सा किन्हें रोटिया रे बारे मन्झ नी बोल्या? पर फरीसी होर सदूकी लोका री गलत उपदेस ले चतन्न रैहणे रे कठे बोलिरा था।”

¹² तेबे तिन्हा जो समझ आई गया कि, तिन्हें रोटी रे स्जेड़े रे बारे मन्झ नी, पर फरीसी होर सदूकी लोका री उपदेस ले चतन्न रैहणे जो बोल्या था।

पतरसा रा यीसू जो मसीह मनणा

¹³ जेबे यीसू कैसरिया फिलिप्पी सैहरा मन्झ आया, तेबे आपणे चेले ले पूछदा लग्या कि, “हांऊँ माह्णुं रा मह्ठा आ, एता रे बारे मन्झ लोक मुंजो क्या बोल्हा ऐं की हांऊँ कुणहां?”

¹⁴ चेले बोल्या, “कई लोक बोल्हे कि यहून्ना बपतिस्मा देणे वाल़ा, होर कई लोक बोल्हे कि एलिय्याह नबी, होर कई लोक बोल्हे कि यिर्मयाह नबी या नबिया मन्झा ले कोई एक आ।”

¹⁵ यीसूए तिन्हा किन्हें बोल्या, “पर तुस्से मुंजो क्या बोल्हा ऐं की हांऊँ कुणहां?”

¹⁶ समौन पतरसे जवाब दितेया कि, “तू जिउंदे परमेसरा रा मह्ठा मसीह आ।”

¹⁷ यीसूए तेस जो जवाब दितेया कि, “हे समौन योना रे मह्ठे, तू धन्य आ; क्यूंकि मांस होर खूने नी, पर मेरे बापूए जो स्वर्गा मन्झा आ, ये गल तुध पर जाहिर किती।

¹⁸ होर हांऊँ भी तुध किन्हें बोल्हा कि, तू पतरस आ, होर मां एस पात्थरा पर आपणी कलीसिया बनाणी: होर मौता रा हक भी तेसरे खिलाफ खड़ा नी हुणा।

¹⁹ मां तुजो स्वर्गा रे राजा री चाबिया देणी: होर जो कुछ तू धरती पर बानघा, तेस स्वर्गा मन्झ बझी जाणा होर जो कुछ तू धरती पर खोले, तेस स्वर्गा मन्झ खुल्ही जाणा।”

²⁰ तेबे तिन्हें चेले खबरदार किते कि, “तुस्से मेरे बारे मन्झ केसी जो देख्या दस्दे कि हांऊँ मसीह आ।”

आपणी मौता रे बारे मन्झ यीसू री भविस्यवाणी

²¹ तेस टैमा ले यीसू आपणे चेले जो दस्दा लग्या कि, “मेरा यरुस्लेम सैहरा जो जाणा जरूरी आ, होर यहूदी मुखिये होर मुख्य याजक होर व्यवस्था स्खाणे वाल़े रे हाथा ले बौह्त दुःख उठाऊँ, होर मारी दितेया जाऊं, होर हांऊँ त्रीजे ध्याड़े जिउंदा हुई जाऊँ।”

²² ये सुणी किन्हें पतरस यीसू जो लग जे लई जाई किन्हें झिड़क्दा लग्या कि, “हे प्रभु, परमेसर करे, तेरे साउगी एह्ड़ा कधी नी हो।”

²³ यीसूए मुड़ी किन्हें पतरसा किन्हें बोल्या, “एह्ड़ा सोचणा बंद करी दे! सैतान तुध ले एह्ड़ी गल्ला बुलवाया करहा। तू मेरे पैंडे रा कांडा आ, क्यूंकि जेह्ड़ा परमेसर मेरे ले कुराणा चाहां तेहड़ा नी चाही किन्हें तू मेरे ले से कुराणा चाहां जेहड़ा लोक चाहें।”

यीसू साउगी चलणे रा मतलब

²⁴ तेबे यीसूए आपणे चेले किन्हें बोल्या, “जो कोई मेरा चेला बणना चाहां, से आपणी इच्छा पूरा करणे रे बजाए दुःखा रा क्रूस चकी किन्हें मेरा चेला बणे।

²⁵ क्यूंकि जो कोई आपणी जान बचाणा चाहां, तेस अनंतकाला री जिन्दगी खोई देणी। पर जो कोई मेरे कठे आपणी जान गुआई देह्न्गा, तेस हमेसा री जिन्दगी पाणी।

²⁶ होर अगर तुस्से पूरे संसारा री चीज़ा कठा करी ले, पर फेरी भी अनंत जिन्दगी नी पाई सके, ता तेता ले तुस्सा जो क्या फायदा? क्यूंकि कोई भी माह्णुं केसी चीजा री तुलना अनंत जिन्दगी किन्हें नी करी सक्दा।

²⁷ क्यूंकि मां माह्णुं रे मह्ठे आपणे स्वर्गदूता साउगी आपणे बापू री महिमा मन्झ आऊंणा, होर तेस टैम तेस हर एकी जो तेसरे कामा रे मताबक इनाम देणा।

²⁸ हांऊँ तुस्सा किन्हें सच्च बोल्हा कि एथी बौह्त लोक खड़ीरे कि जेबे तिन्हा हांऊँ माह्णुं रा मह्ठा तेसरे राजा मन्झ आऊंदे हुये देखी लैन्घे, तेबे ही तिन्हा मरणा।”